ಸಾಹಿತ್ಯ, ಧಾರ್ಮಿಕ, ಸಾಮಾಜಿಕ ಕ್ಷೇತ್ರಗಳಲ್ಲಿ ನಲವತ್ತೆಂಟು ವರ್ಷಗಳ ಕಾಲ ಅವಿರತವಾಗಿ ಸೇವೆ ಸಲ್ಲಿಸಿದ ಹಾವೇರಿ ಜಿಲ್ಲೆಯ ವಾಸಪ್ಪ ಯಲ್ಲಪ್ಪ ಕುಸಗೂರು ಅವರು 2026ನೇ ಸಾಲಿನ ಪ್ರತಿಷ್ಠಿತ ರಾಜ್ಯೋತ್ಸವ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ.
ರಾಜ್ಯ ಸರ್ಕಾರ ಶುಕ್ರವಾರ ಪ್ರಕಟಿಸಿರುವ 2026ನೇ ಸಾಲಿನ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತರ ಪಟ್ಟಿಯಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿರುವ ಒಟ್ಟು 71 ಸಾಧಕರು ಸ್ಥಾನ ಪಡೆದಿದ್ದಾರೆ. ಈ ಪೈಕಿ ಸಂಕೀರ್ಣ ಕ್ಷೇತ್ರದಲ್ಲಿ ಹಾವೇರಿ ಜಿಲ್ಲೆಯ ವಾಸಪ್ಪ ಯಲ್ಲಪ್ಪ ಕುಸಗೂರು ಅವರಿಗೆ ಪ್ರಶಸ್ತಿ ಒಲಿದಿರುವುದು ಜಿಲ್ಲೆಯ ಹೆಮ್ಮೆಯ ಸಂಗತಿಯಾಗಿದೆ.
ಹಾವೇರಿ ಜಿಲ್ಲೆಯ ರಾಣಿಬೆನ್ನೂರ ತಾಲೂಕಿನ ಕುಪ್ಪೇಲೂರು ಗ್ರಾಮದಲ್ಲಿ ಜೂನ್ 1, 1941ರಲ್ಲಿ ಯಲ್ಲಪ್ಪ ಮತ್ತು ಗೌರಮ್ಮ ದಂಪತಿಯ ಪುತ್ರರಾಗಿ ಜನಿಸಿದ ಇವರು ಎಂಟನೇ ತರಗತಿ ವರೆಗೂ ಶಿಕ್ಷಣ ಪಡೆದರು. ನಂತರದಲ್ಲಿ ಸಿಮೆಂಟ್ ವರ್ತಕರಾಗಿದ್ದುಕೊಂಡು, ಅಪಾರ ಓದಿನ ಆಸಕ್ತಿಯಿಂದ ಸಾಹಿತ್ಯದ ಮೇಲೆ ಅಪಾರ ಪ್ರೀತಿಯನ್ನು ಹೊಂದಿದ್ದರುವ ಇವರಿಗೆ ಎಂಬತೈದು ವಯಸ್ಸು ಆಗಿದ್ದು, ಸದ್ಯ ಹಾವೇರಿ ಜಿಲ್ಲೆಯ ರಾಣಿಬೆನ್ನೂರಿನ ಅಶೋಕ ನಗರದ 3ನೇ ಕ್ರಾಸ್ ನಲ್ಲಿ ವಾಸವಾಗಿದ್ದಾರೆ.
ಸಾಹಿತ್ಯ ಸೇವೆ: ವಾಸಪ್ಪ ಕುಸಗೂರ ಅವರು 2004ರಿಂದ 2011ರ ವರೆಗೆ ಎರಡು ಅವಧಿಗೆ ರಾಣಿಬೆನ್ನೂರು ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ. ಈ ಅವಧಿಯಲ್ಲಿ ‘ತಾಲೂಕು ಸಾಹಿತ್ಯ ಭವನ’ ನಿರ್ಮಿಸಲು ನಗರಸಭೆಯಿಂದ ಜಾಗವನ್ನು ಮಂಜೂರು ಮಾಡಿಸಿಕೊಂಡು, ತಮ್ಮ ಸ್ವಂತ ಸಿಮೆಂಟ್ ಅಂಗಡಿ ಮೂಲಕ ಸಿಮೆಂಟ್ ಹಾಗೂ ತಮ್ಮ ಜೇಬಿನಿಂದ ಭವನಕ್ಕೆ ಖರ್ಚು ಮಾಡುತ್ತಾರೆ. ಹಾಗೆಯೇ ದಾನಿಗಳ ನೆರವಿನಿಂದ ರಾಜ್ಯದಲ್ಲೇ ಪ್ರಪ್ರಥಮವಾಗಿ ರಾಣಿಬೆನ್ನೂರಿನಲ್ಲಿ “ತಾಲೂಕು ಕನ್ನಡ ಸಾಹಿತ್ಯ ಭವನ” ನಿರ್ಮಿಸಿದ್ದು ಹೆಗ್ಗಳಿಕೆ ಇವರದ್ದಾರೆ. ಕೇಂದ್ರ ಸಾಹಿತ್ಯ ಪರಿಷತ್ತಿಗೆ 800 ಅಜೀವ ಸದಸ್ಯತ್ವ ಮಾಡಿಸಿರುವುದು ದಾಖಲೆಯಾಗಿದೆ. ಇವರ ಅವಧಿಯಲ್ಲಿ ಅನೇಕ ದತ್ತಿಗಳ ಸ್ಥಾಪನೆ ಮಾಡಿರುವರು. ಕನ್ನಡ ಸಾಹಿತ್ಯ ಭವನ ಲೋಕಾರ್ಪಣೆ ಜೊತೆಗೆ ರಾಣಿಬೆನ್ನೂರಲ್ಲಿ ದ್ವೀತಿಯ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳವನ್ನು ಸಂಘಟಿಸಿ ಯಶಸ್ವಿಗೊಳಿದ್ದಾರೆ.
ಸಾಹಿತ್ಯದ ಅಭಿರುಚಿಯನ್ನು ಗ್ರಾಮೀಣ ಪ್ರದೇಶದ ಮಕ್ಕಳಲ್ಲಿ ಹೆಚ್ಚಿಸಲು ತಾಲೂಕಿನಾದ್ಯಂತ ಸಾಹಿತ್ಯ ಪರಿಷತ್ತಿನ ಗ್ರಾಮೀಣ ಘಟಕಗಳ ಸ್ಥಾಪನೆ ಮಾಡಿದರು. ಗ್ರಾಮದ ಶಾಲೆಗೊಂದು ಸಾಹಿತ್ಯ ವಿನೂತವಾಗಿ ಆರಂಭಿಸಿ “ಕವಿ ನಮನ” ಕಾರ್ಯಕ್ರಮದ ಮೂಲಕ ಮಕ್ಕಳಲ್ಲಿ ಸಾಹಿತ್ಯ ಪ್ರೀತಿ ಬೆಳೆಸಿದ್ದರು. ಎಸ್ ಎಸ್ ಎಲ್ ಸಿ, ಪಿಯುಸಿ ವಿದ್ಯಾರ್ಥಿಗಳಿಗೆ ಪ್ರತಿವರ್ಷ ಪ್ರತಿಭಾ ಪುರಸ್ಕಾರ, ಪರೀಕ್ಷಾ ಪೂರ್ವ ಸಿದ್ಧತಾ ಕಾರ್ಯಕ್ರಮ. ಗೃಹ ಗೋಷ್ಠಿ, ಮಹಿಳಾ ಗೋಷ್ಠಿ, ಮಕ್ಕಳ ಕವಿಗೋಷ್ಠಿ, ಜಾನಪದ ಹಾಡು ಸ್ಪರ್ಧೆ ಏರ್ಪಡಿಸಿದ್ದಾರೆ.
ಧಾರ್ಮಿಕ ಮತ್ತು ಸಾಮಾಜಿಕ ಸೇವೆ: ಕದರಮಂಡಲಗಿ ಶ್ರೀ ಕಾಂತೇಶ ದೇವಸ್ಥಾನದ ಪಂಚ ಕಮಿಟಿ ಸದಸ್ಯರಾಗಿ 40 ವರ್ಷಗಳಿಂದ ಸೇವೆ ಸಲ್ಲಿಸುತ್ತಾ, ನಿತ್ಯ ಪ್ರಸಾದದ ಮೇಲುಸ್ತುವಾರಿ ನೋಡಿಕೊಳ್ಳುತ್ತಿದ್ದಾರೆ. ಜೊತೆಗೆ ಉಚಿತ ನೇತ್ರ ತಪಾಸಣೆ ಶಿಬಿರ, ಪೋಲಿಯೋ ಲಸಿಕಾ ಅಭಿಯಾನ, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರ ವಿಚಾರ ಸಂಕಿರಣ, ಡಾ. ವಿ.ಕೃ. ಗೋಕಾಕರ ಜನ್ಮ ಶತಮಾನೋತ್ಸವ ಆಚರಣೆ, ಹಾವೇರಿ ಜಿಲ್ಲಾ ಉತ್ಸವದಲ್ಲಿ ಸಕ್ರಿಯ ಪಾತ್ರ ವಹಿಸಿದ್ದಾರೆ. ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ತಾಲೂಕು ಘಟಕದ ಗೌರವ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ.
ಪ್ರಶಸ್ತಿ ಗೌರವಗಳು: ವಾಸಪ್ಪ ಕುಸಗೂರ ಇವರ ಅಪಾರ ಸಾಹಿತ್ಯ, ಧಾರ್ಮಿಕ ಹಾಗೂ ಸಾಮಾಜಿಕ ಅಪಾರ ಸೇವೆಗೆ ಅನೇಕ ಪ್ರಶಸ್ತಿಗಳು ಲಭಿಸಿವೆ. ಸಾಹಿತ್ಯ ಸೇವೆಗೆ- ಅಮೂಲ್ಯ ಪ್ರಶಸ್ತಿ, ಕನ್ನಡ ರತ್ನ ಪ್ರಶಸ್ತಿ, ಕನ್ನಡ ರತ್ನ ಪ್ರಶಸ್ತಿ–ಚೌಡಯ್ಯದಾನಪುರ ಕನ್ನಡ ಶ್ರೀ ಪ್ರಶಸ್ತಿ, ಉಡುಪಿ ಚಾಲುಕ್ಯ ಪ್ರಶಸ್ತಿ ಸೇರಿ ಹಲವು ಪ್ರಶಸ್ತಿಗಳಿಗೆ ಭಾಜನರಾಗಿದ್ದು, ಇದೀಗ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಇವರಿಗೆ ಅರಸಿ ಬಂದಿದೆ.
ರಾಜ್ಯೋತ್ಸವ ಪುರಸ್ಕೃತ ವಾಸಪ್ಪ ಯಲ್ಲಪ್ಪ ಕುಸಗೂರು ಅವರ ಮಗ ಉಮೇಶ ಕುಸಗೂರು ಮಾತನಾಡಿ, ನಮ್ಮ ತಂದೆಯವರ ಸಾಹಿತ್ಯ ಸಾಮಾಜಿಕ ಸೇವೆಯನ್ನು ಗುರುತಿಸಿ ರಾಜ್ಯ ಸರ್ಕಾರ ರಾಜ್ಯೋತ್ಸವ ಪ್ರಶಸ್ತಿ ಬಂದಿರುವುದು ನಮ್ಮೆಲ್ಲ ಕುಟುಂಬದವರಿಗೆ ಸಂತಸ ತಂದಿದೆ” ಎಂದು ಪ್ರತಿಕ್ರಿಯೆ ನೀಡಿದರು.
