SSLC ಪರೀಕ್ಷೆಯಲ್ಲಿ ಹಿಂದಿ ವಿಷಯ ಕಡ್ಡಾಯಗೊಳಿಸಿರುವುದನ್ನು ಹಿಂದಿ ಹೇರಿಕೆ ವಿರೋಧಿ ಕರ್ನಾಟಕದ ಒಕ್ಕೂಟದ ಅಡಿಯಲ್ಲಿ ಹಲವು ಕನ್ನಡಪರ ಸಂಘಟನೆಗಳು ವಿರೋಧಿಸಿವೆ. ಜೊತೆಗೆ ಹಿಂದಿ ವಿಷಯವನ್ನು ರದ್ದುಗೊಳಿಸಬೇಕು ಎಂಬ ಬೇಡಿಕೆಯನ್ನು ಮುಂದಿಟ್ಟಿವೆ.
ಈ ಕುರಿತು ಬೆಂಗಳೂರಿನ ಶಿವಾನಂದ ಸರ್ಕಲ್ ಬಳಿ ಇರುವ ಗಾಂಧಿಭವನದಲ್ಲಿರುವ ಮಹಾದೇವಿ ತಾಯಿ ಕಿರು ಸಭಾಂಗಣದಲ್ಲಿ ಬುಧವಾರ ʼಹಿಂದಿ ಹೇರಿಕೆ ವಿರೋಧಿ ಕರ್ನಾಟಕ ಒಕ್ಕೂಟʼ ದ ಕಡೆಯಿಂದ ಸಭೆ ನಡೆಸಿ ಚರ್ಚಿಸಲಾಗಿತ್ತು. ಕರ್ನಾಟಕ ರಾಜ್ಯ ಶಿಕ್ಷಣ ನೀತಿ ಆಯೋಗದ ಸಲಹೆಗಳಲ್ಲಿ ಪ್ರಮುಖವಾದ ಸಲಹೆ ‘ಎರಡು ನುಡಿ ನೀತಿ ’ 2026-2027 ನೇ ಸಾಲಿನಿಂದ ಕಡ್ಡಾಯವಾಗಿ, ಶಾಶ್ವತವಾಗಿ ಕರ್ನಾಟಕ ಸರ್ಕಾರ ಜಾರಿ ಮಾಡಬೇಕು ಎಂಬುದು. ಆದರೆ ಕನ್ನಡ ವಿರೋಧಿಗಳ ಕುತಂತ್ರಕ್ಕೆ ಕರ್ನಾಟಕ ಸರ್ಕಾರ ಒಳಗಾಗಿ ಈ ಕಾರ್ಯಯೋಜನೆ ಇಲ್ಲಿಯವರೆಗೂ ಸಾಕಾರಗೊಳ್ಳಲಿಲ್ಲ. ಈ ವಿಷಯವಾಗಿ ಶಾಲಾ ಶಿಕ್ಷಣ ಸಚಿವರಾದ ಮಧು ಬಂಗಾರಪ್ಪ ಅವರನ್ನು ಭೇಟಿ ಮಾಡಲು ಸಾಕಷ್ಟು ಬಾರಿ ಪ್ರಯತ್ನಿಸಿದ್ದರು. ಫಲಕಾರಿಯಾಗಲಿಲ್ಲದ ಕಾರಣ, ಹಿಂದಿ ಹೇರಿಕೆ ವಿರೋಧಿ ಒಕ್ಕೂಟವು ಸಭೆ ನಡೆಸಿ, ʼಹಿಂದಿ ತೊಲಗಲಿ – ಕನ್ನಡ ಬೆಳಗಲಿʼ ಬ್ಯಾನರ್ ಅಡಿಯಲ್ಲಿ ಇಂದು (ಮಾ.27) ಬೆಳಗ್ಗೆ 8:45 ಕ್ಕೆ ಬೆಂಗಳೂರಿನ ಸದಾಶಿವನಗರದಲ್ಲಿರುವ ಮಧು ಬಂಗಾರಪ್ಪ ರವರ ಮನೆಗೆ ಮುತ್ತಿಗೆ ಹಾಕಲು ಕೂಡ ತೀರ್ಮಾನಿಸಲಾಗಿತ್ತು.
ಇದೇ ವಿಷಯವಾಗಿ ಮಾ.11ರಂದು ಕರ್ನಾಟಕ ಶಾಲಾ ಪರೀಕ್ಷೆ ಮತ್ತು ಮೌಲ್ಯನಿರ್ಣಯ ಮಂಡಳಿಗೆ ಮುತ್ತಿಗೆ ಹಾಕಿ ಮನವಿ ಸಲ್ಲಿಸಲಾಗಿತ್ತು ಮತ್ತು ಮಾ.30ರಂದು ಹಿಂದಿ ಭಾಷಾ ಪರೀಕ್ಷೆ ನಡೆಸುವ ದಿನದಂದು ಎಲ್ಲ ಕನ್ನಡಪರ, ದಲಿತಪರ, ರೈತ ಪರ, ಜನಪರ ಸಂಘಟನೆಗಳು ಸೇರಿ ಎಸ್ ಎಸ್ ಎಲ್ ಸಿ ಪರೀಕ್ಷೆಯ ಕೇಂದ್ರಗಳಿಗೆ ಮುತ್ತಿಗೆ ಹಾಕಲಾಗುವುದೆಂದು ಸಭೆಯಲ್ಲಿ ಎಚ್ಚರಿಕೆ ನೀಡಲಾಗಿದೆ.
ಇದನ್ನೂ ಓದಿ: ಬೆಂಗಳೂರು | ಇಂಗು ಗುಂಡಿ ಸ್ವಚ್ಛತೆ ವೇಳೆ ಉಸಿರುಗಟ್ಟಿ ಮೂವರ ಸಾವು
ಈ ಸಭೆಯಲ್ಲಿ ಸಾರಾ ಗೋವಿಂದು, ರಾಧಾಕೃಷ್ಣ, ಪಾರ್ವತೀಶ್, ಅಭಿ ಒಕ್ಕಲಿಗ, ಶಿವರಾಮೇಗೌಡ, ಶಂಕರೇಗೌಡ, ಚೇತನ್ ಒಕ್ಕಲಿಗ ಇನ್ನು ಮುಂತಾದ ಹೋರಾಟಗಾರರು ಉಪಸ್ಥಿತಿಯಲ್ಲಿದ್ದರು.
