ನ್ಯಾಟೋ ಒಕ್ಕೂಟದೊಂದಿಗಿನ ಅಮೆರಿಕವು ಏಕಪಕ್ಷೀಯ ಸಂಬಂಧವನ್ನು ಮುಂದುವರಿಸುವುದು ತೀರಾ ‘ಹಾಸ್ಯಾಸ್ಪದ’ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಜರೆದಿದ್ದಾರೆ. ತಮಗೆ ಆಪತ್ತು ಬಂದಾಗ ಯುರೋಪಿಯನ್ ಮಿತ್ರರಾಷ್ಟ್ರಗಳು ಅಮೆರಿಕದ ಪರವಾಗಿ ನಿಲ್ಲಲಿಲ್ಲ. ಅಮೆರಿಕ-ನ್ಯಾಟೋ ನಡುವಿನ ಸಂಬಂಧವು ಪರಸ್ಪರ ಪೂರಕವಾಗಿಲ್ಲ ಎಂದು ಹೇಳಿದ್ದಾರೆ.
ಟರ್ಕಿಯಲ್ಲಿ ಜುಲೈ 8 ಮತ್ತು 9ರಂದು ನಾಟೋ ಶೃಂಗಸಭೆ ನಡೆಯಲಿದೆ. ಸಭೆಗೆ ವೇದಿಕೆ ಸಜ್ಜಾಗುತ್ತಿರುವ ಸಮಯದಲ್ಲಿಯೇ, ನ್ಯಾಟೋ ವಿರುದ್ಧ ಟ್ರಂಪ್ ಕಿಡಿಕಾರಿದ್ದಾರೆ. ತಮ್ಮ ‘ಟ್ರುತ್ ಸೋಷಿಯಲ್’ನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, “ಅವರು (ನ್ಯಾಟೋ) ನಮಗಾಗಿ ಇರಲೇ ಇಲ್ಲ! ಅಲ್ಲದೆ, ಅಮೆರಿಕ ಮತ್ತು ನಾಟೋ ನಡುವಿನ ಸಂಬಂಧವು ಪರಸ್ಪರ ಪೂರಕವಾಗಿಲ್ಲ. ಅದು ಕೇವಲ ಒಂದು ಕಡೆಯಿಂದ ಮಾತ್ರ ನಡೆಯುತ್ತಿದೆ” ಎಂದು ದೂರಿದ್ದಾರೆ.
ಇರಾನ್ ವಿರುದ್ಧದ ಯುದ್ಧದಲ್ಲಿ ಯುರೋಪಿಯನ್ ರಾಷ್ಟ್ರಗಳು ತಮಗೆ ಬೆಂಬಲ ನೀಡಲಿಲ್ಲವೆಂದು ಪದೇ-ಪದೇ ದೂರುತ್ತಿರುವ ಟ್ರಂಪ್, “ಯುರೋಪ್ ತನ್ನ ಸ್ವಂತ ರಕ್ಷಣೆಯ ಜವಾಬ್ದಾರಿಯನ್ನು ತಾನೇ ವಹಿಸಿಕೊಳ್ಳಬೇಕು” ಎಂದು ಪ್ರತಿಪಾದಿಸುತ್ತಿದ್ದಾರೆ.
ಇದಕ್ಕೆ ಪೂರಕವಾಗಿ ಅಮೆರಿಕವು ಈಗಾಗಲೇ ನಾಟೋ ಒಕ್ಕೂಟಕ್ಕೆ ನೀಡಿದ್ದ ತನ್ನ ರಕ್ಷಣಾ ಬದ್ಧತೆಗಳನ್ನು ಹಂತ ಹಂತವಾಗಿ ಕಡಿಮೆ ಮಾಡಲು ಮುಂದಾಗಿದೆ ಎಂದಿದ್ದಾರೆ.
ಈ ಲೇಖನ ಓದಿದ್ದೀರಾ?: 20 ವರ್ಷ ಗೆಲ್ಲಿಸಿದವರನ್ನೇ ಬಾಂಗ್ಲಾದೇಶಿಗರು ಎಂದರಾ ಎಚ್‌ಡಿಕೆ?
ತಮ್ಮ ಪೋಸ್ಟ್‌ನಲ್ಲಿ ನಾಟೋ ರಾಷ್ಟ್ರಗಳ ರಕ್ಷಣಾ ವೆಚ್ಚದ ಚಾರ್ಟ್ ಒಂದನ್ನು ಲಗತ್ತಿಸಿರುವ ಟ್ರಂಪ್, ಒಕ್ಕೂಟದ ಇತರ ಸದಸ್ಯ ರಾಷ್ಟ್ರಗಳಿಗೆ ಹೋಲಿಸಿದರೆ ಅಮೆರಿಕವು ಅತ್ಯಂತ ಗರಿಷ್ಠ ಪ್ರಮಾಣದ ಬಜೆಟ್ ಅನ್ನು ನಾಟೋ ರಕ್ಷಣೆಗಾಗಿ ವಿನಿಯೋಗಿಸುತ್ತಿದೆ ಎಂಬುದನ್ನು ಸೂಚಿಸಿದ್ದಾರೆ.
1949ರಲ್ಲಿ ಸ್ಥಾಪನೆಯಾದ ನಾಟೋ ಒಕ್ಕೂಟವು ಅಮೆರಿಕ ನೇತೃತ್ವದ ಪ್ರಬಲ ರಕ್ಷಣಾ ಪಡೆಯಾಗಿ ಮಾರ್ಪಟ್ಟಿದೆ. ಇದು ಯುರೋಪ್‌ನಲ್ಲಿ ಸ್ಥಿರತೆಯನ್ನು ಕಾಯ್ದುಕೊಳ್ಳಲು, ಸೋವಿಯತ್ ಒಕ್ಕೂಟದ ಪ್ರಭಾವವನ್ನು ತಡೆಯಲು ಹಾಗೂ ದಶಕಗಳ ಕಾಲ ಜಾಗತಿಕ ಮಟ್ಟದಲ್ಲಿ ಅಮೆರಿಕವನ್ನು ದೊಡ್ಡ ಶಕ್ತಿಯಾಗಿ ಗುರುತಿಸಲು ಪ್ರಮುಖ ಪಾತ್ರ ವಹಿಸಿತ್ತು. ಪ್ರಸ್ತುತ, ಒಟ್ಟು 32 ಸದಸ್ಯ ರಾಷ್ಟ್ರಗಳನ್ನು ಒಳಗೊಂಡಿರುವ ನ್ಯಾಟೋದ ಶೃಂಗಸಭೆಯು ಜುಲೈ 7 ಮತ್ತು 8 ರಂದು ಟರ್ಕಿಯ ರಾಜಧಾನಿ ಅಂಕಾರಾದಲ್ಲಿ ನಡೆಯಲಿದೆ.
