ದಕ್ಷಿಣ ಏಷ್ಯಾದ ಭೌಗೋಳಿಕ ರಾಜಕೀಯ ಮತ್ತು ರಕ್ಷಣಾ ಕ್ಷೇತ್ರದಲ್ಲಿ ಭಾರಿ ಸಂಚಲನ ಮೂಡಿಸಬಲ್ಲ ಪ್ರಮುಖ ಬೆಳವಣಿಗೆಯೊಂದು ನಡೆದಿದೆ. ಪಾಕಿಸ್ತಾನದ ಕಾರ್ಯತಂತ್ರದ ಪ್ರಮುಖ ಕೇಂದ್ರಗಳಾದ ಹರಿಪುರ್, ರಾವಲ್ಪಿಂಡಿ ಅಥವಾ ಐತಿಹಾಸಿಕ ತಕ್ಷಶಿಲಾ (ಟ್ಯಾಕ್ಸಿಲಾ) ಪ್ರದೇಶಗಳಲ್ಲಿ ಅತ್ಯಾಧುನಿಕ, ಮಾರಕ ‘ಆತ್ಮಾಹುತಿ ಡ್ರೋನ್’ (Suicide Drones) ತಯಾರಿಕಾ ಘಟಕವನ್ನು ಸ್ಥಾಪಿಸಲು ವೇದಿಕೆ ಸಜ್ಜಾಗಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪುತ್ರರಾದ ಡೊನಾಲ್ಡ್ ಟ್ರಂಪ್ ಜ್ಯೂನಿಯರ್ ಮತ್ತು ಎರಿಕ್ ಟ್ರಂಪ್ ಅವರ ಮಾಲೀಕತ್ವ ಹಾಗೂ ಒಡೆತನ ಹೊಂದಿರುವ ‘ಏರ್ ಯುಎಸ್‌ಎ’ ಕಂಪನಿಯು ಈ ಬೃಹತ್ ಯೋಜನೆಗೆ ಕೈಹಾಕಿದೆ.
ಈ ಯೋಜನೆಯು ಕೇವಲ ಉದ್ಯಮ ವಿಸ್ತರಣೆಯಷ್ಟೇ ಅಲ್ಲದೆ, ಪಾಕಿಸ್ತಾನ ಮತ್ತು ಅಮೆರಿಕದ ಕೆಲ ಪ್ರಭಾವಿ ವಾಣಿಜ್ಯ ಶಕ್ತಿಗಳ ನಡುವಿನ ಆಳವಾದ ಜಾಲ ಒಪ್ಪಂದವಾಗಿದೆ. ರಾವಲ್ಪಿಂಡಿಯಲ್ಲಿರುವ ಪಾಕಿಸ್ತಾನ ಸೇನಾ ಪ್ರಧಾನ ಕಚೇರಿಯ (GHQ) ಹಿರಿಯ ಅಧಿಕಾರಿಗಳ ಮೂಲಗಳನ್ನು ಉಲ್ಲೇಖಿಸಿ ಬಂದಿರುವ ವರದಿಗಳ ಪ್ರಕಾರ, ಇತ್ತೀಚೆಗೆ ಪಾಕಿಸ್ತಾನ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಜನರಲ್ ಆಸಿಫ್ ಮುನಿರ್ ಮತ್ತು ಟ್ರಂಪ್ ಜ್ಯೂನಿಯರ್ ನಡುವೆ ಈ ಕುರಿತು ಸುದೀರ್ಘ ಹಾಗೂ ಗೌಪ್ಯ ಮಾತುಕತೆಗಳು ನಡೆದಿವೆ.
ಇದನ್ನೂ ಓದಿ: ಪಾಕ್, ಟರ್ಕಿ ಜೊತೆ ಸೌದಿ ಕೈಜೋಡಿಸಿದ್ದೇಕೆ? ಮೆಕ್ಕಾ ಒಪ್ಪಂದದ ಹಿಂದಿನ ಲೆಕ್ಕಾಚಾರವೇನು?
ಈ ಮಾತುಕತೆಯಲ್ಲಿ ಪಾಕಿಸ್ತಾನದ ಸೇನಾ ಭೂಭಾಗದಲ್ಲಿ ಅತ್ಯಾಧುನಿಕ ಯುದ್ಧತಂತ್ರದ ಕಾಮಿಕೇಜ್ (ಆತ್ಮಾಹುತಿ) ಡ್ರೋನ್‌ಗಳನ್ನು ಸ್ಥಳೀಯವಾಗಿಯೇ ಉತ್ಪಾದಿಸುವ ಕುರಿತು ಉಭಯ ನಾಯಕರು ತಾಂತ್ರಿಕ ಸಾಮರ್ಥ್ಯ ಹಾಗೂ ಬಂಡವಾಳ ಹೂಡಿಕೆಯ ನೀಲನಕ್ಷೆಯನ್ನು ಹಂಚಿಕೊಂಡಿದ್ದಾರೆ ಎನ್ನಲಾಗಿದೆ.
ಒಂದೆಡೆ ಪಾಕಿಸ್ತಾನ ಸರ್ಕಾರ ಹಾಗೂ ಪಾಕ್ ಸೇನೆಯು ಜಾಗತಿಕ ಮಟ್ಟದ ಇತರ ಪ್ರಮುಖ ರಕ್ಷಣಾ ಸಂಸ್ಥೆಗಳನ್ನು ಬದಿಗೊತ್ತಿ, ಪ್ರತ್ಯೇಕವಾಗಿ ಟ್ರಂಪ್ ಅವರ ಪುತ್ರರ ಕಂಪನಿಗೆ ಈ ಅವಕಾಶ ನೀಡುತ್ತಿರುವುದು ಜಾಗತಿಕ ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.
ಇದರ ಹಿಂದೆ ಸ್ಪಷ್ಟವಾದ ಕಾರ್ಯತಂತ್ರಗಳಿವೆ ಎಂಬುದೂ ಸದ್ಯ ಗಮನಿಸಬೇಕಾದ ವಿಚಾರ. ಅಮೆರಿಕದ ರಾಜಕೀಯದಲ್ಲಿ ಟ್ರಂಪ್ ಕುಟುಂಬ ಹೊಂದಿರುವ ಪ್ರಭಾವವನ್ನು ಬಳಸಿಕೊಂಡು, ವಾಷಿಂಗ್ಟನ್‌ನಿಂದ ಪಾಕಿಸ್ತಾನಕ್ಕೆ ಸಿಗಬೇಕಾದ ರಕ್ಷಣಾ ನೆರವು ಹಾಗೂ ಆರ್ಥಿಕ ಅನುದಾನಗಳನ್ನು ಸುಲಭಗೊಳಿಸುವುದು. ಅಮೆರಿಕದ ಮಾಜಿ ಅಧ್ಯಕ್ಷರ ಕುಟುಂಬದ ಉದ್ಯಮ ಪಾಕಿಸ್ತಾನದಲ್ಲಿ ಬಂಡವಾಳ ಹೂಡುವುದರಿಂದ, ಪಾಕಿಸ್ತಾನದ ರಕ್ಷಣಾ ವಲಯದಲ್ಲಿ ವಿದೇಶಿ ಹೂಡಿಕೆಗೆ ಹೊಸ ಬಾಗಿಲು ತೆರೆದಂತಾಗುತ್ತದೆ ಎಂಬುದು ಸೇನಾ ಮುಖ್ಯಸ್ಥ ಆಸಿಫ್ ಮುನಿರ್ ಅವರ ತಂತ್ರಗಾರಿಕೆ.
ಈ ಯೋಜಿತ ಡ್ರೋನ್ ಘಟಕಕ್ಕಾಗಿ ಮುಖ್ಯವಾಗಿ ಮೂರು ಸ್ಥಳಗಳನ್ನು ಪರಿಶೀಲಿಸಲಾಗುತ್ತಿದೆ. ಹರಿಪುರ್ ಮತ್ತು ತಕ್ಷಶಿಲಾದಲ್ಲಿ ಪಾಕಿಸ್ತಾನದ ಅತ್ಯಂತ ಸುರಕ್ಷಿತ ರಕ್ಷಣಾ ಸಂಕೀರ್ಣಗಳಾದ ಹೆವಿ ಇಂಡಸ್ಟ್ರೀಸ್ ಟ್ಯಾಕ್ಸಿಲಾ (HIT) ಮತ್ತು ವಾಯುಪಡೆಗೆ ಸಂಬಂಧಿಸಿದ ಪೋಹಾಟ್/ಕಾಮ್ರಾ ಏರೋನಾಟಿಕಲ್ ಕಾಂಪ್ಲೆಕ್ಸ್ ಸಮೀಪದಲ್ಲೇ ಇರುವುದರಿಂದ ತಾಂತ್ರಿಕ ಉಪಕರಣಗಳ ಪೂರೈಕೆ ಸುಲಭವಾಗಲಿದೆ. ರಾವಲ್ಪಿಂಡಿಯಲ್ಲಿ ಸೇನಾ ಪ್ರಧಾನ ಕಚೇರಿಯ ನೇರ ಮೇಲ್ವಿಚಾರಣೆ ಹಾಗೂ ಭದ್ರತೆ ಒದಗಿಸಲು ಇದು ಅತ್ಯಂತ ಸೂಕ್ತವಾದ ಸ್ಥಳವಾಗಿದೆ ಎಂಬ ಲೆಕ್ಕಾಚಾರ ಟ್ರಂಪ್ ಮಕ್ಕಳದ್ದು.
‘ಏರ್ ಯುಎಸ್‌ಎ’ ಉತ್ಪಾದಿಸಲಿರುವ ಈ ಆತ್ಮಾಹುತಿ ಡ್ರೋನ್‌ಗಳು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಗುರಿ ಪತ್ತೆ ವ್ಯವಸ್ಥೆಯನ್ನು ಹೊಂದಿರಲಿವೆ. ಆದಾಗ್ಯೂ, ಈ ಬೆಳವಣಿಗೆಯನ್ನು ನೆರೆಹೊರೆಯ ರಾಷ್ಟ್ರಗಳು ಹಾಗೂ ಜಾಗತಿಕ ಮಾನವ ಹಕ್ಕುಗಳ ಸಂಸ್ಥೆಗಳು ತೀವ್ರ ಕಳವಳ ಉಂಟು ಮಾಡಿದೆ. ದಕ್ಷಿಣ ಏಷ್ಯಾದಲ್ಲಿ ಹೊಸ ಅಸ್ತ್ರ ಪೈಪೋಟಿಗೆ ಇದು ನಾಂದಿ ಹಾಡಬಹುದು ಎಂಬ ಆತಂಕವೂ ಇದೆ.
