ಸೋಮವಾರ(ಏ.13) ನಡೆದ ಐಪಿಎಲ್ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ (SRH) ವಿರುದ್ಧ ರಾಜಸ್ಥಾನ್ ರಾಯಲ್ಸ್ (RR) ತಂಡ 57 ರನ್‌ಗಳ ಸೋಲು ಅನುಭವಿಸಿದೆ. ಈ ಪಂದ್ಯದಲ್ಲಿ ರಾಜಸ್ಥಾನ್ ತಂಡದ 15 ವರ್ಷದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ‘ಗೋಲ್ಡನ್ ಡಕ್’ (ಎದುರಿಸಿದ ಮೊದಲ ಚೆಂಡಿನಲ್ಲಿಯೇ ಶೂನ್ಯಕ್ಕೆ ಔಟ್) ಆಗಿ ನಿರಾಶೆ ಮೂಡಿಸಿದ್ದಾರೆ. ಈ ಟೂರ್ನಮೆಂಟ್‌ನಲ್ಲಿ ಹಿಂದಿನ ಮ್ಯಾಚ್‌ಗಳಲ್ಲಿ ಎರಡು ಬಾರಿ ಕೇವಲ 15 ಚೆಂಡುಗಳಲ್ಲಿ ಅರ್ಧ ಶತಕ ಬಾರಿಸಿ, ರಾಜಸ್ಥಾನ್ ತಂಡದ ಆಧಾರಸ್ತಂಭವಾಗಿದ್ದ ಈ ಯುವ ಆಟಗಾರನಿಗೆ ಎಸ್‌ಆರ್‌ಹೆಚ್‌ ವಿರುದ್ಧದ ಪಂದ್ಯ ತೀವ್ರ ನಿರಾಶೆ ತಂದಿದೆ.
ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಕಡೆಯಿಂದ ಐಪಿಎಲ್‌ಗೆ ಪದಾರ್ಪಣೆ ಮಾಡಿದ 24 ವರ್ಷದ ವೇಗಿ ಪ್ರಫುಲ್ ಹಿಂಗೆ ಈ ಪಂದ್ಯದಲ್ಲಿ 4 ವಿಕೆಟ್ ಪಡೆದು ಗಮನ ಸೆಳೆದರು. ಪ್ರಫುಲ್ ಹಿಂಗೆ ಎಸೆದ ವೇಗದ ಬೌನ್ಸ್ ಚೆಂಡನ್ನು ಹೊಡೆಯಲು ಹೋದ ಸೂರ್ಯವಂಶಿ, ಟಾಪ್-ಎಡ್ಜ್ ಆಗಿ ವಿಕೆಟ್ ಕೀಪರ್ ಸಲಿಲ್ ಅರೋರಾ ಅವರಿಗೆ ಕ್ಯಾಚ್ ಇಟ್ಟು ಹೊರನಡೆದರು. ಸೂರ್ಯವಂಶಿ ಅವರ ವಿಕೆಟ್ ಬಿದ್ದಿದ್ದು ರಾಜಸ್ಥಾನ್ ತಂಡದ ರನ್ ಚೇಸ್ ಅನ್ನು ಮತ್ತಷ್ಟು ಕಷ್ಟಕ್ಕೆ ಸಿಲುಕಿಸಿತು.
ಸೂರ್ಯವಂಶಿ ಅಸಮಾಧಾನಕ್ಕೆ ಕಾರಣವೇನು?
ಆದರೆ, ಸೂರ್ಯವಂಶಿ ಅವರ ಅಸಮಾಧಾನಕ್ಕೆ ಕೇವಲ ಔಟ್ ಆಗಿದ್ದು ಮಾತ್ರ ಕಾರಣವಲ್ಲ; ಬದಲಾಗಿ ರಾಜಸ್ಥಾನ್ ರಾಯಲ್ಸ್ ಯಜಮಾನರ ಒಂದು ನಿರ್ಧಾರ ಅವರನ್ನು ಬೇಸರಗೊಳ್ಳುವಂತೆ ಮಾಡಿದೆ. ಈ ಮ್ಯಾಚ್ ಹಾಗೂ ಇದಕ್ಕೂ ಹಿಂದಿನ ಮ್ಯಾಚ್‌ನಲ್ಲಿ ರಾಜಸ್ಥಾನ್ ತಂಡ ಅವರನ್ನು ಫೀಲ್ಡಿಂಗ್‌ನಿಂದ ಹೊರಗಿಟ್ಟು, ಎರಡನೇ ಇನಿಂಗ್ಸ್‌ನಲ್ಲಿ ಕೇವಲ ಬ್ಯಾಟಿಂಗ್ ಮಾಡಲು ‘ಇಂಪ್ಯಾಕ್ಟ್ ಪ್ಲೇಯರ್’ ಆಗಿ ಮೈದಾನಕ್ಕೆ ಇಳಿಸಿತ್ತು. ಮೈದಾನದಲ್ಲಿ ಫೀಲ್ಡಿಂಗ್ ಮಾಡಲು ತುಂಬಾ ಇಷ್ಟಪಡುತ್ತಿದ್ದ ಸೂರ್ಯವಂಶಿ ಅವರಿಗೆ ತಂಡದ ಈ ನಿರ್ಧಾರ ಇಷ್ಟವಾಗಿರಲಿಲ್ಲವಂತೆ.
ಇದನ್ನು ಓದಿದ್ದೀರಾ? ಲ್ಯಾಂಗರ್ ಭವಿಷ್ಯ ನಿಜವಾಯ್ತು: ಸೌಲಭ್ಯಗಳಿಲ್ಲದೆ ಬೆಳೆದ ರಾಜಸ್ಥಾನದ ಹುಡುಗ ಈಗ LSG ಮ್ಯಾಚ್ ವಿನ್ನರ್
ಈ ವಿಚಾರದ ಬಗ್ಗೆ ಪ್ರತಿಕ್ರಿಯೆ ನೀಡಿದ ರಾಜಸ್ಥಾನ್ ರಾಯಲ್ಸ್ ತಂಡದ ಸಹಾಯಕ ಕೋಚ್ ಟ್ರೆವರ್ ಪೆನ್ನಿ ಅವರು, “ಹಿಂದಿನ ಮ್ಯಾಚ್‌ನಲ್ಲೂ ವೈಭವ್ ಫೀಲ್ಡಿಂಗ್‌ನಿಂದ ಹೊರಗುಳಿದಿದ್ದಕ್ಕೆ ಅವರು ಖುಷಿಯಾಗಿರಲಿಲ್ಲ. ಅವರು ಕಳಪೆ ಫೀಲ್ಡರ್ ಅಲ್ಲ, ಅವರಿಗೆ ಫೀಲ್ಡಿಂಗ್ ಮಾಡುವುದು ಬಹಳ ಇಷ್ಟ. ಆದರೆ, ಗಾಯದಿಂದ ಚೇತರಿಸಿಕೊಂಡ ಡೊನೊವನ್ ಫೆರೇರಾ ತಂಡಕ್ಕೆ ವಾಪಸ್ಸಾಗಿದ್ದಾರೆ (ಡೊನೊವನ್ SA20 ಲೀಗ್‌ನಲ್ಲಿ ಕಾಲರ್‌ಬೋನ್ ಮುರಿತಕ್ಕೊಳಗಾಗಿದ್ದರು). ಡೊನೊವನ್ ಒಬ್ಬ ‘ಗನ್ ಫೀಲ್ಡರ್’ (ಅದ್ಭುತ ಫೀಲ್ಡರ್) ಆಗಿರುವುದರಿಂದ ಅವರನ್ನು ಫೀಲ್ಡಿಂಗ್‌ಗೆ ಆಡಿಸಲಾಯಿತು. ತಂಡದ ಸಮತೋಲನ ಕಾಪಾಡಲು ವೈಭವ್ ಅವರನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬಳಸಿಕೊಳ್ಳಬೇಕಾಯಿತು. ಇದು ಅವರಿಗೆ ಸ್ವಲ್ಪ ಬೇಸರ ತಂದಿದೆ,” ಎಂದು ವಿವರಿಸಿದ್ದಾರೆ.
ಹಾಗೆ ಹೈದರಾಬಾದ್‌ನಲ್ಲಿ ನಡೆದ ಐಪಿಎಲ್ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ (SRH) ತಂಡವು ರಾಜಸ್ಥಾನ್ ರಾಯಲ್ಸ್ (RR) ವಿರುದ್ಧ 57 ರನ್‌ಗಳ ಭರ್ಜರಿ ಜಯ ಸಾಧಿಸಿದೆ. ಮೊದಲು ಬ್ಯಾಟ್ ಮಾಡಿದ ಎಸ್‌ಆರ್‌ಹೆಚ್‌, ನಾಯಕ ಇಶಾನ್ ಕಿಶನ್ ಅವರ ಸ್ಫೋಟಕ 91 ರನ್‌ಗಳ (44 ಎಸೆತ) ನೆರವಿನಿಂದ 20 ಓವರ್‌ಗಳಲ್ಲಿ 216/6 ರನ್ ಗಳಿಸಿತು. ಈ ಬೃಹತ್ ಗುರಿ ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್, ಐಪಿಎಲ್‌ಗೆ ಪದಾರ್ಪಣೆ ಮಾಡಿದ ಯುವ ವೇಗಿಗಳಾದ ಪ್ರಫುಲ್ ಹಿಂಗೆ (4/34) ಮತ್ತು ಸಾಕಿಬ್ ಹುಸೇನ್ (4/24) ಅವರ ಮಾರಕ ದಾಳಿಗೆ ತತ್ತರಿಸಿ 19 ಓವರ್‌ಗಳಲ್ಲಿ ಕೇವಲ 159 ರನ್‌ಗಳಿಗೆ ಆಲೌಟ್ ಆಯಿತು. ಡೊನೊವನ್ ಫೆರೇರಾ (69) ಮತ್ತು ರವೀಂದ್ರ ಜಡೇಜಾ (45) ಉತ್ತಮ ಹೋರಾಟ ನಡೆಸಿದರೂ ತಂಡವನ್ನು ಸೋಲಿನಿಂದ ಪಾರುಮಾಡಲು ಸಾಧ್ಯವಾಗಲಿಲ್ಲ.
