ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಇತ್ತೀಚಿನ ದಿನಗಳಲ್ಲಿ ಬಾಡಿಗೆ ಮನೆ ಸಿಗುವುದೇ ಕಷ್ಟಕರವಾಗಿದೆ. ಸಿಕ್ಕರೂ ದುಪ್ಪಟ್ಟು ದರವಿರುತ್ತೆ. ರಿಯಲ್ ಎಸ್ಟೇಟ್ ಪ್ಲಾಟ್‌ಫಾರ್ಮ್ ಮ್ಯಾಜಿಕ್‌ಬ್ರಿಕ್ಸ್ ಬಿಡುಗಡೆ ಮಾಡಿರುವ ಬಾಡಿಗೆ ಅಪ್‌ಡೇಟ್ (ಜನವರಿ-ಮಾರ್ಚ್ 2024) ವರದಿಯ ಪ್ರಕಾರ, ನಗರದಲ್ಲಿ ವರ್ಷದಿಂದ ವರ್ಷಕ್ಕೆ 23.7% ಬಾಡಿಗೆ ಏರಿಕೆಯನ್ನು ಕಂಡಿದೆ ಎಂದು ಹೇಳಿದೆ.
ಬೆಂಗಳೂರಿನ ಪ್ರತಿಷ್ಠಿತ ಬಡಾವಣೆಗಳಲ್ಲಿ ಬಾಡಿಗೆ ದರಗಳು ಮುಗಿಲು ಮುಟ್ಟಿವೆ. ಕೋರಮಂಗಲ, ಸರ್ಜಾಪುರ ರಸ್ತೆ ಮತ್ತು ಮಾರತಹಳ್ಳಿಯಂತಹ ಏರಿಯಾಗಳಲ್ಲಿ ಬಾಡಿಗೆ ದರಗಳು ಬೆಂಗಳೂರಿನ ಎಲ್ಲ ದರಗಳಿಗಿಂತ ಹೆಚ್ಚಾಗಿದೆ ಎಂದು ತಿಳಿದುಬಂದಿದೆ.
ಮ್ಯಾಜಿಕ್‌ಬ್ರಿಕ್ಸ್‌ನ ವರದಿಯ ಪ್ರಕಾರ, 13 ಪ್ರಮುಖ ಭಾರತೀಯ ನಗರಗಳಲ್ಲಿನ ಬಾಡಿಗೆ ಬೆಲೆಗಳು ಮಾರ್ಚ್ ತ್ರೈಮಾಸಿಕದಲ್ಲಿ ವರ್ಷದಿಂದ ವರ್ಷಕ್ಕೆ 16% ರಷ್ಟು ಏರಿಕೆಯಾಗಿದೆ. ಹಲವಾರು ಟೆಕ್ಕಿಗಳು ಮತ್ತು ಕಾರ್ಪೊರೇಟ್ ಉದ್ಯೋಗಿಗಳಿಗೆ ಗ್ರೇಟರ್ ನೋಯ್ಡಾ ಉದಯೋನ್ಮುಖ ನೆಲೆಯಾಗಿದೆ, ಬಾಡಿಗೆಗಳು 32.1% ರಷ್ಟು ಹೆಚ್ಚಿದ್ದರೆ, ಗುರುಗ್ರಾಮ್ ಮತ್ತು ಬೆಂಗಳೂರಿನಲ್ಲಿ ಕ್ರಮವಾಗಿ 24.5% ಮತ್ತು 23.7% ರಷ್ಟು ಏರಿಕೆ ಕಂಡುಬಂದಿದೆ. ಅಕ್ಟೋಬರ್ ಮತ್ತು ಡಿಸೆಂಬರ್ 2023ರ ನಡುವೆ 1.6% ಹೆಚ್ಚಳದ ನಂತರ ಜನವರಿ-ಮಾರ್ಚ್ ಅವಧಿಯಲ್ಲಿ ಬಾಡಿಗೆಗಳು 2.8% ರಷ್ಟು ಹೆಚ್ಚಾಗಿದೆ ಎಂದು ವರದಿಯಲ್ಲಿ ತಿಳಿಸಿದೆ.
ಎರಡು ಕೋಟಿಗೂ ಹೆಚ್ಚು ಗ್ರಾಹಕರ ಆದ್ಯತೆಯ ಆಧಾರದ ಮೇಲೆ ತಿಂಗಳಿಗೆ ₹10,000 ರಿಂದ ₹30,000 ವರೆಗಿನ ಬಾಡಿಗೆ ವಸತಿಗಳಿಗೆ ಹೆಚ್ಚು ಬೇಡಿಕೆಯಿದೆ. ಒಟ್ಟು ಬೇಡಿಕೆಯ 42% ರಷ್ಟಿದೆ ಎಂದಿದೆ. ಈ ಅವಧಿಯಲ್ಲಿ ಬಾಡಿಗೆ ಬೇಡಿಕೆಯು ಗಮನಾರ್ಹವಾದ ಶೇ.16ರಷ್ಟು ತ್ರೈಮಾಸಿಕದಿಂದ ತ್ರೈಮಾಸಿಕಕ್ಕೆ ಹೆಚ್ಚಳವಾಗಿದೆ.
ಚೆನ್ನೈನಲ್ಲಿ ಬಾಡಿಗೆ ಬೇಡಿಕೆಯು ಮಾರ್ಚ್ ತ್ರೈಮಾಸಿಕದಲ್ಲಿ ಸುಮಾರು 25% ಹೆಚ್ಚಾದರೆ, ನವಿ ಮುಂಬೈ ಮತ್ತು ನೋಯ್ಡಾದಲ್ಲಿ ಕ್ರಮವಾಗಿ 20.1% ಮತ್ತು 19.2% ರಷ್ಟು ಏರಿಕೆಯಾಗಿದೆ ಎಂದು ವರದಿ ಹೇಳಿದೆ. ವರ್ಷದಿಂದ ವರ್ಷಕ್ಕೆ ಬಾಡಿಗೆ ಬೇಡಿಕೆ ಏರಿಕೆಯಾಗಿದೆ.
ಬೆಂಗಳೂರಿನಲ್ಲಿ ಕಳೆದ ಮೂರು ತಿಂಗಳ ಅವಧಿಯಲ್ಲಿ ಬಾಡಿಗೆ ದರವನ್ನು ಶೇ.8 ರಷ್ಟು ಹೆಚ್ಚಳ ಮಾಡಲಾಗಿದೆ. ಹೈ-ಫೈ ಏರಿಯಾಗಳಲ್ಲಿ ಬಾಡಿಗೆ ದರವನ್ನು ಸಾಮಾನ್ಯ ಜನರು ಕೇಳದಂತಾಗಿದೆ. ಕೋವಿಡ್ ಅವಧಿಯಲ್ಲಿ 2022ರ ಅಂತ್ಯದ ವೇಳೆ ವೈಟ್‌ಫೀಲ್ಡ್‌ನಲ್ಲಿ 2 ಬಿಎಚ್‌ಕೆ ಮನೆ ದರ ₹22,500 ಇತ್ತು. ಇನ್ನು ಸರ್ಜಾಪುರ ರಸ್ತೆಯಲ್ಲಿ ₹24,000 ಇತ್ತು. 2023ರ ಅಂತ್ಯದ ವೇಳೆಗೆ ವೈಟ್‌ಫೀಲ್ಡ್‌ನಲ್ಲಿ ₹30,200 ಮತ್ತು ಸರ್ಜಾಪುರ ರಸ್ತೆಯಲ್ಲಿ ₹31,600 ಗಮನಾರ್ಹವಾಗಿ ಏರಿಕೆ ಕಂಡಿದೆ.
“2020ರ ಮೊದಲು, ಭಾರತದಲ್ಲಿ ವಸತಿ ಬಾಡಿಗೆ ಸರಾಸರಿ ಶೇ.3 ರಷ್ಟು ಹೆಚ್ಚಳವಾಗಿತ್ತು. 2022ರ ನಂತರ ಕೊರೊನಾ ಸೋಂಕು ಇಳಿಕೆಯ ನಂತರ ಕಚೇರಿಗಳ ಪುನಾರಂಭವಾದವು. ಈ ವೇಳೆ, ಬಾಡಿಗೆ ಬೇಡಿಕೆಯಲ್ಲಿ ಗಮನಾರ್ಹ ಏರಿಕೆಯನ್ನು ಕಂಡಿದೆ. ಇದರ ಪರಿಣಾಮವಾಗಿ ಬಾಡಿಗೆಗಳ ದರ ಹೆಚ್ಚಳವಾಗುತ್ತಿದೆ” ಎಂದು ಮ್ಯಾಜಿಕ್‌ಬ್ರಿಕ್ಸ್‌ನ ಸಂಶೋಧನಾ ಮುಖ್ಯಸ್ಥ ಅಭಿಷೇಕ್ ಭದ್ರ ಹೇಳಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಬೆಂಗಳೂರು | ಬುಧವಾರ ಸಂಜೆ ಸರಾಸರಿ 17.9 ಮಿ.ಮೀ ಮಳೆ
“ಬಾಡಿಗೆ ಮೇಲಿನ ಈ ಪ್ರವೃತ್ತಿಯು ಮುಂದಿನ ಕೆಲವು ತಿಂಗಳು ಮುಂದುವರಿಯುತ್ತದೆ. ಅದರಲ್ಲೂ ವಿಶೇಷವಾಗಿ ಹಣಕಾಸಿನ ವರ್ಷದ ಮೊದಲ ಎರಡು ತ್ರೈಮಾಸಿಕಗಳಲ್ಲಿ ಬಾಡಿಗೆ ಚಟುವಟಿಕೆಯು ಗರಿಷ್ಠ ಮಟ್ಟದಲ್ಲಿರುತ್ತದೆ. ಬೆಂಗಳೂರು, ಗುರುಗ್ರಾಮ್, ಹೈದರಾಬಾದ್ ಹಾಗೂ ನೋಯ್ಡಾದಂತಹ ವಸತಿ ಮತ್ತು ಐಟಿ ಕೇಂದ್ರಗಳು ನಿರೀಕ್ಷೆಗಳಿಗೆ ಅನುಗುಣವಾಗಿ ತಮ್ಮ ಬಾಡಿಗೆಯಲ್ಲಿ ಗಮನಾರ್ಹ ಹೆಚ್ಚಳವನ್ನು ಕಂಡಿವೆ” ಎಂದಿದ್ದಾರೆ.
