ಸಾಹಿತ್ಯ ನಮಗೆ ಮುಕ್ತವಾಗುವುದನ್ನು, ಸ್ವತಂತ್ರವಾಗುವುದನ್ನು ಮತ್ತು ಅಭಿವ್ಯಕ್ತಿಸುವುದನ್ನು ಕಲಿಸುತ್ತದೆ. ಹಾಗೆಯೇ ಗಣೇಶ್ ಅವರು ಕಲಿತರು, ಕನ್ನಡಕ್ಕೆ ಕೊಡುಗೆಯನ್ನು ನೀಡಿದರು.
ಜೀತಪದ್ದತಿಗೆ ಸಿಲುಕಿ ನಾಶವಾಗಬೇಕಿದ್ದ ಮೊಗಳ್ಳಿಯನ್ನು ಸ್ವತಂತ್ರವಾಗಿಸಿದ್ದು ಕತೆ. ಒಬ್ಬ ಮನುಷ್ಯ ಏಕಾಂಗಿಯಾಗಿ ತನ್ನಲ್ಲೇ ನಂಬಿಕೆ ಇಟ್ಟು ವಿದ್ವಾಂಸನಾಗುವಂತಹ ಬದ್ದತೆ ಹೊಂದಿರುವ ಎಚ್‌ ಎನ್‌ ಒಂದುಕಡೆಯಾದರೆ, ಇನ್ನೊಂದುಕಡೆ ಯಾವ ಹಿನ್ನೆಲೆಯೂ ಇಲ್ಲದೆ ಮನೆಯಲ್ಲಿ ಅಕ್ಷರಸ್ಥರೇ ಇಲ್ಲದೆ ಊರಿಂದ ತಪ್ಪಿಸಿಕೊಂಡು ಬಂದಂಥ ಮೊಗಳ್ಳಿ ಗಣೇಶ್ ಉತ್ತಮ ಬರಹಗಾರ ಎಂದು ಲೇಖಕ, ಸಂಸ್ಕೃತಿ ಚಿಂತಕ ನಟರಾಜ್‌ ಹುಳಿಯಾರ್ ಅಭಿಪ್ರಾಯಪಟ್ಟರು.
ಬೆಂಗಳೂರು ನಗರದ ನ್ಯಾಷನಲ್ ಕಾಲೇಜಿನ ಕನ್ನಡ ವಿಭಾಗ ಮತ್ತು ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರದ ಸಂಯುಕ್ತ ಆಶ್ರಯದಲ್ಲಿ ನಡೆದ ‘ಮೊಗ್ಗಳ್ಳಿ ಗಣೇಶ್ ಅವರ ಸಾಹಿತ್ಯ’ ರಾಜ್ಯಮಟ್ಟದ ವಿಚಾರ ಸಂಕಿರಣ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.
“ಮೊಗಳ್ಳಿ ಗಣೇಶ್ ಹತ್ತನೇ ತರಗತಿ ಮುಗಿಸಿದ ಬಳಿಕ ಅವರ ತಂದೆ ಅವನನ್ನು ಜೀತಕ್ಕೆ ಕಳುಹಿಸಲು ಮುಂದಾಗಿದ್ದನ್ನು ನಿರಾಕರಿಸಿ ಅಲ್ಲಿಂದ ಕಾಲುಕಿತ್ತು ನಗರ ಪ್ರದೇಶಕ್ಕೆ ಬಂದಾಗ… ಈ ನಗರ ಅವನನ್ನು ಹೇಗೆ ರೂಪಿಸಿತು? ಆ ಜೀತವನ್ನು ತಪ್ಪಿಸಿಕೊಳ್ಳುವುದಕ್ಕಾಗಿ ಆಗ ಓಡಿ ಬಂದಿದ್ದರಿಂದಲೇ ಆತ ಸ್ವತಂತ್ರನಾಗಲು ಸಾಧ್ಯವಾಗಿದ್ದು. ಹಾಗಾಗಿ ನಾವು ನಮ್ಮ ಮನಸ್ಸಿನಲ್ಲಿರುವ ಜೀತ ಪದ್ದತಿಯನ್ನು ಮೊದಲು ತೊಲಗಿಸಿದರೆ ಸ್ವತಂತ್ರರಾಗಬಹುದು” ಎಂದು ಹೇಳಿದರು.
“ಕನ್ನಡ ಸಾಹಿತ್ಯ ಜಾತ್ಯತೀತವಾಗಿದೆ. ಎಲ್ಲಿ ಪ್ರತಿಭೆ ಇರುತ್ತದೆಯೋ, ಎಲ್ಲಿ ಶ್ರೇಷ್ಠ ಸಾಹಿತ್ಯ ಇರುತ್ತದೆಯೋ ಅದನ್ನು ಅಪ್ಪಿಕೊಳ್ಳುವಂಥದ್ದು ಕನ್ನಡ ಸಾಹಿತ್ಯ. ಗಣೇಶ್ ಮೈಸೂರಿಗೆ ಬಂದ ಕಾಲ ಪ್ರಕ್ಷುಬ್ಧ ಕಾಲ. ಬಹಳ ದೊಡ್ಡ ಮಂಥನದ ಕಾಲ… ಈಗ ತಿರುಗಿ ನೋಡಿದರೆ ಅವನ ಅನಾಥತೆಯಲ್ಲಿ ಬಂದದ್ದು, ಅವನ್ನು ರೂಪಿಸಿದ್ದು ಗಮನಾರ್ಹ” ಎಂದು ನೆನಪಿಸಿಕೊಂಡರು.
“ರೈತ ಚಳವಳಿ, ದಲಿತ ಚಳವಳಿ, ವೈಚಾರಿಕ ಚಳವಳಿಗಳು ನಡೆಯುತ್ತಿರುತ್ತವೆ. ಅದೇ ಕಾಲಕ್ಕೆ ಗಣೇಶ್ ಹೇಗೋ ಅಲ್ಲಿಗೆ ಬಂದುಬಿಡ್ತನೆ. ಅಲ್ಲದೆ ಬರಹಗಾರನನ್ನು ಯಾವ ರೀತಿಯ ಸಿದ್ಧಾಂತಗಳು ಕೈಹಿಡಿಯುತ್ತವೆ ಎಂಬುದು ಬಹಳ ಮುಖ್ಯ. ಕತೆಗಾರ ಕತೆಯನ್ನು ಕಟ್ಟಲು ಒಂದು ಹಳ್ಳಿ ಬೇಕು… ಅಲ್ಲಿಯ ಅನುಭವ, ಹಿಂಸೆ, ಜಾತಿ ಪದ್ದತಿಯ ಭೀಕರತೆ, ಸಣ್ಣತನಗಳು ಇವೆಲ್ಲವನ್ನೂ ದೃಷ್ಟಿಸುವ ಕಣ್ಣುಗಳನ್ನು ನಗರ ನೀಡುತ್ತದೆ. ಹಾಗೆಯೇ ಮೊಗಳ್ಳಿ ಗಣೇಶನಿಗೆ ಆ ನಗರದಲ್ಲಿ ಮಾರ್ಕ್ಸ್‌ ವಾದ ಸಿಗುತ್ತದೆ. ಎಂ ಡಿ ನಂಜುಂಡ ಸ್ವಾಮಿಯವರಿಂದ ಸಮಾಜವಾದ ಸಿಗುತ್ತದೆ, ಅಂಬೇಡ್ಕರ್‌ ವಾದ ಸಿಗುತ್ತದೆ, ಹಲವು ಚಳವಳಿಗಳು ಸಿಗುತ್ತವೆ. ಯಾವುದೇ ಬರಹಗಾರನಿಗೆ ಇಂತಹ ಸಿದ್ಧಾಂತಗಳೆಲ್ಲವೂ ಸೇರಿಕೊಳ್ಳಬೇಕು. ಆಗ ಮಾತ್ರ ಉತ್ತಮ ಬರಹಗಾರನಾಗಲು ಸಾಧ್ಯ” ಎಂದು ಹೇಳಿದರು.
“ಭಾರತದಂತಹ ದೇಶದಲ್ಲಿ ಸಿದ್ಧಾಂತಗಳಿಲ್ಲದೆ ಬರೆದರೆ ಈ ಲೋಕ ಅರ್ಥವಾಗುವುದಿಲ್ಲ. ಜಾತೀಯತೆ ಏನು ಮಾಡುತ್ತದೆಂಬುದು ತಿಳಿದಿರಬೇಕು. ವರ್ಗ ತಿಳಿಯಬೇಕಾದರೆ ಮಾರ್ಕ್ಸ್‌ನ ಸಿದ್ಧಾಂತ ನಮಗೆ ತಿಳಿದಿರಬೇಕು. ಜಾತಿ ವಿಷಯದಲ್ಲಿ ವ್ಯಕ್ತಿಗಳು ಎಷ್ಟು ಸಣ್ಣವರಾಗಿ, ಕ್ಷುದ್ರವಾಗಿ ವರ್ತಿಸುತ್ತಾರೆ ಎಂಬುದನ್ನು ಅರ್ಥ ಮಾಡಿಕೊಳ್ಳುವುದಕ್ಕೆ ಲೋಹಿಯಾವಾದ ಬೇಕು. ಸ್ತ್ರೀ ದಮನ ಎಲ್ಲಿ, ಹೇಗೆ ನಡೆಯುತ್ತಿದೆ ಎಂಬುದನ್ನು ತಿಳಿಯುವುದಕ್ಕೆ ಮಹಿಳಾವಾದ ಬೇಕು. ಇವೆಲ್ಲ ಅಂಶಗಳು ಬರಹಗಾರನ ಕಣ್ಣು ತೆರೆಸುತ್ತವೆ. ಇವೆಲ್ಲವೂ ಒಬ್ಬ ಕತೆಗಾರನ ಬರಹಗಳಲ್ಲಿ ಸೂಚಿಸುತ್ತವೆ” ಎಂದರು.
“ಮೊಗಳ್ಳಿ ಗಣೇಶ್ ಇಂತಹ ಹಿಂಸೆಗಳನ್ನು ತಮ್ಮ ಕೃತಿಗಳಲ್ಲಿ ಬರೆದರು. ನಿರರ್ಗಳವಾಗಿ ಬರೆಯುತ್ತಿದ್ದರು. ಬರೆಯುವುದನ್ನು ತುಂಬಾ ಎಂಜಾಯ್‌ ಮಾಡುತ್ತಿದ್ದರು. ದಲಿತರ ಮೇಲೆ ನಡೆಯುತ್ತಿರುವ ವರ್ಗ, ದಲಿತ ಸಮಾಜದಲ್ಲಿ ನಡೆಯುತ್ತಿರುವ ವರ್ಗ, ಮಹಿಳೆಯರ ಮೇಲೆ ನಡೆಯುತ್ತಿರುವ ದಬ್ಬಾಳಿಕೆ ಇವೆಲ್ಲವನ್ನೂ ಗಣೇಶ್ ಬರೆದಿದ್ದಾರೆ. ಇವತ್ತಿಗೂ ಸರ್ಕಾರಿ ಶಾಲೆಯ ಅಂಗಳದಲ್ಲಿ ದಲಿತ ಮಕ್ಕಳನ್ನು ನೋಡಿದರೆ ತಿಳಿಯುತ್ತದೆ, ಆ ಸಮುದಾಯದ ಸ್ಥಿತಿ ಹೇಗಿದೆಯೆಂಬುದು. ಮೀಸಲಾತಿ ಬಗ್ಗೆ ಬಾಯಿಗೆ ಬಂದಂತೆ ಮಾತುನಾಡುವವರು ಈ ಹಿನ್ನೆಲೆಗಳನ್ನು ಗಮನಿಸಬೇಕು. ಅಲ್ಲಿ ನಿಜವಾದ ವಾಸ್ತವತೆ ತಿಳಿಯುತ್ತದೆ. ಈಗಲೂ ಅದೆಷ್ಟೋ ಮೊಗಳ್ಳಿ ಗಣೇಶ್‌ರನ್ನು ಅಲ್ಲಿ ಕಾಣಬಹುದು” ಎಂದು ಮರುಕಪಟ್ಟರು.
“ಒಂದು ಸಣ್ಣ ಹಾಸ್ಟೆಲ್‌ ಫೆಸಿಲಿಟಿ ಸಿಗುವುದರಿಂದ ಬೆಳೆಯುತ್ತಾರೆ, ಯಾರದ್ದಾದರೂ ಸಣ್ಣ ಸಹಾಯದಿಂದ ಬೆಳೆಯುತ್ತಾರೆ. ಹಾಗಾಗಿ ಶಾಲೆ ಕಾಲೇಜುಗಳಲ್ಲಿ ಇತರೆ ವಿದ್ಯಾರ್ಥಿಗಳು, ಶಿಕ್ಷಕರು ಇವೆಲ್ಲವನ್ನೂ ಮಾತನಾಡುವಾಗ ಅರ್ಥ ಮಾಡಿಕೊಂಡು ಚರ್ಚೆ ಮಾಡಬೇಕು. ಈ ಹಿಂದೆ ದ್ರೋಣಾಚಾರ್ಯನಿಗೆ ಮೀಸಲಾತಿ ಇತ್ತು. ಆದರೆ ಏಕಲವ್ಯನಿಗೆ ಮೀಸಲಾತಿ ಇರಲಿಲ್ಲ. ಈಗ ಮೀಸಲಾತಿ ಇದ್ದರೂ ದಲಿತರ ಸ್ಥಿತಿ ಇದಕ್ಕೆ ಹೊರತಾಗಿಲ್ಲ” ಎಂದು ಹೇಳಿದರು.
ಇದನ್ನೂ ಓದಿದ್ದೀರಾ? ಬೆಳಗಾವಿ | ಸಾವಿರಾರು ರೈತರ ಬೃಹತ್ ಪ್ರತಿಭಟನೆ ಭೂಸ್ವಾಧೀನಕ್ಕೆ ಸಮರ್ಪಕ ಪರಿಹಾರ, ನೀರಾವರಿ ಯೋಜನೆ ಜಾರಿಗೆ ಆಗ್ರಹ
“ನಿಜಕ್ಕೂ ಈ ದೇಶದ ಜಾತೀಯತೆಯ ಕರಾಳತೆಯನ್ನು ಅರಿಯಲು ಮೊಗಳ್ಳಿ ಗಣೇಶನ ಕೃತಿಗಳನ್ನು ಓದಬೇಕು. ಈ ದೇಶ ನಮಗೆ ಅರಿವಿಲ್ಲದೆಯೇ ನಮ್ಮನ್ನು ಹೇಗೆ ನಿಯಂತ್ರಿಸುತ್ತದೆ ಎಂಬುದನ್ನು ಕಾಣಬಹುದು. ಗಣೇಶ್ ಅವರ ‘ತೊಟ್ಟಿಲು’ ಕೃತಿ ತುಂಬಾ ಅಚ್ಚುಕಟ್ಟಾಗಿ ಮೂಡಿಬಂದಿದೆ. ನೇರವಾಗಿ ಬರೆಯುತ್ತಿದ್ದರು. ಪ್ರಾಮಾಣಿಕವಾಗಿ ಬರೆಯುತ್ತಿದ್ದರು. ಜೀತಪದ್ದತಿಗೆ ಸಿಲುಕಿ ನಾಶವಾಗಬೇಕಿದ್ದ ಮೊಗಳ್ಳಿಯನ್ನು ಸ್ವತಂತ್ರವಾಗಿಸಿದ್ದು ಕತೆ. ಸಾಹಿತ್ಯ ನಮಗೆ ಮುಕ್ತವಾಗುವುದನ್ನು, ಸ್ವತಂತ್ರವಾಗುವುದನ್ನು ಮತ್ತು ಅಭಿವ್ಯಕ್ತಿಸುವುದನ್ನು ಕಲಿಸುತ್ತದೆ. ಹಾಗೆಯೇ ಗಣೇಶ್ ಅವರು ಕಲಿತರು, ಕನ್ನಡಕ್ಕೆ ಕೊಡುಗೆಯನ್ನು ನೀಡಿದರು. ಹಾಗಾಗಿ ಗಣೇಶ್ ಸಾಹಿತ್ಯವನ್ನು ನೆನಪಿಸಿಕೊಳ್ಳುತ್ತಿರುವುದು ಅಭಿನಂದನೀಯ. ಈ ಕೃತಜ್ಞತೆ ಅವನಿಗೆ ಸಲ್ಲಬೇಕಾದ್ದು, ಮುಂದೆಯೂ ಸಲ್ಲಬೇಕಾದದ್ದು” ಎಂದರು.
ಎನ್‌ಇಎಸ್‌ ಅಧ್ಯಕ್ಷ ಡಾ ಹೆಚ್‌ ಎನ್‌ ಸುಬ್ರಹ್ಮಣ್ಯ, ಗೌರವ ಕಾರ್ಯದರ್ಶಿ ವಿ. ವೆಂಕಟಶಿವಾ ರೆಡ್ಡಿ, ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕ ಡಾ. ಕೆ ಸಿ ಶಿವಾರೆಡ್ಡಿ, ಕಾರ್ಯದರ್ಶಿ ಎಂ ಸಿ ನರೇಂದ್ರ, ಶೈಕ್ಷಣಿಕ ಸಂಚಾಲಕ ಕೇಶವ ಮುಳಗಿ ಹಾಗೂ ನ್ಯಾಷನಲ್ ಕಾಲೇಜು ಚೇರ್ಮನ್‌ ಪಿ ಎಲ್‌ ವೆಂಕಟರಾಮ ರೆಡ್ಡಿ, ಶಿವಣ್ಣ ಸೇರಿದಂತೆ ಇತರರು ಇದ್ದರು.
