ಬ್ರೆಜಿಲ್‌ನ ಮಾಜಿ ಅಧ್ಯಕ್ಷ ಜೈರ್ ಬೊಲ್ಸೊನಾರೊ ಅವರ ಪುತ್ರ, ಹಾಲಿ ಸೆನೆಟರ್ ಪ್ಲೇವಿಯೋ ಬೊಲ್ಸೊನಾರೊ ಅವರು ದೇಶದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋಲುಂಡಿದ್ದಾರೆ. ಈ ಬೆನ್ನಲ್ಲೆ, ಬ್ರೆಜಿಲ್ ತೊರೆದು ಅಮೆರಿಕಗೆ ಪಲಾಯನಾ ಮಾಡಿದ್ದಾರೆ. ಅಮೆರಿಕದಲ್ಲಿ ರಾಜಕೀಯ ರಕ್ಷಣೆ ಪಡೆಯಲಿದ್ದಾರೆ ಎಂದು ವರದಿಯಾಗಿದೆ.
ಪ್ಲೇವಿಯೋ ಬೊಲ್ಸೊನಾರೊ ವಿರುದ್ಧ ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಯುತ್ತಿತ್ತು. ಬೃಹತ್ ಪ್ರಮಾಣದ ಆರ್ಥಿಕ ಸಂಪನ್ಮೂಲ ಹೊಂದಿರುವ ಬೊಲ್ಸೊನಾರೊ ದೇಶ ಬಿಟ್ಟು ಓಡಿಹೋಗುವ ಸಾಧ್ಯತೆಯಿದೆ ಎಂದು ಕಳವಳ ವ್ಯಕ್ತಪಡಿಸಿದ್ದ ಸುಪ್ರೀಂ ಕೋರ್ಟ್, ಅವರ ಪಾಸ್‌ಪೋರ್ಟ್‌ಗಳನ್ನು ರದ್ದುಗೊಳಿಸಿತ್ತು. 24 ಗಂಟೆಗಳ ಒಳಗಾಗಿ ತಮ್ಮ ಪಾಸ್‌ಪೋರ್ಟ್‌ಗಳನ್ನು ಒಪ್ಪಿಸುವಂತೆ ಆದೇಶಿಸಿತ್ತು. ಸುಪ್ರೀಂ ಕೋರ್ಟ್‌ನ ಈ ಕಟ್ಟುನಿಟ್ಟಿನ ಆದೇಶವನ್ನು ಉಲ್ಲಂಘಿಸಿ ಅವರು ದೇಶ ಬಿಟ್ಟು ಪಲಾಯನ ಮಾಡಿದ್ದಾರೆ.
ಪ್ರಸ್ತುತ ಪ್ಲೇವಿಯೋ ತಮ್ಮ ಪತ್ನಿ ಹಾಗೂ ಇಬ್ಬರು ಪುತ್ರಿಯರೊಂದಿಗೆ ಅಮೆರಿಕ ತಲುಪಿದ್ದು, ಮೈಯಾಮಿ ಅಥವಾ ಫ್ಲೋರಿಡಾದಲ್ಲಿ ತಂಗಿದ್ದಾರೆ ಎನ್ನಲಾಗಿದೆ. ಈ ನಡುವೆ, ಅಮೆರಿಕ ವಿದೇಶಾಂಗ ಇಲಾಖೆಯು ಪ್ಲೇವಿಯೋ ಮತ್ತು ಅವರ ಕುಟುಂಬಕ್ಕೆ ದೇಶ ಪ್ರವೇಶಿಸಲು ವೀಸಾ ನೀಡಲು ನಿರ್ಧರಿಸಿದೆ ಎಂದು ಹಿರಿಯ ಅಮೆರಿಕನ್ ಅಧಿಕಾರಿಯೊಬ್ಬರು ಖಚಿತಪಡಿಸಿದ್ದಾರೆ. ಬೊಲ್ಸೊನಾರೊ ಪಲಾಯನ ಮತ್ತು ಅಮರಿಕ ನಿರ್ಧಾರವು ಅಂತರರಾಷ್ಟ್ರೀಯ ಮಟ್ಟದಲ್ಲಿ ರಾಜಕೀಯ ಬಿಕ್ಕಟ್ಟಿಗೆ ಕಾರಣವಾಗಿದೆ. ಉಭಯ ರಾಷ್ಟ್ರಗಳ ಸಂಬಂಧ ಮತ್ತಷ್ಟು ಹದಗೆಡುವ ಸಾಧ್ಯತೆಗಳಿವೆ.
ಪ್ಲೇವಿಯೋ ಅವರ ಪಲಾಯನವನ್ನು ಬ್ರೆಜಿಲ್ ಅಧ್ಯಕ್ಷ ಲುಲಾ ತೀವ್ರವಾಗಿ ಖಂಡಿಸಿದ್ದು, ಇದು ಅತ್ಯಂತ ಹೇಡಿತನದ ನಡೆ ಎಂದು ಬಣ್ಣಿಸಿದ್ದಾರೆ. ದೇಶದಲ್ಲೇ ಉಳಿದು ತಮ್ಮ ಮೇಲಿನ ಆರೋಪಗಳನ್ನು ಸುಳ್ಳೆಂದು ಸಾಬೀತುಪಡಿಸುವ ಧೈರ್ಯ ತೋರಬೇಕಿತ್ತು ಎಂದಿದ್ದಾರೆ.
ಇತ್ತೀಚೆಗೆ ನಡೆದ ಚುನಾವಣೆಯಲ್ಲಿ ಎಡಪಂಥೀಯ ನಾಯಕ, ಹಾಲಿ ಅಧ್ಯಕ್ಷ ಲೂಯಿಜ್ ಇನಾಸಿಯೊ ಲುಲಾ ಡ ಸಿಲ್ವಾ ವಿರುದ್ಧ ಬಲಪಂಥೀಯ ನಾಯಕನಾಗಿರುವ ಪ್ಲೇವಿಯೋ ಬೊಲ್ಸೊನಾರೊ ಸ್ಪರ್ಧಿಸಿದ್ದರು. ಮೊದಲ ಹಂತದ ಮತದಾನದಲ್ಲಿ ಪ್ಲೇವಿಯೋ ಮುನ್ನಡೆ ಸಾಧಿಸಿದ್ದರು. ಆದರೆ, ಎರಡನೇ ಹಂತದ ಚುನಾವಣೆ ವೇಳೆಗೆ ವಿದ್ಯಾರ್ಥಿ ಮತ್ತು ನಾಗರಿಕ ಸಂಘಟನೆಗಳು ದೇಶಾದ್ಯಂತ ಬೃಹತ್ ಅಭಿಯಾನ ನಡೆಸಿ, ಫ್ಲೇವಿಯೋ ಗೆಲುವಿನಿಂದ ಆಗುವ ಅಪಾಯದ ಕುರಿತು ಮತದಾರರಲ್ಲಿ ಅರಿವು ಮೂಡಿಸಿದ್ದರು. ಪರಿಣಾಮ, ಎರಡನೇ ಹಂತದ ಮತದಾನದ ವೇಳೆಗೆ ಎಚ್ಚೆತ್ತ ಮತದಾರರು ಫ್ಲೇವಿಯೋ ವಿರುದ್ಧ ಮತ್ತು ಲುಲಾ ಪರವಾಗಿ ಮತ ಚಲಾಯಿಸಿದ್ದರು. ಅಂತಿಮ ಫಲಿತಾಂಶದಲ್ಲಿ ಲುಲಾ ಗೆಲುವು ಸಾಧಿಸಿ, ಅಧ್ಯಕ್ಷ ಸ್ಥಾನವನ್ನು ಉಳಿಸಿಕೊಂಡಿದ್ದಾರೆ.
ಅಂದಹಾಗೆ, ಈ ಹಿಂದೆ 2022ರ ಚುನಾವಣೆಯಲ್ಲಿ ಲುಲಾ ವಿರುದ್ಧ ಸೋತಿದ್ದ ಪ್ಲೇವಿಯೋ ಅವರ ತಂದೆ ಜೈರ್ ಬೊಲ್ಸೊನಾರೊ ಕೂಡ ಇದೇ ರೀತಿ ಅಮೆರಿಕಕ್ಕೆ ಪಲಾಯನ ಮಾಡಿದ್ದರು. ನಂತರ ಬ್ರೆಜಿಲ್‌ಗೆ ಮರಳಿದ್ದ ಜೈರ್ ಬೊಲ್ಸೊನಾರೊ ಅವರಿಗೆ ಸರ್ಕಾರಿ ಕಟ್ಟಡಗಳ ಮೇಲಿನ ದಾಳಿ ಮತ್ತು ದಂಗೆಗೆ ಸಂಚು ರೂಪಿಸಿದ ಆರೋಪದಡಿಯಲ್ಲಿ 27 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ. ಪ್ರಸ್ತುತ, ಜೈರ್ ಬೊಲ್ಸೊನಾರೊ ಜೈಲಿನಲ್ಲಿದ್ದಾರೆ. ಈಗ ಮಗನೂ ತಂದೆಯ ಹಾದಿಯನ್ನೇ ಹಿಡಿದಿದ್ದು, ಅಮೆರಿಕಗೆ ಪಲಾಯನ ಮಾಡಿದ್ದಾರೆ
