ಪಶ್ಚಿಮ ಬಂಗಾಳದ ಹೊಸ ವಿಧಾನಸಭೆಗೆ ಆಯ್ಕೆಯಾದ ಶಾಸಕರಲ್ಲಿ ಶೇ 65 ರಷ್ಟು ಮಂದಿ ತಮ್ಮ ವಿರುದ್ಧ ಅಪರಾಧಿಕ ಪ್ರಕರಣಗಳಿವೆ ಎಂದು ಘೋಷಿಸಿಕೊಂಡಿದ್ದಾರೆ. 2021ರ ಚುನಾವಣೆಗಿಂತ ಈ ಬಾರಿಯ ಪ್ರಮಾಣ ತೀವ್ರವಾಗಿ ಏರಿಕೆಯಾಗಿದೆ ಎಂದು ‘ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್’ (ADR) ವರದಿ ತಿಳಿಸಿದೆ.
2026ರ ವಿಧಾನಸಭಾ ಚುನಾವಣೆಯಲ್ಲಿ ಆಯ್ಕೆಯಾದ 292 ಶಾಸಕರ ಅಫಿಡವಿಟ್ಗಳನ್ನು ವಿಶ್ಲೇಷಿಸಿ ಈ ವರದಿಯನ್ನು ಸಿದ್ಧಪಡಿಸಲಾಗಿದೆ.
ವರದಿಯ ಪ್ರಕಾರ, 292 ಶಾಸಕರಲ್ಲಿ 190 ಮಂದಿ (ಶೇ 65) ಶಾಸಕರ ವಿರುದ್ಧ ಅಪರಾಧ ಪ್ರಕರಣಗಳಿವೆ. 2021ರಲ್ಲಿ ಈ ಪ್ರಮಾಣ 142 (ಶೇ 49) ಇತ್ತು. ಇವರಲ್ಲಿ 170 ಶಾಸಕರು (ಶೇ 58) ಗಂಭೀರ ಅಪರಾಧ ಆರೋಪಗಳನ್ನು ಎದುರಿಸುತ್ತಿದ್ದಾರೆ (2021ರಲ್ಲಿ ಇದು ಶೇ 39 ರಷ್ಟಿತ್ತು). ಗಂಭೀರ ಆರೋಪಗಳ ಪೈಕಿ 14 ಮಂದಿಯ ಮೇಲೆ ಕೊಲೆ (ಐಪಿಸಿ ಸೆಕ್ಷನ್ 302), 54 ಮಂದಿಯ ಮೇಲೆ ಕೊಲೆ ಯತ್ನ ಹಾಗೂ 63 ಶಾಸಕರ ಮೇಲೆ ಮಹಿಳೆಯರ ವಿರುದ್ಧದ ದೌರ್ಜನ್ಯಕ್ಕೆ ಸಂಬಂಧಿಸಿದ ಪ್ರಕರಣಗಳಿವೆ. ಇವರಲ್ಲಿ ಇಬ್ಬರ ಮೇಲೆ ಅತ್ಯಾಚಾರ ಆರೋಪಗಳು ಕೂಡ ಇವೆ.
ಪಕ್ಷವಾರು ಅಪರಾಧಿ ಹಿನ್ನೆಲೆ
ಪಕ್ಷವಾರು ಅಂಕಿಅಂಶಗಳನ್ನು ಗಮನಿಸಿದರೆ, ಬಿಜೆಪಿಯ 206 ಶಾಸಕರಲ್ಲಿ 152 ಮಂದಿ (ಶೇ 74) ಅಪರಾಧ ಪ್ರಕರಣಗಳನ್ನು ಹೊಂದಿದ್ದಾರೆ. ಟಿಎಂಸಿಯ 80 ಶಾಸಕರಲ್ಲಿ 34 ಮಂದಿ (ಶೇ 43) ಆರೋಪಿಗಳಾಗಿದ್ದಾರೆ. ಆಮ್ ಜನತಾ ಉನ್ನಯನ್ ಪಾರ್ಟಿ, ಸಿಪಿಐ(ಎಂ) ಮತ್ತು ಆಲ್ ಇಂಡಿಯಾ ಸೆಕ್ಯುಲರ್ ಫ್ರಂಟ್ನಂತಹ ಸಣ್ಣ ಪಕ್ಷಗಳಿಂದ ಆಯ್ಕೆಯಾದ ಶಾಸಕರು ಆರೋಪಗಳನ್ನು ಹೊಂದಿದ್ದಾರೆ. ಆದರೆ, ಕಾಂಗ್ರೆಸ್ನಿಂದ ಆಯ್ಕೆಯಾದ ಇಬ್ಬರು ಶಾಸಕರ ಮೇಲೆ ಯಾವುದೇ ಅಪರಾಧ ಪ್ರಕರಣಗಳಿಲ್ಲ. ಗಂಭೀರ ಅಪರಾಧ ಆರೋಪಗಳಲ್ಲಿ ಬಿಜೆಪಿಯ ಶೇ 68 ಮತ್ತು ಟಿಎಂಸಿಯ ಶೇ 31 ರಷ್ಟು ಶಾಸಕರಿದ್ದಾರೆ.
ಇದನ್ನು ಓದಿದ್ದೀರಾ? ಗಲ್ಲಾಪೆಟ್ಟಿಗೆಯಿಂದ ಮತಪೆಟ್ಟಿಗೆ; ಜೋಸೆಫ್ ವಿಜಯ್ ಎಂಬ ಹೀರೋವಿನ ಸೂಪರ್ ಡ್ಯೂಪರ್ ಹಿಟ್ ರಾಜಕೀಯ ಪ್ರವೇಶ!
178 ಶಾಸಕರು ಕೋಟ್ಯಾಧಿಪತಿಗಳು
ಚುನಾಯಿತ ಪ್ರತಿನಿಧಿಗಳ ಸಂಪತ್ತಿನ ವಿವರಗಳು ಕೂಡ ವರದಿಯಲ್ಲಿ ಬಹಿರಂಗವಾಗಿವೆ. 292 ಶಾಸಕರಲ್ಲಿ 178 (ಶೇ 61) ಮಂದಿ ಕೋಟ್ಯಾಧಿಪತಿಗಳಾಗಿದ್ದಾರೆ. 2021ರಲ್ಲಿ ಇದು ಶೇ 54 ಇತ್ತು. ಎಲ್ಲಾ 292 ಶಾಸಕರ ಒಟ್ಟು ಘೋಷಿತ ಆಸ್ತಿ 1,091 ಕೋಟಿ ರೂ. ಪ್ರತಿ ಶಾಸಕರ ಸರಾಸರಿ ಆಸ್ತಿ 3.73 ಕೋಟಿ ರೂ. ಇದೆ. (ಹಿಂದಿನ ವಿಧಾನಸಭೆಯಲ್ಲಿ ಇದು 2.53 ಕೋಟಿ ರೂ. ಇತ್ತು). ಟಿಎಂಸಿ ಶಾಸಕರ ಸರಾಸರಿ ಆಸ್ತಿ 5.36 ಕೋಟಿ ರೂ. ಇದ್ದರೆ, ಬಿಜೆಪಿ ಶಾಸಕರದ್ದು 2.97 ಕೋಟಿ ರೂ. ಇದೆ. ಕಾಂಗ್ರೆಸ್ನಿಂದ ಆಯ್ಕೆಯಾದ ಇಬ್ಬರು ಶಾಸಕರು ಅತಿ ಹೆಚ್ಚು ಸರಾಸರಿ ಆಸ್ತಿ (17.92 ಕೋಟಿ ರೂ.) ಹೊಂದಿದ್ದಾರೆ.
ಶೈಕ್ಷಣಿಕ ಅರ್ಹತೆ ಮತ್ತು ವಯೋಮಿತಿ
ಶೈಕ್ಷಣಿಕ ಅರ್ಹತೆಗೆ ಸಂಬಂಧಿಸಿದಂತೆ, ಶೇ 63 ರಷ್ಟು ಶಾಸಕರು ಪದವೀಧರರು ಅಥವಾ ಅದಕ್ಕಿಂತ ಹೆಚ್ಚಿನ ವ್ಯಾಸಂಗ ಮಾಡಿದ್ದಾರೆ. ಶೇ 32 ರಷ್ಟು ಮಂದಿ 5ನೇ ತರಗತಿಯಿಂದ 12ನೇ ತರಗತಿಯವರೆಗೆ ಓದಿದ್ದಾರೆ. ಒಬ್ಬ ಶಾಸಕ ತಮ್ಮನ್ನು ಅನಕ್ಷರಸ್ಥ ಎಂದು ಘೋಷಿಸಿಕೊಂಡಿದ್ದಾರೆ. ವಯೋಮಾನದ ವಿವರಗಳಂತೆ, ಹೆಚ್ಚಿನ ಶಾಸಕರು (ಶೇ 63) 41 ರಿಂದ 60 ವರ್ಷದ ಒಳಗಿನವರು. ಕೇವಲ ಶೇ 16 ರಷ್ಟು ಮಂದಿ 25 ರಿಂದ 40 ವರ್ಷದವರು. ಶೇ 20 ರಷ್ಟು ಮಂದಿ 61 ರಿಂದ 80 ವರ್ಷದ ಒಳಗಿನವರಾಗಿದ್ದು, ಮೂವರು ಶಾಸಕರು 80 ವರ್ಷಕ್ಕಿಂತ ಮೇಲ್ಪಟ್ಟವರಾಗಿದ್ದಾರೆ.
ಮಹಿಳಾ ಪ್ರಾತಿನಿಧ್ಯ
ಮಹಿಳೆಯರ ಪ್ರಾತಿನಿಧ್ಯ ಇನ್ನೂ ಕೂಡ ಕಡಿಮೆಯಿದ್ದು, 292 ಶಾಸಕರಲ್ಲಿ ಕೇವಲ 37 (ಶೇ 13) ಮಂದಿ ಮಾತ್ರ ಮಹಿಳಾ ಶಾಸಕರಿದ್ದಾರೆ. 2021ರಲ್ಲಿ ಇದು ಶೇ 14 ಇತ್ತು ಎಂದು ವರದಿ ತಿಳಿಸಿದೆ.
