ಕರ್ನಾಟಕದ 240 ತಾಲೂಕುಗಳ ಪೈಕಿ 141 ತಾಲೂಕುಗಳು ಎಲ್ ನಿನೊ ಪರಿಣಾಮದಿಂದ ಮಳೆ ಅಭಾವಕ್ಕೆ ತುತ್ತಾಗಿವೆ. ಖಾರಿಫ್ ಬಿತ್ತನೆಯ ಪ್ರಮಾಣದಲ್ಲಿ ಗಣನೀಯ ಇಳಿಕೆಯಾಗಿದ್ದು, ಹಲವೆಡೆ ಬರಗಾಲದ ಛಾಯೆ ಆವರಿಸಿದೆ.
ಎಲ್ ನಿನೊ ಕಾರಣದಿಂದ 2026ರ ನೈಋತ್ಯ ಮಾನ್ಸೂನ್ ಋತುವಿನಲ್ಲಿ ಸಾಮಾನ್ಯಕ್ಕಿಂತ ಕಡಿಮೆ ಮಳೆಯಾಗುವ ಸಾಧ್ಯತೆಯನ್ನು ಈ ಮೊದಲೇ ಹವಾಮಾನ ಇಲಾಖೆ ಅಂದಾಜಿಸಿತ್ತು. ಜುಲೈ 11, 2026ರ ಅವಧಿಯೊಳಗೆ ಕರ್ನಾಟಕದಲ್ಲಿ 292 ಮಿಮೀ ವಾಡಿಕೆ ಪ್ರಮಾಣದ ಬದಲು ಕೇವಲ 203 ಮಿಮೀ ಮಳೆ ಮಾತ್ರ ದಾಖಲಾಗಿದೆ. ಇದು ಮಾನ್ಸೂನ್ ಕೊರತೆಗೆ ಕಾರಣವಾಗಿದೆ. ರಾಜ್ಯದ 31 ಜಿಲ್ಲೆಗಳ ಪೈಕಿ 18 ಜಿಲ್ಲೆಗಳು ತೀವ್ರ ಮಳೆ ಕೊರತೆಗೆ ತುತ್ತಾಗಿವೆ.
ಇತ್ತೀಚೆಗೆ ಖಾರಿಫ್ ಬಿತ್ತನೆಯ ಪ್ರಮಾಣದಲ್ಲಿ ಅಸಾಧಾರಣ ಇಳಿಕೆ ಕಂಡುಬಂದಿದ್ದು, ದ್ವಿದಳ ಧಾನ್ಯಗಳ ಉತ್ಪಾದನೆಯಲ್ಲಿ ಮುಂಚೂಣಿಯಲ್ಲಿದ್ದ ರಾಜ್ಯದಲ್ಲಿ ಈ ಬಾರಿ ಭಾಗಶಃ ಪ್ರಮಾಣದ ಬಿತ್ತನೆಯೂ ನಡೆದಿಲ್ಲ. ಜುಲೈ ಮೊದಲ ವಾರದಲ್ಲಿ 84.10 ಲಕ್ಷ ಹೆಕ್ಟೇರ್ ಪ್ರದೇಶ ಬಿತ್ತನೆ ಗುರಿ ಇದ್ದೆಡೆ ಕೇವಲ 28.36 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಖಾರಿಫ್ ಬಿತ್ತನೆ ನಡೆದಿದೆ.
ರಾಜ್ಯದ ಬಹುತೇಕ ನೀರಿನ ಮೂಲಗಳನ್ನು ಭರ್ತಿಯಾಗಿಸುತ್ತಿದ್ದ ಮಲೆನಾಡಿನಲ್ಲಿ ಮುಂಗಾರು ಕ್ಷೀಣಿಸಿದ್ದರಿಂದ ಕಾವೇರಿ, ತುಂಗಭದ್ರಾ ಹಾಗೂ ಭದ್ರಾ ಜಲಾನಯನಗಳು ಬತ್ತಿವೆ. ಮಲೆನಾಡಿನಲ್ಲಿ 34% ಮಳೆ ಅಭಾವ ಸೃಷ್ಟಿಯಾಗಿದ್ದು, ಕರಾವಳಿ ಕರ್ನಾಟಕದಲ್ಲಿ 30% ಮಳೆ ಕೊರತೆಯಾಗಿದೆ. ಉತ್ತರ ಒಳನಾಡಿನಲ್ಲಿ 24% ಮತ್ತು ದಕ್ಷಿಣ ಒಳನಾಡಿನಲ್ಲಿ 18% ಮಳೆಯ ಅಭಾವ ಉಂಟಾಗಿದೆ.
