ನಾರ್ವೇಜಿಯನ್ ನೊಬೆಲ್ ಸಮಿತಿಯು ಈ ಸಾಲಿನ ಪ್ರತಿಷ್ಠಿತ ‘ನೊಬೆಲ್ ಶಾಂತಿ ಪ್ರಶಸ್ತಿ’ಯನ್ನು ಶುಕ್ರವಾರ ಪ್ರಕಟಿಸಲಿರುವ ಬೆನ್ನಲ್ಲೇ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಪ್ರಶಸ್ತಿಯ ಮೇಲೆ ಮತ್ತೆ ಕಣ್ಣಿಟ್ಟಿದ್ದಾರೆ. “ನಾನು ಜಗತ್ತಿನ ಎಂಟು ಯುದ್ಧಗಳನ್ನು ಅಂತ್ಯಗೊಳಿಸಿದ್ದು, ಬೇರೆ ಯಾರಿಗಿಂತಲೂ ನಾನೇ ಈ ಪ್ರಶಸ್ತಿಗೆ ಹೆಚ್ಚು ಅರ್ಹ,” ಎಂದು ಅವರು ಪ್ರತಿಪಾದಿಸಿದ್ದಾರೆ.
ಬುಧವಾರ ಶ್ವೇತಭವನದ ಓವಲ್ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು ತಮ್ಮ ಸಾಧನೆಗಳನ್ನು ಕೊಂಡಾಡಿಕೊಂಡರು. “ಇದುವರೆಗೆ ಯಾರೂ ಮಾಡದಂತಹ ಕೆಲಸಗಳನ್ನು ನಾನು ಮಾಡಿದ್ದೇನೆ. ನಾನು ಕೊಚ್ಚಿಕೊಳ್ಳುತ್ತಿಲ್ಲ, ಕೇವಲ ವಾಸ್ತವವನ್ನು ನಿಮ್ಮ ಮುಂದಿಡುತ್ತಿದ್ದೇನೆ. ಬಹುಶಃ ಬೇರೆ ಯಾವುದೇ ಅಧ್ಯಕ್ಷರು ಯುದ್ಧಗಳನ್ನು ಬಗೆಹರಿಸಿಲ್ಲ. ಆದರೆ, ನಾನು ಎಂಟು ಯುದ್ಧಗಳನ್ನು ಅಂತ್ಯಗೊಳಿಸಿದ್ದೇನೆ,” ಎಂದು ಟ್ರಂಪ್ ಹೇಳಿಕೊಂಡಿದ್ದಾರೆ.
ತಮಗೆ ಪ್ರಶಸ್ತಿ ನೀಡದಿದ್ದರೆ ಅದು ನೊಬೆಲ್ ಸಮಿತಿಗೆ ಮಾಡುವ ದೊಡ್ಡ ಅಪಮಾನವಾಗಲಿದೆ ಎಂದಿರುವ ಟ್ರಂಪ್, “ನನ್ನಂತಹವರಿಗೆ ಪ್ರಶಸ್ತಿ ನೀಡದಿರುವ ಇತಿಹಾಸ ಆ ಸಮಿತಿಗಿರಬಹುದು. ಆದರೆ, ನನಗೆ ಪ್ರಶಸ್ತಿ ಸಿಗಲಿ ಅಥವಾ ಬಿಡಲಿ, ನಾನು ಅವರಿಗಿಂತ (ಇತರರಿಗಿಂತ) ಹೆಚ್ಚಿನದನ್ನು ಸಾಧಿಸಿದ್ದೇನೆ. ಎಂಟು ಯುದ್ಧಗಳನ್ನು ಬಗೆಹರಿಸಿರುವಾಗಲೂ ಪ್ರಶಸ್ತಿ ನೀಡದಿರುವುದು ಸಮಿತಿಯ ವಿಶ್ವಾಸಾರ್ಹತೆಗೆ ಧಕ್ಕೆ ತರಲಿದೆ,” ಎಂದರು. ಅಲ್ಲದೆ, ತಮ್ಮ ಶಾಂತಿ ಸ್ಥಾಪನೆಯ ಪ್ರಯತ್ನಗಳು ಮುಂದುವರಿದಿದ್ದು, ಕಳೆದ ಎಂಟು ತಿಂಗಳಿಂದ ನಡೆಯುತ್ತಿರುವ ಅಮೆರಿಕ-ಇರಾನ್ ಯುದ್ಧವನ್ನು ಶೀಘ್ರದಲ್ಲೇ ಬಗೆಹರಿಸುವ ಸುಳಿವು ನೀಡಿದರು.
ಇದೇ ವೇಳೆ, 2009ರಲ್ಲಿ ನೊಬೆಲ್ ಶಾಂತಿ ಪ್ರಶಸ್ತಿ ಪಡೆದಿದ್ದ ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಅವರನ್ನು ಟ್ರಂಪ್ ತೀವ್ರವಾಗಿ ಟೀಕಿಸಿದರು. “ಒಬಾಮಾ ಅವರಿಗೆ ನೊಬೆಲ್ ಪ್ರಶಸ್ತಿ ಸಿಕ್ಕಿತು, ಆದರೆ ಅವರು ಯಾವುದೇ ಸಾಧನೆ ಮಾಡಿರಲಿಲ್ಲ. ಅಧ್ಯಕ್ಷರಾಗಿ ಆಯ್ಕೆಯಾದ ಆರಂಭದಲ್ಲೇ ಅವರಿಗೆ ಆ ಪ್ರಶಸ್ತಿ ನೀಡಲಾಯಿತು. ಆ ಪ್ರಶಸ್ತಿ ತಮಗೆ ಏಕೆ ಸಿಕ್ಕಿತು ಎಂಬುದು ಅವರಿಗೇ ಇಂದಿಗೂ ತಿಳಿದಿಲ್ಲ,” ಎಂದು ಲೇವಡಿ ಮಾಡಿದರು.
ಕಳೆದ ವರ್ಷದ ನೊಬೆಲ್ ಶಾಂತಿ ಪ್ರಶಸ್ತಿ ಪುರಸ್ಕೃತೆಯಾದ ವೆನೆಜುವೆಲಾದ ಮರಿಯಾ ಕೊರಿನಾ ಮಚಾಡೊ ಅವರು ತಮ್ಮ ಪ್ರಶಸ್ತಿಯನ್ನು ತಮಗೆ (ಟ್ರಂಪ್‌ಗೆ) ಹಸ್ತಾಂತರಿಸಿದ್ದರು ಎಂದು ಇದೇ ವೇಳೆ ಟ್ರಂಪ್ ನೆನಪಿಸಿಕೊಂಡರು. “ಆ ಅದ್ಭುತ ಮಹಿಳೆ ತಮಗಿಂತ ನಾನೇ ಈ ಪ್ರಶಸ್ತಿಗೆ ಹೆಚ್ಚು ಅರ್ಹ ಎಂದು ಹೇಳಿದ್ದರು. ಇತಿಹಾಸದಲ್ಲಿ ಅಧ್ಯಕ್ಷ ಟ್ರಂಪ್ ಅವರಿಗಿಂತ ಬೇರೆ ಯಾರೂ ಈ ಪ್ರಶಸ್ತಿಗೆ ಅರ್ಹರಲ್ಲ ಎಂಬುದು ಅವರ ಮಾತಾಗಿತ್ತು,” ಎಂದರು.
ಅಲ್ಲದೆ, ಕಳೆದ ಒಂದು ವರ್ಷದಲ್ಲಿ ತಾವು ಎಂಟು ಯುದ್ಧಗಳನ್ನು ಬಗೆಹರಿಸಿರುವುದರ ಜೊತೆಗೆ, ಒತ್ತೆಯಾಳುಗಳನ್ನು ಸುರಕ್ಷಿತವಾಗಿ ಕರೆತಂದಿದ್ದೇನೆ ಎಂದು ಟ್ರಂಪ್ ಹೇಳಿದ್ದಾರೆ. ಆಮದು ಸುಂಕಗಳನ್ನು (Tariffs) ಒಂದು ಅಸ್ತ್ರವಾಗಿ ಬಳಸುವ ಮೂಲಕ ಹಲವು ದೇಶಗಳು ಯುದ್ಧಕ್ಕೆ ಇಳಿಯುವುದನ್ನು ತಪ್ಪಿಸಿ, ಸಾವು-ನೋವುಗಳನ್ನು ತಡೆದಿದ್ದೇನೆ ಎಂದು ಅವರು ತಮ್ಮ ಕಾರ್ಯವನ್ನು ಸಮರ್ಥಿಸಿಕೊಂಡಿದ್ದಾರೆ.
