ಐಪಿಎಲ್ 16ನೇ ಆವೃತ್ತಿಯಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳ ನಡುವಿನ ಮಳೆಯಿಂದ ರದ್ದ್ದಾಗಿದೆ.
ಬುಧವಾರ ಲಕ್ನೋದ ಏಕನಾ ಸ್ಟೇಡಿಯಂನಲ್ಲಿ ಟಾಸ್‌ ಗೆದ್ದಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ಆತಿಥೇಯ ಲಕ್ನೋ ತಂಡವನ್ನು ಬ್ಯಾಟಿಂಗ್‌ಗೆ ಆಹ್ವಾನಿಸಿತ್ತು.
ರಾಹುಲ್‌ ಪಡೆ 19.2 ಓವರ್‌ಗಳಲ್ಲಿ 7 ವಿಕೆಟ್‌ ನಷ್ಟದಲ್ಲಿ 125 ರನ್‌ಗಳಿಸಿದ್ದ ವೇಳೆ ಜೋರಾಗಿ ಮಳೆ ಆರಂಭವಾಯಿತು. ಈ ವೇಳೆ ಆಯುಷ್ ಬದೋನಿ 59 ರನ್‌ ಮತ್ತು ಕೃಷ್ಣಪ್ಪ ಗೌತಮ್ ಒಂದು ರನ್‌ಗಳಿಸಿ ಕ್ರೀಸ್‌ನಲ್ಲಿದ್ದರು.
ಸತತವಾಗಿ ಮಳೆ ಸುರಿದ ಕಾರಣ ರೆಫ್ರಿ ಪಂದ್ಯವನ್ನು ರದ್ದುಗೊಳಿಸಿದ ನಿರ್ಧಾರ ಪ್ರಕಟಿಸಿದರು. ಇದರಿಂದಾಗಿ ಸಿಎಸ್‌ಕೆ ಅನಿವಾರ್ಯವಾಗಿ ಲಕ್ನೋದ ಜೊತೆ ಅಂಕವನ್ನು ಹಂಚಿಕೊಳ್ಳಬೇಕಾಯಿತು.
ಈ ಸುದ್ದಿ ಓದಿದ್ದೀರಾ? : ಐಪಿಎಲ್ 2023 | ಕೊಹ್ಲಿ– ಗಂಭೀರ್‌ ನಡುವೆ ವಾಗ್ವಾದ; ಬಿಸಿಸಿಐನಿಂದ ಇಬ್ಬರಿಗೂ ಶೇ. 100 ದಂಡ
ಮೊದಲ 10 ಓವರ್‌ಗಳಲ್ಲಿ ಲಕ್ನೋ 44 ರನ್‌ಗಳಿಗೆ 5 ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಈ ವೇಳೆ ಜೊತೆಗೂಡಿದ ಆಯುಷ್ ಬದೋನಿ ಮತ್ತು ನಿಕಲಸ್‌ ಪೂರನ್‌ ತಂಡವನ್ನು ನಿಧಾನಗತಿಯಲ್ಲಿ ಚೇತರಿಕೆಯತ್ತ ಕೊಂಡೊಯ್ದರು.
31 ಎಸೆತಗಳಲ್ಲಿ 21 ರನ್‌ಗಳಿಸಿ ಪೂರನ್‌ ನಿರ್ಗಮಿಸಿದರೆ, ಬದೋನಿ 59 ರನ್‌ ಗಳಿಸಿ (33 ಎಸೆತ 4×2 6×4) ಅಜೇಯರಾಗುಳಿದರು.
ಸಿಎಸ್‌ಕೆ ಪರ ಸ್ಪಿನ್ನರ್‌ಗಳಾದ ಮೊಯಿನ್‌ ಅಲಿ, ಮಹೇಶ್‌ ತೀಕ್ಷಣ ಹಾಗೂ ವೇಗಿ ಮಥೀಶಾ ಪತಿರಾನ ತಲಾ 2 ವಿಕೆಟ್‌ ಪಡೆದರು.
