ಯುದ್ಧವನ್ನು ಕೊನೆಗೊಳಿಸುವ ಒಪ್ಪಂದಕ್ಕೆ ಇರಾನ್ ಭಾನುವಾರವೇ ಸಹಿ ಹಾಕಬಹುದು. ಒಪ್ಪಂದ ಜಾರಿಗೆ ಬಂದ ತಕ್ಷಣ ಹಾರ್ಮುಜ್ ಜಲಸಂಧಿಯು ಎಲ್ಲ ಹಡಗುಗಳ ಸಂಚಾರಕ್ಕೆ ಮುಕ್ತವಾಗಲಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರ ಹೇಳಿದ್ದಾರೆ. ಆದಾಗ್ಯೂ, ಈ ಸಮಯದ ಗಡವನ್ನು ಇರಾನ್ ವಿದೇಶಾಂಗ ಸಚಿವಾಲಯ ತಿರಸ್ಕರಿಸಿದೆ. ಆದರೂ, ಮುಂಬರುವ ದಿನಗಳಲ್ಲಿ ಒಪ್ಪಂದ ನಡೆಯುವ ಸಾಧ್ಯತೆಗಳಿವೆ ಎಂದು ಹೇಳಿದೆ. ಇನ್ನು, ಈ ಒಪ್ಪಂದವನ್ನು ‘ಟ್ರಂಪ್ ಅವರ ಸಂಪೂರ್ಣ ಶರಣಾಗತಿ’ ಎಂದು ಅಮೆರಿಕದ ಡೆಮಾಕ್ರಾಟ್ ಸಂಸದರು ಟೀಕಿಸಿದ್ದಾರೆ.
‘ಕದನ ವಿರಾಮ ಒಪ್ಪಂದವು ಲೆಬನಾನ್‌ಗೂ ವಿಸ್ತರಿಸಬೇಕು. ಲೆಬನಾನ್ ಮೇಲಿನ ಇಸ್ರೇಲ್ ಕ್ರೌರ್ಯವು ಕೊನೆಗೊಳ್ಳುವವರೆಗೂ ಅಮೆರಿಕದೊಂದಿಗೆ ಕದನ ವಿರಾಮದ ಒಪ್ಪಂದ ಮಾಡಿಕೊಳ್ಳುವ ಮಾತೇ ಇಲ್ಲ’ವೆಂದು ಇರಾನ್ ಸ್ಪಷ್ಟವಾಗಿ ಹೇಳಿದೆ. ಅಮೆರಿಕದ ಮಾತಿಗೂ ಬಗ್ಗದ ಇಸ್ರೇಲ್, ಲೆಬನಾನ್ ಮೇಲೆ ದಾಳಿ ನಡೆಸುತ್ತಿದೆ. ಇದರ ನಡುವೆಯೂ ಅಮೆರಿಕ-ಇರಾನ್ ನಡುವೆ ಮಾತುಕತಗಳು ನಡೆಯುತ್ತಿವೆ.
ಈ ನಿರೀಕ್ಷಿತ ಒಪ್ಪಂದವನ್ನು ಟ್ರಂಪ್ ಅವರು ದೊಡ್ಡ ಮಟ್ಟದಲ್ಲಿ ಬಿಂಬಿಸುತ್ತಿದ್ದಾರೆ. ಜಗತ್ತಿನ ಬಹುಪಾಲು ತೈಲ ಮತ್ತು ಅನಿಲ ಸಾಗಣೆಯ ಮಾರ್ಗವಾಗಿರುವ ಹಾರ್ಮುಜ್ ಜಲಸಂಧಿಯು ಒಪ್ಪಂದಕ್ಕೆ ಸಹಿ ಬಿದ್ದ ತಕ್ಷಣ ಮುಕ್ತವಾಗಲಿದೆ. ಅಮೆರಿಕವು ಅಂತಿಮವಾಗಿ ಇರಾನ್‌ನ ಸಮೃದ್ಧ ಯುರೇನಿಯಂ ದಾಸ್ತಾನನ್ನು ತನ್ನ ವಶಕ್ಕೆ ಪಡೆಯಲಿದೆ ಎಂದು ಟ್ರಂಪ್ ಹೇಳಿಕೊಳ್ಳುತ್ತಿದ್ದಾರೆ.
ಈ ಲೇಖನ ಓದಿದ್ದೀರಾ?: ರಾಮಮಂದಿರ ದೇಣಿಗೆ ದುರುಪಯೋಗ: ಬಿಜೆಪಿಯ ಬ್ರಿಜ್ ಭೂಷಣ್ ಆರೋಪಗಳ ಸುತ್ತ
ಆದರೆ, ಇರಾನ್ ವಿದೇಶಾಂಗ ಸಚಿವಾಲಯವು ಟ್ರಂಪ್ ಹೇಳಿಕೆಗಳನ್ನು ಸಾರಾಸಗಟಾಗಿ ತಿಸ್ಕರಿಸಿದೆ. ಒಪ್ಪಂದವು ಶೀಘ್ರವೇ ನಡೆಯಬಹುದು ಎಂಬುದನ್ನು ಅಧಿಕಾರಿಗಳು ಒಪ್ಪಿಕೊಂಡಿದ್ದರೂ, ಭಾನುವಾರವೇ ಸಹಿ ಹಾಕಬೇಕೆಂಬ ಟ್ರಂಪ್ ಅವರ ಒತ್ತಾಯವನ್ನು ತಳ್ಳಿಹಾಕಿದ್ದಾರೆ. ಬದಲಿಗೆ, ಮುಂಬರುವ ದಿನಗಳಲ್ಲಿ ಸಹಿ ಪ್ರಕ್ರಿಯೆ ನಡೆಯಬಹುದು ಎಂದಿದ್ದಾರೆ.
ಈ ಒಪ್ಪಂದದ ಬಗ್ಗೆ ಅಮೆರಿಕದ ಡೆಮಾಕ್ರಾಟ್ ಸಂಸದರು ಸಂಶಯ ವ್ಯಕ್ತಪಡಿಸಿದ್ದಾರೆ. “ಇದು ಅತ್ಯಂತ ಕೆಟ್ಟ ಒಪ್ಪಂದ. ಇದು ಮೂಲತಃ ಡೊನಾಲ್ಡ್ ಟ್ರಂಪ್ ಅವರು ಇರಾನ್‌ನ ಸರ್ವೋಚ್ಚ ನಾಯಕನಿಗೆ ಬರೆದುಕೊಟ್ಟಿರುವ ಶರಣಾಗತಿಯ ಪತ್ರವಾಗಿದೆ” ಎಂದು ಡೆಮಾಕ್ರಾಟ್ ಸಂಸದ ಸೆತ್ ಮೌಲ್ಟನ್ ಟೀಕಿಸಿದ್ದಾರೆ.
