ದಿನೇ ದಿನೇ ಏರುತ್ತಲೇ ಇದ್ದ ಚಿನ್ನದ ದರ ಕಳೆದ ಒಂದು ವಾರದಿಂದ ದಾಖಲೆಯ ಮಟ್ಟದಲ್ಲಿ ಇಳಿಕೆಯಾಗುತ್ತಿದೆ. ಈ ಪ್ರೈಸ್ ಡ್ರಾಪ್ ಟ್ರೆಂಡ್ ಇನ್ನೂ ಕೆಲ ದಿನಗಳವರೆಗೆ ಮುಂದುವರೆದು 1 ಗ್ರಾಂ ಚಿನ್ನ ₹8-10 ಸಾವಿರಕ್ಕೆ ಇಳಿಯುವ ನಿರೀಕ್ಷೆ ಇದೆ ಎನ್ನುತ್ತಿದ್ದಾರೆ ತಜ್ಞರು. ಮದುವೆ, ಶುಭ ಸಮಾರಂಭದ ಸೀಸನ್ ಆಗಿರುವುದರಿಂದ ಗ್ರಾಹಕರಿಗೆ ಬಂಪರ್ ಆಫರ್ ಆದರೂ ಹೂಡಿಕೆದಾರರು ಆತಂಕದಲ್ಲಿದ್ದಾರೆ.
ಕಳೆದ ಏಳು ದಿನಗಳಲ್ಲಿ 24 ಕ್ಯಾರೆಟ್ ಚಿನ್ನದ ಬೆಲೆಯಲ್ಲಿ (10 ಗ್ರಾಂಗೆ) ಬರೋಬ್ಬರಿ ₹13,690ಗಳಷ್ಟು ಕುಸಿತ ಕಂಡಿದೆ. ಚಿನ್ನದ ಜೊತೆಗೆ ಬೆಳ್ಳಿ ಬೆಲೆಯೂ ಪಾತಾಳಕ್ಕೆ ಕುಸಿದಿದೆ. ಕೇವಲ ಒಂದು ವಾರದಲ್ಲಿ ಕೆಜಿಗೆ ಬರೋಬ್ಬರಿ ₹30,000ಗಳಷ್ಟು ಇಳಿದಿದೆ. ಜನವರಿಯಲ್ಲಿ ಕೆಜಿಗೆ ₹4 ಲಕ್ಷ ದಾಟಿದ್ದ ಬೆಳ್ಳಿ, ಇಂದು (ಮಾ.23) ₹2.5 ಲಕ್ಷದ ಆಸುಪಾಸಿಗೆ ಬಂದಿದೆ. ಹೈ-ರೇಟ್ ಇದ್ದಾಗ ಬೆಳ್ಳಿ ಕೊಂಡುಕೊಂಡವರಿಗೆ ಇದು ದೊಡ್ಡ ಶಾಕ್ ಅಂತೂ ನೀಡಿದೆ.
ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಡಾಲರ್ ಬಲಗೊಳ್ಳುತ್ತಿರುವುದು ಹಾಗೂ ಜಾಗತಿಕ ಬ್ಯಾಂಕ್ಗಳ ಬಡ್ಡಿದರ ನಿಯಮಗಳ ಅನಿಶ್ಚಿತತೆಯೇ ಚಿನ್ನ ಬೆಳ್ಳಿಯ ದಿಢೀರ್ ಕುಸಿತಕ್ಕೆ ಕಾರಣ ಎನ್ನಲಾಗುತ್ತಿದೆ.
ಪ್ರಮುಖವಾಗಿ ಆಭರಣ ತಯಾರಿಕೆಗೆ ಬಳಸುವ 22 ಕ್ಯಾರೆಟ್ ಚಿನ್ನದ ಬೆಲೆ ಇಂದು ಪ್ರತಿ 1 ಗ್ರಾಂಗೆ ₹12,435 ತಲುಪಿದ್ದು, 10 ಗ್ರಾಂ ಚಿನ್ನದ ಬೆಲೆ ₹1,24,350 ಗಳಲ್ಲಿ ವಹಿವಾಟು ನಡೆಸುತ್ತಿದೆ. ಹೂಡಿಕೆದಾರರ ನೆಚ್ಚಿನ ಶುದ್ಧ ಚಿನ್ನ ಅಂದರೆ, 24 ಕ್ಯಾರೆಟ್ ಬೆಲೆ ಇಂದು ಪ್ರತಿ 1 ಗ್ರಾಂಗೆ ₹13,565ಗಳಾಗಿದ್ದು, 10 ಗ್ರಾಂಗೆ ₹1,35,650 ನಿಗದಿಯಾಗಿದೆ. ಇನ್ನು ಬಜೆಟ್ ಸ್ನೇಹಿ ಎನ್ನಲಾಗುವ 18 ಕ್ಯಾರೆಟ್ ಚಿನ್ನದ ದರದಲ್ಲಿ ಇಂದು ಪ್ರತಿ 1 ಗ್ರಾಂಗೆ ₹10,174 ಹಾಗೂ 10 ಗ್ರಾಂಗೆ ₹1,01,740 ಗಳ ಆಸುಪಾಸಿನಲ್ಲಿದೆ. ಇನ್ನು ಬೆಳ್ಳಿ ಗ್ರಾಂಗೆ ₹230 ಗಳಿದ್ದು ಕೆಜಿಗೆ ₹2,30,000ಕ್ಕೆ ಮಾರಾಟವಾಗುತ್ತಿದೆ. ಕಳೆದ ಕೆಲವು ದಿನಗಳಿಗೆ ಹೋಲಿಸಿದರೆ ದರದಲ್ಲಿ ಕಂಡುಬರುತ್ತಿರುವ ಈ ಇಳಿಕೆಯು ಗ್ರಾಹಕರಿಗೆ ನಿರಾಳ ತಂದಿದೆ.
ಇದನ್ನೂ ಓದಿ: ಭಗತ್ ಸಿಂಗ್, ಸುಖ್ದೇವ್, ರಾಜ್ಗುರು |95 ವರ್ಷಗಳ ಹಿಂದೆ ಇಂದು ನೇಣುಗಂಬ ಏರಿದ್ದ ಸಿಡಿಲಮರಿಗಳು!
ಜಾಗತಿಕ ಮಾರುಕಟ್ಟೆಗಳು ಅನಿಶ್ಚಿತವಾದ್ದರಿಂದ ಇಂದು ಇರುವ ಬೆಲೆ ಬೆಳಗಾಗುವುದರೊಳಗೆ ಏರಿದ್ದರೆ ಅಚ್ಚರಿ ಪಡುವಂತಿಲ್ಲ, ಹಾಗೇ ಮತ್ತಷ್ಟು ಕಡಿಮೆಯಾದರೆ ಮಧ್ಯಮ ವರ್ಗ ಹಾಗೂ ಬಡವರ ಆಭರಣ ಕೊಳ್ಳುವ ಕನಸು ಒಂದಿಷ್ಟು ಚಿಗುರಬಹುದು ಎನ್ನುತ್ತಿದ್ದಾರೆ ಮಾರುಕಟ್ಟೆ ತಜ್ಞರು.
