ದಕ್ಷಿಣ ಭಾರತದ ಹಿರಿಯ ನಟಿ, ಸಾಹುಕಾರ್ ಜಾನಕಿ ಎಂದೇ ಹೆಸರುವಾಸಿಯಾಗಿದ್ದ ಶಂಕರಮಂಚಿ ಜಾನಕಿ ಅವರು ತಮ್ಮ ತೊಂಬತ್ತನಾಲ್ಕನೇ ವಯಸ್ಸಿನಲ್ಲಿ ಇಂದು (ಆಗಸ್ಟ್ 21) ಚೆನ್ನೈನ ಖಾಸಗಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ. ತಮಿಳು, ತೆಲುಗು, ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ಅಮೋಘ ನಟನೆಯ ಮೂಲಕ ಅಸಂಖ್ಯಾತ ಅಭಿಮಾನಿಗಳನ್ನು ಸಂಪಾದಿಸಿದ್ದ ಅವರ ನಿಧನವು ಸಿನಿಮಾ ಕ್ಷೇತ್ರಕ್ಕೆ ತುಂಬಲಾರದ ನಷ್ಟವನ್ನು ಉಂಟುಮಾಡಿದೆ.
ಮೂಲತಃ ಉಡುಪಿ ಕುಟುಂಬದವರಾದ ಜಾನಕಿ ಅವರು ಡಿಸೆಂಬರ್ 12, 1931ರಂದು ಆಂಧ್ರದ ರಾಜಮುಂಡ್ರಿಯಲ್ಲಿ ಜನಿಸಿದರು. 11ನೇ ವಯಸ್ಸಿಗೆ ಆಕಾಶವಾಣಿ ಕಲಾವಿದೆಯಾಗಿದ್ದ ಅವರು, 1947ರಲ್ಲಿ ತಮ್ಮ 16ನೇ ವಯಸ್ಸಿನಲ್ಲಿಯೇ ಶ್ರೀನಿವಾಸರಾವ್ ಅವರೊಡನೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಪತಿಯ ನಿರುದ್ಯೋಗ ಮತ್ತು ಜವಾಬ್ದಾರಿರಹಿತ ವರ್ತನೆಯಿಂದಾಗಿ ತೀವ್ರ ಆರ್ಥಿಕ ಸಂಕಷ್ಟ ಎದುರಾಯಿತು. ಹುಟ್ಟಿದ ಮಗುವಿನ ಭವಿಷ್ಯಕ್ಕಾಗಿ ಕೇವಲ ಮೂರು ತಿಂಗಳ ಬಾಣಂತಿಯಾಗಿದ್ದಾಗಲೇ ಅವರು ಮದ್ರಾಸಿನ ಎ.ವಿ.ಎಂ ಸ್ಟುಡಿಯೋ ಮೆಟ್ಟಿಲೇರಿ ನಟನಾ ವೃತ್ತಿಗೆ ಇಳಿಯಬೇಕಾದ ಅನಿವಾರ್ಯತೆ ಎದುರಾಯಿತು. 22ನೇ ವಯಸ್ಸಿಗೆ ಮೂರು ಮಕ್ಕಳ ತಾಯಿಯಾಗಿದ್ದ ಅವರು, ಪತಿಯಿಂದ ಸೂಕ್ತ ಸ್ಪಂದನೆ ಸಿಗದೆ, ತಮ್ಮ ಬದುಕಿನುದ್ದಕ್ಕೂ ಕೇವಲ ‘ರಾಜಿ’ಯ ಮೂಲಕವೇ ನೋವು ನುಂಗಿ ಮಕ್ಕಳನ್ನು ಬೆಳೆಸಿ ದೊಡ್ಡವರನ್ನಾಗಿ ಮಾಡಿದರು.
1950ರಲ್ಲಿ ಎನ್.ಟಿ.ರಾಮರಾವ್ ನಾಯಕನಾಗಿದ್ದ ‘ಶಾವುಕಾರು’ ತೆಲುಗು ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದ ಜಾನಕಿಯವರಿಗೆ ದೊರೆತ ಮೊದಲ ಸಂಭಾವನೆ 2,700 ರೂಪಾಯಿ. ಆ ಚಿತ್ರದ ಯಶಸ್ಸಿನ ಬಳಿಕ ಅವರ ಹೆಸರಿನೊಂದಿಗೆ ‘ಸಾಹುಕಾರ್’ ಶಾಶ್ವತವಾಗಿ ಉಳಿದುಕೊಂಡಿತು. ನಂತರ ನಿರ್ಮಾಪಕಿಯಾಗಿಯೂ ಬೆಳೆದ ಅವರು, ಅಂದಿನಿಂದ ಬರೋಬ್ಬರಿ ಏಳು ದಶಕಗಳ ಕಾಲ ಚಿತ್ರರಂಗದಲ್ಲಿ ಮಿಂಚಿದರು. ದಕ್ಷಿಣ ಭಾರತದ ದಿಗ್ಗಜರಾದ ಡಾ.ರಾಜ್‌ಕುಮಾರ್, ಎಂ.ಜಿ.ಆರ್, ಎನ್.ಟಿ.ಆರ್, ಅಕ್ಕಿನೇನಿ ನಾಗೇಶ್ವರರಾವ್, ಶಿವಾಜಿ ಗಣೇಶನ್ ಮತ್ತು ಜೆಮಿನಿ ಗಣೇಶನ್ ಅವರಂತಹ ಖ್ಯಾತನಾಮರೊಂದಿಗೆ ಅಭಿನಯಿಸಿ ಜನಪ್ರಿಯತೆಯ ಉತ್ತುಂಗಕ್ಕೇರಿದರು. ಇವರ ಕಿರಿಯ ಸಹೋದರಿ, ದಿವಂಗತ ಕೃಷ್ಣ ಕುಮಾರಿ ಕೂಡ ಅಂದಿನ ಜನಪ್ರಿಯ ನಟಿಯಾಗಿದ್ದರು.
ಕನ್ನಡದ ‘ದೇವಕನ್ನಿಕಾ’, ‘ಗೌರಿ’, ‘ಭಾಗ್ಯಚಕ್ರ’, ‘ರತ್ನಗಿರಿ ರಹಸ್ಯ’, ‘ಸದಾರಮೆ’, ‘ಸ್ಕೂಲ್ ಮಾಸ್ಟರ್’ ಚಿತ್ರಗಳಲ್ಲಿ ನಾಯಕಿಯಾಗಿ, ‘ತಾಯಿಗೆ ತಕ್ಕ ಮಗ’, ‘ಶಬ್ದವೇದಿ’, ‘ಅಭಿ’, ‘ಕುಲಪುತ್ರ’ ಮುಂತಾದ ಚಿತ್ರಗಳಲ್ಲಿ ಪೋಷಕ ನಟಿಯಾಗಿ ಅವರು ಕನ್ನಡಿಗರ ಮನಗೆದ್ದಿದ್ದರು. ಸಿನಿಮಾ ರಂಗದ ಈ ಅಪಾರ ಸಾಧನೆಗಾಗಿ ಅವರಿಗೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ತಮಿಳುನಾಡಿನ ಕಲೈಮಾಮಣಿ, ಎಂ.ಜಿ.ಆರ್ ಪ್ರಶಸ್ತಿ, ಆಂಧ್ರಪ್ರದೇಶದ ನಂದಿ ಪ್ರಶಸ್ತಿ ಹಾಗೂ ಫಿಲಂಫೇರ್ ಜೀವಮಾನ ಸಾಧನೆ ಪ್ರಶಸ್ತಿ ಒಲಿದುಬಂದಿವೆ. ‘ಬದುಕು ಅನಿಶ್ಚಿತ, ತೆರೆ ಬಿದ್ದಾಗ ಶಾಂತಿಯುತವಾಗಿ ನಿರ್ಗಮಿಸುವುದಷ್ಟೇ ನನ್ನ ಆಸೆ’ ಎಂದಿದ್ದ ಹಿರಿಯ ನಟಿಯ ನಿಧನಕ್ಕೆ ಚಿತ್ರರಂಗ ಕಂಬನಿ ಮಿಡಿದಿದೆ.
ಏಳು ದಶಕಗಳ ಸುದೀರ್ಘ ವೃತ್ತಿಜೀವನದಲ್ಲಿ ನಾನೂರಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದ ಅವರು, ಐವತ್ತರ ದಶಕದಲ್ಲಿ ಎಲ್.ವಿ.ಪ್ರಸಾದ್ ನಿರ್ದೇಶನದ ‘ಶಾವುಕಾರು’ ಎಂಬ ತೆಲುಗು ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದರು. ಖ್ಯಾತ ನಟ ಹಾಗೂ ರಾಜಕಾರಣಿ ಎಂ.ಜಿ.ರಾಮಚಂದ್ರನ್ ಅವರ ಪತ್ನಿ ವಿ.ಎನ್.ಜಾನಕಿ ಅವರ ಹೆಸರಿನೊಂದಿಗೆ ಯಾವುದೇ ರೀತಿಯ ಗೊಂದಲವಾಗದಿರಲಿ ಎನ್ನುವ ಕಾರಣಕ್ಕಾಗಿ, ತಮ್ಮ ಚೊಚ್ಚಲ ಚಿತ್ರದ ಹೆಸರಿನಿಂದ ಅವರನ್ನು ಸಾಹುಕಾರ್ ಜಾನಕಿ ಎಂದು ಕರೆಯಲಾಯಿತು. ಅದೇ ಹೆಸರು ಅವರ ಜೀವನಪೂರ್ತಿ ಶಾಶ್ವತವಾಗಿ ಉಳಿದುಕೊಂಡಿತು.
ಅವರು ನಂತರದ ದಿನಗಳಲ್ಲಿ ತಮಿಳಿನ ಪುತಿಯ ಪರವೈ, ನೀರುಕುಮಿಳಿ, ಎದಿರ್ ನೀಚಲ್, ಉಯರ್ಂಧ ಮನಿದನ್, ಕಾವಿಯ ತಲೈವಿ, ತಿಲ್ಲು ಮುಲ್ಲು, ಪನಂ ಪಡುತುಂ ಪಾಡು ಹಾಗೂ ತೆಲುಗಿನ ರೋಜುಲು ಮಾರಾಯಿ, ಕನ್ಯಾಶುಲ್ಕಂ, ಪಾಂಡುರಂಗ ಮಹಾತ್ಯಂ, ಡಾಕ್ಟರ್ ಚಕ್ರವರ್ತಿ, ಅಕ್ಕ ಚೆಲ್ಲೆಲು, ಬಡಿ ಪಂತುಲು ಮುಂತಾದ ಹಲವಾರು ಅತ್ಯುತ್ತಮ ಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡರು. ಇತ್ತೀಚೆಗೆ ಎರಡು ಸಾವಿರದ ಇಪ್ಪತ್ತಮೂರರ ತೆಲುಗಿನ ಅನ್ನಿ ಮಂಚಿ ಶಕುನಮುಲೆ ಮತ್ತು ತಮಿಳಿನ ಬಿಸ್ಕೋತ್ ಚಿತ್ರಗಳಲ್ಲೂ ಬಣ್ಣ ಹಚ್ಚಿದ್ದರು ಎನ್ನುವುದು ವಿಶೇಷ.
ಕನ್ನಡ ಚಿತ್ರರಂಗಕ್ಕೂ ಅತ್ಯಮೂಲ್ಯ ಕೊಡುಗೆ ನೀಡಿರುವ ಸಾಹುಕಾರ್ ಜಾನಕಿ ಅವರು, ವರನಟ ಡಾ.ರಾಜ್‌ಕುಮಾರ್ ಜೊತೆಯಾಗಿ ಮಹಿಷಾಸುರ ಮರ್ದಿನಿ, ಸತಿ ಶಕ್ತಿ, ನವಕೋಟಿ ನಾರಾಯಣ ಹಾಗೂ ತಾಯಿಗೆ ತಕ್ಕ ಮಗ ಸಿನಿಮಾಗಳಲ್ಲಿ ಬಹಳ ಅದ್ಭುತ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಇವುಗಳ ಜೊತೆಗೆ ಕನ್ನಡದ ದೇವಕನ್ನಿಕಾ, ಸದಾರಮೆ ಮತ್ತು ಭಾಗ್ಯ ಚಕ್ರ ಸೇರಿದಂತೆ ಹಲವು ಚಿತ್ರಗಳಲ್ಲಿ ತಮ್ಮ ನೈಜ ನಟನೆಯ ಮೂಲಕ ಅಪಾರ ಕನ್ನಡಿಗರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ.
ಸಿನಿಮಾ ಕಲೆಗೆ ನೀಡಿದ ಜೀವಮಾನದ ಅಮೂಲ್ಯ ಕೊಡುಗೆಯನ್ನು ಗುರುತಿಸಿ ಭಾರತ ಸರ್ಕಾರವು ಎರಡು ಸಾವಿರದ ಇಪ್ಪತ್ತೆರಡರಲ್ಲಿ ನವದೆಹಲಿಯಲ್ಲಿ ಅವರಿಗೆ ಪ್ರತಿಷ್ಠಿತ ಪದ್ಮಶ್ರೀ ಪ್ರಶಸ್ತಿಯನ್ನು ಪ್ರದಾನ ಮಾಡಿ ಗೌರವಿಸಿದೆ. ಅವರು ಮೂವರು ಮಕ್ಕಳು, ನಾಲ್ವರು ಮೊಮ್ಮಕ್ಕಳು ಹಾಗೂ ನಾಲ್ವರು ಮರಿಮಕ್ಕಳನ್ನು ಅಗಲಿದ್ದಾರೆ. ಹಿರಿಯ ನಟಿಯ ನಿಧನಕ್ಕೆ ಇಡೀ ಚಿತ್ರರಂಗವು ಕಂಬನಿ ಮಿಡಿದಿದೆ.
