ಬಳ್ಳಾರಿ ನಗರದ ಕ್ಷೇತ್ರದಲ್ಲಿ ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷದಿಂದ ಗಣಿ ಉದ್ಯಮಿ ಗಾಲಿ ಜನಾರ್ದನ ರೆಡ್ಡಿ ಅವರ ಪತ್ನಿ ಜಿ ಲಕ್ಷ್ಮಿಅರುಣಾ ಕಣಕ್ಕಿಳಿದಿದ್ದಾರೆ. ಅವರು ಸೋಮವಾರ ನಾಮಪತ್ರ ಸಲ್ಲಿಸಿದ್ದು, ತಮ್ಮ ಬಳಿಯಿರುವ ಆಸ್ತಿಯನ್ನು ಘೋಷಿಸಿದ್ದಾರೆ. ಅರುಣಾ ಮತ್ತು ಅವರ ಪತಿ ಜನಾರ್ದನ ರೆಡ್ಡಿ ಸೇರಿ 84 ಕೆಜಿ ವಜ್ರ, ಚಿನ್ನ ಮತ್ತು 437 ಕೆಜಿ ಬೆಳ್ಳಿ ಸೇರಿದಂತೆ 250 ಕೋಟಿ ರೂಪಾಯಿ ಮೌಲ್ಯದ ಆಸ್ತಿ ಹೊಂದಿದ್ದಾರೆ ಎಂದು ಬಹಿರಂಗಪಡಿಸಿದ್ದಾರೆ. ಅಲ್ಲದೆ, ಯಾವುದೇ ಖರ್ಚ-ವೆಚ್ಚವನ್ನು ಹೊಂದಿಲ್ಲ ಎಂದು ಹೇಳಿದ್ದಾರೆ.
ಕಳೆದ ವರ್ಷ ಡಿಸೆಂಬರ್ 25 ರಂದು ಬಿಜೆಪಿ ತೊರೆದ ಜನಾರ್ದನ ರೆಡ್ಡಿ ಕೆಆರ್ಪಿ ಪಕ್ಷವನ್ನು ಕಟ್ಟಿದ್ದಾರೆ. ರೆಡ್ಡಿ ಅವರು ಕೊಪ್ಪಳ ಜಿಲ್ಲೆಯ ಗಂಗಾವತಿ ಕ್ಷೇತ್ರದಿಂದ ಸ್ಪರ್ಧಿಸಲು ಸಜ್ಜಾಗಿದ್ದಾರೆ. ಪತ್ನಿ ಲಕ್ಷ್ಮಿ ಅರುಣಾ ಅವರಿಂತ ರೆಡ್ಡಿ ಹೆಚ್ಚು ವಜ್ರ ಮತ್ತು ಚಿನ್ನವನ್ನು ಹೊಂದಿದ್ದಾರೆ. ಅಫಿಡವಿಟ್ ಪ್ರಕಾರ, ರೆಡ್ಡಿ 46 ಕೆಜಿ ವಜ್ರ ಮತ್ತು ಚಿನ್ನವನ್ನು ಹೊಂದಿದ್ದರೆ, ಪತ್ನಿ 38 ಕೆಜಿ ದುಬಾರಿ ಆಭರಣವನ್ನು ಹೊಂದಿದ್ದಾರೆ.
ತಾನು ಮತ್ತು ತನ್ನ ಪತಿ ವ್ಯಾಪಾರ ಮತ್ತು ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದೇವೆ ಎಂದು ಘೋಷಿಸಿರುವ ಲಕ್ಷ್ಮಿಅರುಣಾ ಅವರು ಖಾಸಗಿ ಸಾರಿಗೆ, ಗಣಿಗಾರಿಕೆ, ವಿಮಾನಯಾನ ಮತ್ತು ಕೈಗಾರಿಕಾ ಕ್ಷೇತ್ರಗಳಲ್ಲಿ ಹನ್ನೆರಡು ಕಂಪನಿಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ಅರುಣಾ ಅವರ ಹೂಡಿಕೆಯು 79 ಕೋಟಿ ರೂ.ಗಳಷ್ಟಿದ್ದರೆ, ಅವರ ಪತಿ ರೆಡ್ಡಿಯವರ ಹೂಡಿಕೆಯು ಸುಮಾರು 21 ಕೋಟಿ ರೂ.ಗಳಷ್ಟಿದೆ.
ಕುತೂಹಲಕಾರಿಯಾಗಿ, ವಿಮಾನಯಾನ ಕಂಪನಿಯಲ್ಲಿ ಹೂಡಿಕೆ ಮಾಡಿರುವ ಹೊರತಾಗಿಯೂ, ದಂಪತಿಗಳು ಯಾವುದೇ ವಿಮಾನ ಅಥವಾ ಖಾಸಗಿ ವಾಹನಗಳನ್ನು ಹೊಂದಿಲ್ಲವೆಂದು ಹೇಳಿಕೊಂಡಿದ್ದಾರೆ. ಆದರೆ, ಜನಾರ್ದನ ರೆಡ್ಡಿ ಅವರ ಗಣಿಗಾರಿಕೆ ನಿರರ್ಗಳವಾಗಿ ನಡೆಯುತ್ತಿದ್ದಾಗ, ಅವರು ಹೆಲಿಕಾಪ್ಟರ್ಗಳು ಮತ್ತು ಖಾಸಗಿ ಜೆಟ್ಗಳಲ್ಲಿ ಬಳ್ಳಾರಿ ಮತ್ತು ಬೆಂಗಳೂರು ನಡುವೆ ಸಂಚರಿಸುತ್ತಿದ್ದರು.
ಈ ಸುದ್ದಿ ಓದಿದ್ದೀರಾ?: ಚುನಾವಣೆ 2023 | ಬಿಎಸ್ವೈ ಪುತ್ರ ವಿಜಯೇಂದ್ರ ಘೋಷಿತ ಆಸ್ತಿ ಮೌಲ್ಯ ₹126 ಕೋಟಿ
2008 ಮತ್ತು 2010ರ ಅವಧಿಯಲ್ಲಿ ಗಣಿಗಾರಿಕೆಯ ಭರಾಟೆಯಲ್ಲಿ ಅರುಣಾ ಅವರು ಹೆಚ್ಚಿನ ಭೂಮಿಯನ್ನು ಖರೀದಿಸಿದ್ದಾರೆ. ಅವರು ಕರ್ನಾಟಕ ಮತ್ತು ಆಂಧ್ರಪ್ರದೇಶದಲ್ಲಿ 93 ಕೃಷಿ ಆಸ್ತಿ ಹೊಂದಿದ್ದಾರೆ. ಅಲ್ಲದೆ, 2021 ಮತ್ತು 2022ರಲ್ಲಿ ಬಳ್ಳಾರಿ ನಗರದಲ್ಲಿ ಕೆಲವು ನಿವೇಶನಗಳನ್ನು ಖರೀದಿಸಿದ್ದಾರೆ.
ಅರುಣಾ ಅವರು ಎಲ್ಐಸಿಯಿಂದ ಸಂಭಾವನೆ, ಬಡ್ಡಿ, ಬಾಡಿಗೆ ಮತ್ತು ಪಿಂಚಣಿಗಳು ತಮ್ಮ ಆದಾಯ ಮೂಲಗಳೆಂದು ಅಫಿಡೆವಿಟ್ನಲ್ಲಿ ಹೇಳಿದ್ದಾರೆ.