ಕೊಚ್ಚಿಯ ವಿಜ್ಞಾನಿಗಳ ತಂಡ ಕಾವೇರಿ ಕಣಿವೆಯಲ್ಲಿ ಅಳಿವಿನಂಚಿನ ಅಪರೂಪದ ಮೀನು ಪತ್ತೆಯಾಗಿದ್ದು, ಕಾಗೆ ಮೀನು ಅಥವಾ ಲೆಬಿಯೊ ಕಾಗೆ ಎಂಬ ಹೆಸರಿನಿಂದ ಗುರುತಿಸಲಾಗಿರುವ ಈ ಮೀನಿನ ಪ್ರಭೇದವವು ಸೈಪ್ರಿನಾಡ್ ಸಿಹಿನೀರಿನ ಕುಟುಂಬಕ್ಕೆ ಸೇರಿದೆ.
ಮಂಡ್ಯದ ಗಗನಚುಕ್ಕಿ ಮತ್ತು ಚಾಮರಾಜನಗರದ ಭರಚುಕ್ಕಿ ಜಲಪಾತಗಳ ಕಣಿವೆಯಲ್ಲಿ ಈ ಮೀನುಗಳು ಕಂಡುಬಂದಿದ್ದು, ಕಡುಗಪ್ಪು ಬಣ್ಣದಿಂದ ಕಂಗೊಳಿಸುವ ಈ ಮೀನು ಬರೋಬ್ಬರಿ ಒಂದು ಕೆಜಿ ತೂಕವಿರುತ್ತದೆ ಎನ್ನಲಾಗಿದೆ. ಈ ಮೀನು ಕಲ್ಬಸು ಮೀನಿನ ತಳಿಯನ್ನೇ ಹೋಲುತ್ತದೆ. ಆದ್ದರಿಂದ ಜನ ಕಲ್ಬಸು ಎಂದೇ ಭಾವಿಸಿರುವುದಾಗಿ ವಿಜ್ಞಾನಿಗಳು ತಿಳಿಸಿದ್ದಾರೆ.
ಇದನ್ನೂ ಓದಿ> ಕಾವೇರಿ ಆರತಿಗಲ್ಲ – ನದಿ ಸಂರಕ್ಷಣೆಗೆ ಆದ್ಯತೆ ಕೊಡಿ!
ಕೊಚ್ಚಿಯ ರಾಹುಲ್ ಜಿ ಕುಮಾರ್, ಕೃಷ್ಣ ಪ್ರಸೂನ್, ವಿ ಬಶೀರ್, ಚಿಕ್ಕಮಗಳೂರಿನ ಚರಣ್ ರವಿ ವಿಜ್ಞಾನಿಗಳ ತಂಡ ಹುಡುಕಿರುವ ಈ ಮೀನು ತಳಿಯ ಕುರಿತ ಸಂಶೋಧನ ಪ್ರಬಂಧವು ʼಜರ್ನಲ್ ಆಫ್ ಫಿಶ್ ಬಯಲಾಜಿʼಯಲ್ಲಿ ಪ್ರಕಟವಾಗಿದೆ. 2019 ರಿಂದ ಸಂಶೋಧನಾ ನಿರತರಾಗಿದ್ದ ಕೊಚ್ಚಿಯ ಐಸಿಎಆರ್ ವಿಜ್ಞಾನಿಗಳ ತಂಡಕ್ಕೆ ಪ್ರಸ್ತುತ ವರ್ಷಾರಂಭದಲ್ಲಿ ಈ ಮೀನು ಸಿಕ್ಕಿದೆ.
This video cannot be played in your browser. Open the video directly
“ಮೀನಿನ ಬಣ್ಣ ಕಪ್ಪಗಿರುವುದರಿಂದ ಜನರು ಇದನ್ನು ಹೆಚ್ಚಾಗಿ ಸೇವಿಸುವುದಿಲ್ಲ. ಈ ಕಾರಣದಿಂದ ಇಲಾಖೆಯು ಇದರ ಮರಿ ಉತ್ಪಾದನೆಗೆ ಮುಂದಾಗಿಲ್ಲ. ಸುಮಾರು ಹತ್ತು ವರ್ಷಗಳ ಹಿಂದೆ ಕಾಣಿಸಿಕೊಂಡಿದ್ದ ಈ ತಳಿ ಪ್ರಸ್ತುತ ಅಳಿವಿನಂಚಿನಲ್ಲಿದೆ” ಎಂದು ಮೀನುಗಾರಿಕೆ ಇಲಾಖೆಯ ಉಪ ನಿರ್ದೇಶಕ ಮಂಜುನಾಥ್ ತಿಳಿಸಿದ್ದಾರೆ.
