ಮಹಿಳಾ ವಿಶ್ವಕಪ್ (ಓಡಿಐ) ಟೂರ್ನಿಯ ಭಾರತ ಮತ್ತು ನ್ಯೂಜಿಲೆಂಟ್ ತಂಡಗಳ ನಡುವಿನ ಪಂದ್ಯವು ಮುಂಬೈನಲ್ಲಿ ನಡೆಯುತ್ತಿದೆ. ಟಾಸ್ ಸೋತು ಮೊದಲು ಬ್ಯಾಂಟಿಂಗ್ ಮಾಡಿದ ಟೀಮ್ ಇಂಡಿಯಾ ಭರ್ಜರಿ ಪ್ರದರ್ಶನ ನೀಡಿದೆ. ಉಪನಾಯಕಿ ಸ್ಮೃತಿ ಮಂಧಾನ ಮತ್ತು ಅವರ ಆರಂಭಿಕ ಜೊತೆಗಾರ್ತಿ ಪ್ರತಿಕಾ ರಾವಲ್ ಅವರು ಅದ್ಭುತ ಶತಕಗಳ ನೆರವಿನೊಂದಿಗೆ 3 ವಿಕೆಟ್ಗಳ ನಷ್ಟಕ್ಕೆ 340 ರನ್ ಗಳಿಸಿದೆ.
ಪಂದ್ಯವು ನವಿ ಮುಂಬೈನ ಡಿ.ವೈ ಪಾಟೀಲ್ ಕ್ರೀಡಾಂಗಣದಲ್ಲಿ ನಡೆಯುತ್ತಿದೆ. ಪಂದ್ಯಕ್ಕೆ ಮಳೆ ಅಡ್ಡಿಯಾಗಿದ್ದರಿಂದ, ಪ್ರತಿ ತಂಡದ ಬ್ಯಾಟಿಂಗ್ಅನ್ನು 49 ಓವರ್ಗಳಿಗೆ ಇಳಿಸಲಾಗಿದೆ.
ಆರಂಭಿಕ ಆಟಗಾರರಾಗಿ ಮೈದಾನಕ್ಕೆ ಇಳಿದ ಮಂಧಾನ ಮತ್ತು ರಾವಲ್ ಇಬ್ಬರು ಅತ್ಯುತ್ತಮ ಜೋಡಿ ಆಟ ಪ್ರದರ್ಶಿಸಿದರು. ಇಬ್ಬರೂ ಸೇರಿ 212 ರನ್ಗಳನ್ನು ಕಲೆ ಹಾಕುವ ಮೂಲಕ ಸತತ ಮೂರು ಸೋಲುಗಳನ್ನು ಕಂಡಿದ್ದ ಭಾರತ ತಂಡಕ್ಕೆ ಭದ್ರ ಅಡಿಪಾಯ ಹಾಕಿಕೊಟ್ಟಿದ್ದಾರೆ. ಗೆಲುವಿನ ಭರವಸೆ ಹುಟ್ಟುಹಾಕಿದ್ದಾರೆ.
ಈ ಲೇಖನ ಓದಿದ್ದೀರಾ?: ಬಿಹಾರ ಚುನಾವಣೆ | ಶಿಕ್ಷಣ, ನಿರುದ್ಯೋಗ – ಬಿಹಾರಿ ಯುವಜನರು ಬಯಸುತ್ತಿರುವುದೇನು?
ಮಂಧಾನ 95 ಎಸೆಗಳಿಗೆ 109 ರನ್ ಗಳಿಸಿದರೆ, ರಾವಲ್ 134 ಬಾಲ್ಗಳನ್ನು ಎದುರಿಸಿ 122 ರನ್ ಗಳಿಸಿದರು. 3ನೇ ಕ್ರಮಾಂಕದಲ್ಲಿ ಅಂಗಳಕ್ಕೆ ಇಳಿದ ಜೆಮಿಮಾ ರೊಡ್ರಿಗಸ್ 55 ಎಸೆತಗಳಿಗೆ 76 ರನ್ಗಳಿಸಿ, ಅಜೇಯರಾಗಿ ಉಳಿದರು. ಹರ್ಮನ್ ಪ್ರೀತ್ ಕೌರ್ 11 ಬಾಲ್ಗಳಿಗೆ 10 ರನ್ ಗಳಿಸಿ ಔಟ್ ಆದರೆ, ರಿಚಾ ಘೋಷ್ 1 ಬಾಲ್ಗೆ 4 ರನ್ ಸಿಡಿಸಿ ಅಜೇಯರಾಗಿ ಉಳಿದರು.
ಇದು ಮಹಿಳಾ ವಿಶ್ವಕಪ್ನಲ್ಲಿ ಭಾರತದ ಅತ್ಯಧಿಕ ಮೊತ್ತವಾಗಿದೆ. ಭಾರತ ತಂಡ ನೀಡಿರುವ ಬೃಹತ್ ಮೊತ್ತವನ್ನು ನ್ಯೂಜಿಲೆಂಡ್ ತಂಡ ಬೆನ್ನತ್ತಲು ಸಿದ್ದವಾಗಿದ್ದು, ಬ್ಯಾಟಿಂಗ್ ಆರಂಭಿಸಬೇಕಿದೆ.
