ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಇಸ್ರೇಲ್‌ಗೆ $2.8 ಬಿಲಿಯನ್‌ (ಸುಮಾರು ₹25,000 ಕೋಟಿ) ಮೌಲ್ಯದ ಶಸ್ತ್ರಾಸ್ತ್ರಗಳ ಪ್ಯಾಕೇಜ್‌ ನೀಡಲು ಸಿದ್ಧತೆ ನಡೆಸಿದ್ದಾರೆ. ಇದರಲ್ಲಿ ತಲಾ 2,000 ಪೌಂಡ್‌ (ಸುಮಾರು 900 ಕೆ.ಜಿ.) ತೂಕದ 40,000 ಭಾರಿ ಬಾಂಬ್‌ಗಳು ಸೇರಿವೆ ಎಂದು ಅಮೆರಿಕದ ಅಧಿಕಾರಿಗಳನ್ನು ಉಲ್ಲೇಖಿಸಿ ಅಸೋಸಿಯೇಟೆಡ್‌ ಪ್ರೆಸ್‌ ವರದಿ ಮಾಡಿದೆ.
ಪ್ರಸ್ತಾವಿತ ಪ್ಯಾಕೇಜ್‌ನಲ್ಲಿ 20,000 Mk84 ಬಾಂಬ್‌ಗಳು ಮತ್ತು 20,000 BLU-117 ಬಾಂಬ್‌ಗಳು ಇರಲಿವೆ. ಈ ಒಪ್ಪಂದ ಇನ್ನೂ ಅಂತಿಮಗೊಂಡಿಲ್ಲ. ಆದರೆ ಈ ಕುರಿತು ಅಮೆರಿಕದ ಕಾಂಗ್ರೆಸ್‌ನ ಸಂಬಂಧಿತ ಸಮಿತಿಗಳಿಗೆ ಅನೌಪಚಾರಿಕವಾಗಿ ಮಾಹಿತಿ ನೀಡಲಾಗಿದೆ ಎನ್ನಲಾಗಿದೆ.
ಈ ಬಾಂಬ್‌ಗಳ ಪೂರೈಕೆಯು ಮಹತ್ವ ಪಡೆದಿರುವುದಕ್ಕೆ ಪ್ರಮುಖ ಕಾರಣವೆಂದರೆ, ಗಾಜಾದಲ್ಲಿ ನಾಗರಿಕರ ಭಾರಿ ಸಾವುನೋವಿನ ಆತಂಕದಿಂದ ಬೈಡನ್‌ ಆಡಳಿತ 2024ರಲ್ಲಿ ಇದೇ ವರ್ಗದ ಬಾಂಬ್‌ಗಳ ಒಂದು ಸಾಗಣೆಯನ್ನು ತಡೆಹಿಡಿದಿತ್ತು. ಟ್ರಂಪ್‌ 2025ರಲ್ಲಿ ಅಧಿಕಾರಕ್ಕೆ ಮರಳಿದ ಬಳಿಕ ಆ ನಿರ್ಬಂಧವನ್ನು ತೆರವುಗೊಳಿಸಿದ್ದರು.
ಪ್ರಸ್ತಾವಿತ ಶಸ್ತ್ರಾಸ್ತ್ರಗಳ ಬಹುಪಾಲು ವೆಚ್ಚವನ್ನು Foreign Military Financing (FMF) ಮೂಲಕ ಭರಿಸಲಾಗುತ್ತದೆ. ಈ ವ್ಯವಸ್ಥೆಯಲ್ಲಿ ಅಮೆರಿಕ ಸರ್ಕಾರದ ಹಣವನ್ನು ಇಸ್ರೇಲ್‌ಗೆ ನೀಡಲಾಗುತ್ತದೆ ಮತ್ತು ಆ ಹಣದ ಮೂಲಕ ಅಮೆರಿಕದಿಂದಲೇ ಶಸ್ತ್ರಾಸ್ತ್ರಗಳನ್ನು ಖರೀದಿಸಲಾಗುತ್ತದೆ. ಹೀಗಾಗಿ ಈ ಒಪ್ಪಂದದ ಬಹುಪಾಲು ಹಣ ಅಮೆರಿಕದ ತೆರಿಗೆದಾರರ ಹಣವಾಗಿರಲಿದೆ.
2,000 ಪೌಂಡ್‌ ತೂಕದ ಬಾಂಬ್‌ಗಳು ಅತ್ಯಂತ ವಿನಾಶಕಾರಿ ಶಸ್ತ್ರಾಸ್ತ್ರಗಳಾಗಿದ್ದು, ಕೆಲವು ರೂಪಾಂತರಗಳನ್ನು ಭೂಗತ ಅಥವಾ ಬಲಿಷ್ಠ ಕಟ್ಟಡಗಳಂತಹ ಗುರಿಗಳನ್ನು ಭೇದಿಸಲು ಬಳಸಲಾಗುತ್ತದೆ. ಇವುಗಳನ್ನು ಗಾಜಾ ಮತ್ತು ಲೆಬನಾನ್‌ನಲ್ಲಿ ಇಸ್ರೇಲ್‌ ಬಳಸಿರುವುದಾಗಿ ವರದಿಗಳಿವೆ. ಜನನಿಬಿಡ ಪ್ರದೇಶಗಳಲ್ಲಿ ಇಂತಹ ಶಸ್ತ್ರಾಸ್ತ್ರಗಳ ಬಳಕೆಯ ಬಗ್ಗೆ ಮಾನವೀಯ ಕಳವಳಗಳು ವ್ಯಕ್ತವಾಗಿವೆ.
ಇದನ್ನೂ ಓದಿ: ಅಮೆರಿಕ ಕ್ರೌರ್ಯ
2023ರ ಅಕ್ಟೋಬರ್‌ನಲ್ಲಿ ಹಮಾಸ್‌ ನೇತೃತ್ವದ ದಾಳಿಯಲ್ಲಿ ಇಸ್ರೇಲ್‌ನಲ್ಲಿ ಸುಮಾರು 1,200 ಮಂದಿ ಮೃತಪಟ್ಟಿದ್ದು, 251 ಮಂದಿಯನ್ನು ಒತ್ತೆಯಾಳುಗಳಾಗಿ ಕರೆದೊಯ್ಯಲಾಗಿತ್ತು. ಇದಕ್ಕೆ ಪ್ರತಿಯಾಗಿ ಇಸ್ರೇಲ್‌ ಗಾಜಾದಲ್ಲಿ ನಡೆಸಿದ ಮಿಲಿಟರಿ ಕಾರ್ಯಾಚರಣೆಯಲ್ಲಿ 73,000ಕ್ಕೂ ಹೆಚ್ಚು ಪ್ಯಾಲೆಸ್ತೀನಿಯರು ಮೃತಪಟ್ಟಿದ್ದಾರೆ ಎಂದು ಗಾಜಾ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಈ ಹೊಸ ಶಸ್ತ್ರಾಸ್ತ್ರ ಪ್ಯಾಕೇಜ್‌ ಗಾಜಾದಲ್ಲಿ ಕದನ ವಿರಾಮ ಮುಂದುವರಿದಿದ್ದರೂ ಹಿಂಸಾಚಾರ ಸಂಪೂರ್ಣವಾಗಿ ನಿಲ್ಲದಿರುವ ಸಂದರ್ಭದಲ್ಲಿ ಪ್ರಸ್ತಾಪಗೊಂಡಿದೆ. ಇಸ್ರೇಲ್‌ ಮತ್ತು ಅಮೆರಿಕದ ನಡುವೆ ಕೆಲವು ವಿಚಾರಗಳಲ್ಲಿ ಭಿನ್ನಾಭಿಪ್ರಾಯಗಳಿದ್ದರೂ, ಉಭಯ ದೇಶಗಳ ನಡುವಿನ ಸೇನಾ ಸಹಕಾರ ಮುಂದುವರಿದಿರುವುದು ಅಮೆರಿಕ ನೇತೃತ್ವದಲ್ಲಿ ಇರಾನ್ ಅನ್ನು ನಾಶಗೊಳಿಸಲು ಹೂಡಿರುವ ತಂತ್ರ ಎಂಬ ವಿಶ್ಲೇಷಣೆಗಳು ಗರಿಗೆದರಿವೆ.
