ಸಾಹಿತ್ಯ ಪ್ರಸ್ತುತ ಕಾಲದಲ್ಲಿ ಚಳವಳಿಗೆ ಕಾಣ್ಕೆಯನ್ನು ನೀಡುತ್ತಿಲ್ಲ. ಈ ನಿಟ್ಟಿನಲ್ಲಿ ಬರಹಗಾರರು ಕೆಲಸ ಮಾಡಬೇಕು ಎಂದು ಖ್ಯಾತ ಸಾಹಿತಿ ಕುಂ ವೀರಭದ್ರಪ್ಪ ಕರೆ ನೀಡಿದರು.
ಬೆಂಗಳೂರಿನ ಕನ್ನಡ ಸಾಹಿತ್ಯ ಪರಿಷತ್‌ ಆವರಣದಲ್ಲಿರುವ ಕುವೆಂಪು ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಚಿನ್ನೇನಹಳ್ಳಿ ಸ್ವಾಮಿಯವರ ʼಕಾಲೆಳತೆಯ ದುಃಖʼ ಕಾದಂಬರಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
“ಪ್ರಸ್ತುತ ಸಾಹಿತಿಗಳು ಸಾಮಾಜಿಕ ವರ್ತಮಾನಗಳಿಗೆ ವಿಮುಖರಾಗುತ್ತಿದ್ದು, ವ್ಯವಸ್ಥಗೆ, ಅನಿಷ್ಟಗಳಿಗೆ ಹೊಂದಿಕೊಂಡು ಬರೆಯುತ್ತಿದ್ದಾರೆ. ಹಿಂದಿನ ಚಳವಳಿಗಳಿಗೆ ಸಾಹಿತ್ಯಿಕವಾದ ಕೊಡುಗೆ ಬಹಳಷ್ಟಿತ್ತು. ಆದರೆ ಈಗ ಅದು ಕಾಣೆಯಾಗಿರುವುದನ್ನು ನೋಡುತ್ತಿದ್ದೇವೆ. ಆದಾಗ್ಯೂ ಚಿನ್ನೇನಹಳ್ಳಿ ಸ್ವಾಮಿಯವರ ಕಾದಂಬರಿ ಈ ನಿಟ್ಟಿನಲ್ಲಿ ಯೋಚಿಸುವಂತೆ ಮಾಡುತ್ತದೆ. ತಮಗೆ ಅನುಕೂಲವಿಲ್ಲದಿದ್ದರೂ ಯಾರೋ ಕುಡಿಯುವ ನೀರಿಗಾಗಿ ರೈತ ತನ್ನ ತಲೆತಲಾಂತರದಿಂದ ಬಂದಂಥ ಕೃಷಿ ಭೂಮಿಯನ್ನು ಕೈ ಬಿಡುತ್ತಿದ್ದಾನೆ. ಸರ್ಕಾರಗಳು ರೈತನನ್ನು ಇಕ್ಕಟ್ಟಿಗೆ ಸಿಲುಕಿಸುತ್ತಿವೆ” ಎಂದು ಹೇಳಿದರು.
“ಈಗಾಗಲೇ ಯುವಸಮುದಾಯ ರಾಷ್ಟ್ರಮಟ್ಟದಲ್ಲಿ ದೊಡ್ಡ ಚಳವಳಿಯನ್ನು ಹುಟ್ಟುಹಾಕಿದೆ. ಆದರೆ ಅದಕ್ಕೆ ಪೂರಕವಾಗಿ ಸಾಹಿತಿಗಳು ಕೈಜೋಡಿಸುತ್ತಿಲ್ಲ. ಮಾತ್ರವಲ್ಲದೇ ಕರ್ನಾಟಕದ ಬಿಡದಿಯಲ್ಲಿ ವಶಪಡಿಸಿಕೊಳ್ಳುತ್ತಿರುವ ಕೃಷಿ ಭೂಮಿಯ ವಿರುದ್ದ ರೈತರು ದನಿಯೆತ್ತಿದ್ದಾರೆ. ಹಾಗಾಗಿ ಎಲ್ಲ ರೈತರೂ ಇದಕ್ಕೆ ದನಿಗೂಡಿಸಬೇಕು” ಎಂದರು.
“ಯಗಚಿ ಜಲಾಶಯದ ಸುಂದರ ಪ್ರತಿಕೃತಿಯನ್ನು ಅನಾವರಣಗೊಳಿಸುವ ಮೂಲಕ ಕಾರ್ಯಕ್ರಮ ಉದ್ಘಾಟನೆ ಮಾಡಿದ ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷ ಪ್ರೊ. ಎನ್‌ ಎಲ್‌ ಮುಕುಂದರಾಜ್‌ ಮಾತನಾಡಿ, “ಈಗಿನ ಸಾಹಿತಿಗಳು ಹೆಚ್ಚು ಅಧ್ಯಯನಶೀಲರಾಗಬೇಕು. ಕಾದಂಬರಿ ಪ್ರಕಾರಕ್ಕೆ ಕನ್ನಡದಲ್ಲಿ ಕೇವಲ ನೂರು ವರ್ಷಗಳ ಇತಿಹಾಸವಿದೆ. ಆದರೂ ಈಗ ವಿಫುಲವಾಗಿ ಕತೆ ಹಾಗೂ ಕಾದಂಬರಿ ಪ್ರಕಾರ ಬೆಳೆಯುತ್ತಿರುವುದು ಗಮನಾರ್ಹ” ಎಂದು ಹೇಳಿದರು.
ಕಾಲಳತೆಯ ದುಃಖ ಕಾದಂಬರಿಯನ್ನು ಬಿಡುಗಡೆ ಮಾಡಿದ ಡಾ ಹೆಚ್‌ ಎಲ್‌ ಪುಷ್ಪ ಅವರು ಮಾತನಾಡಿ, “ಚಿನ್ನೇನಹಳ್ಳಿ ಸ್ವಾಮಿಯವರು ಯಗಚಿ ಜಲಾಶಯಕ್ಕಾಗಿ ಮುಳುಗಿದ ಊರಾದ ಯಮಸಂದಿ ಎಂಬ ಗ್ರಾಮವನ್ನು ಕೇಂದ್ರವಾಗಿಟ್ಟುಕೊಂಡು ಕಾದಂಬರಿ ರಚಿಸಿದ್ದಾರೆ. ಅಲ್ಲಿನ ಜನರ, ಯುವಜನತೆಯ ದುಃಖದುಮ್ಮಾನಗಳಿಗೆ ದನಿಯಾಗಿದ್ದಾರೆ” ಎಂದರು.
ಪತ್ರಕರ್ತ ರಘುನಾಥ ಚ ಹ ಕೃತಿ ಕುರಿತು ಮಾತಾಡಿ, “ಚಿನ್ನೇನಹಳ್ಳಿ ಸ್ವಾಮಿಯವರು ಒಂದು ಪುಟ್ಟ ಕಾದಂಬರಿಯ ಮೂಲಕ ಸಾಹಿತ್ಯ ಕ್ಷೇತ್ರದ ಗಮನ ಸೆಳೆದಿದ್ದಾರೆ. ಮುಳುಗಡೆಯಾಗುವುದು ಭೂಮಿ ಮಾತ್ರವಲ್ಲ, ಜನರ ಸಂಬಂಧಗಳು, ವಾಣಿಜ್ಯ ವ್ಯವಹಾರಗಳೂ ಕೂಡ ನಿಗೂಢ ರೀತಿಯಲ್ಲಿ ಕಣ್ಮರೆಯಾಗುತ್ತವೆ. ಈ ಕಾದಂಬರಿಯಲ್ಲಿ ಇಂದಿನ ಸಂಬಂಧಗಳು ಕೂಡ ವ್ಯವಹಾರಗಳಾಗಿರುವುದನ್ನು ಅನಾವರಣ ಮಾಡಿದ್ದಾರೆ. ಒಂದು ಶಕ್ತವಾದ ಗದ್ಯಶೈಲಿಯ ಮೂಲಕ ಗಮನ ಸೆಳೆಯಲಾಗಿದೆ” ಎಂದು ಹೇಳಿದರು.
ಸಾಹಿತಿ ದಯಾ ಗಂಗನಘಟ್ಟ ಮಾತನಾಡಿ, “ಮುಳುಗಡೆ ಪ್ರದೇಶದಲ್ಲಿ ಭೂಮಿ ಮುಳುಗಡೆಯಾದಾಗ ಜಮೀನನ್ನು ಸರ್ಕಾರ ವಶಪಡಿಸಿಕೊಳ್ಳುತ್ತದೆ. ಆದರೆ ಆ ಹಣದ ಮೇಲೆ ಆ ಭಾಗದ ಮಹಿಳೆಯರಿಗೆ ಯಾವುದೇ ಒಡೆತನ ಇರುವುದಿಲ್ಲ. ಅಷ್ಟೇ ಅಲ್ಲದೇ ಆ ಭಾಗದಲ್ಲಿ ಎಲ್ಲರೂ ಭೂಮಿ ಹೊಂದಿಯೇ ಜೀವನ ನಡೆಸುತ್ತಿರುವುದಿಲ್ಲ. ಆದರೆ ಅಂತಹ ಭೂರಹಿತರನ್ನು ಕಡೆಗಣಿಸಲಾಗುತ್ತಿದೆ” ಎಂದರು.
ಇದನ್ನೂ ಓದಿದ್ದೀರಾ? ಆಂಧ್ರ ಪ್ರದೇಶದಲ್ಲಿ ಮಳೆ ಕೊರತೆ, ತೀವ್ರ ಒಣಹವೆ: ಮುಗಿಲಿನತ್ತ ದಿಟ್ಟಿಸಿರುವ ರೈತರು
ಕೃತಿಕಾರ ಚಿನ್ನೇನಹಳ್ಳಿ ಸ್ವಾಮಿ ಮಾತನಾಡಿ, “ಸಾಹಿತ್ಯ ಕ್ಷೇತ್ರದಲ್ಲಿ ಬಡ ಸಾಹಿತಿಗಳಿಗೆ ಪ್ರೋತ್ಸಾಹ ಕಡಿಮೆಯಾಗಿದೆ. ಈ ನಿಟ್ಟಿನಲ್ಲಿ ಸರ್ಕಾರ ಹಾಗೂ ಚಿಂತಕರು ಯೋಚಿಸಬೇಕಿದೆ” ಎಂದು ಮನವಿ ಮಾಡಿದರು.
ಸಾಹಿತಿ ಚಲಂ ಹಾಡ್ಲಹಳ್ಳಿ ಎಲ್ಲರನ್ನೂ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮುಖ್ಯ ಅತಿಥಿಗಳಾಗಿ ಡಾ ಎ ಎಂ ನಾಗೇಶ್‌ ಇದ್ದರು.
