ರಾಜ್ಯದಲ್ಲಿ ‘ಪನೀರ್’ ಹೆಸರಿನಲ್ಲಿ ಮಾರಾಟವಾಗುತ್ತಿರುವ ಕೃತಕ ಅನಲಾಗ್ ಪನೀರ್ (Analogue Paneer) ತಯಾರಿಕೆ, ಸಂಗ್ರಹಣೆ, ವಿತರಣೆ ಮತ್ತು ಮಾರಾಟವನ್ನು ಒಂದು ವರ್ಷದ ಅವಧಿಗೆ ನಿಷೇಧಿಸಿ ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಇಲಾಖೆ ಮಹತ್ವದ ಆದೇಶ ಹೊರಡಿಸಿದೆ.
ಆಹಾರ ಸುರಕ್ಷತಾ ಆಯುಕ್ತರಾದ ಶ್ರೀನಿವಾಸ ಕೆ. (IAS) ಅವರು ಆಗಸ್ಟ್ 17ರಂದು ಈ ಆದೇಶವನ್ನು ಪ್ರಕಟಿಸಿದ್ದು, ಸರ್ಕಾರಿ ಗೆಜೆಟ್ನಲ್ಲಿ ಪ್ರಕಟವಾದ ದಿನಾಂಕದಿಂದ ಒಂದು ವರ್ಷದ ಅವಧಿಗೆ ಈ ನಿಷೇಧ ಜಾರಿಯಲ್ಲಿರುತ್ತದೆ.
ಇದನ್ನೂ ಓದಿ: ಬೀದರ್ ನಗರದ ವಿವಿಧ ಹೋಟೆಲ್‌, ರೆಸ್ಟೋರೆಂಟ್‌ಗಳಲ್ಲಿ ಅವಧಿ ಮೀರಿದ ಆಹಾರ ಪದಾರ್ಥ ಪತ್ತೆ
ಏನಿದು ಅನಲಾಗ್ ಪನೀರ್?
ಅನಲಾಗ್ ಪನೀರ್ ಎಂದರೆ ನೈಜ ಪನೀರ್‌ನಂತೆ ಕಾಣುವ, ಆದರೆ ತಾಳೆ ಎಣ್ಣೆ (ಪಾಮ್ ಆಯಿಲ್), ಕೈಗಾರಿಕಾ ಪಿಷ್ಠ ಮತ್ತು ಇತರ ರಾಸಾಯನಿಕಗಳನ್ನು ಬಳಸಿ ತಯಾರಿಸಲಾಗುವ ಕಾರ್ಖಾನೆಯಲ್ಲಿ ತಯಾರಾದ ಕೃತಕ ಉತ್ಪನ್ನವಾಗಿದೆ. ಇದರಲ್ಲಿ ಯಾವುದೇ ನೈಸರ್ಗಿಕ ಡೈರಿ (ಹಾಲು) ಅಂಶಗಳಿರುವುದಿಲ್ಲ. ಅಂದರೆ, ಹಾಲಿನ ಕೊಬ್ಬಿನ ಬದಲಿಗೆ ತರಕಾರಿ ಎಣ್ಣೆ ಅಥವಾ ಇತರ ಡೈರಿಯೇತರ ಪದಾರ್ಥಗಳನ್ನು ಬಳಸಿ ತಯಾರಿಸಲಾಗುವ ಉತ್ಪನ್ನವೇ ‘ಅನಲಾಗ್ ಪನೀರ್’. ಇದು ನಕಲಿ ಪನೀರ್.
ನಿಷೇಧಕ್ಕೆ ಕಾರಣವೇನು?
ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನಕಗಳ ಕಾಯ್ದೆ-2006ರ ಸೆಕ್ಷನ್ 30(2)(a) ಅಡಿಯಲ್ಲಿ ಸಾರ್ವಜನಿಕ ಆರೋಗ್ಯದ ಹಿತದೃಷ್ಟಿಯಿಂದ ಈ ಆದೇಶ ಹೊರಡಿಸಲಾಗಿದೆ.
ಪ್ರಮುಖ ಕಾರಣಗಳು:
- ಗುಣಮಟ್ಟದ ಕೊರತೆ: ಕೇಂದ್ರ ಸಲಹಾ ಸಮಿತಿಯ 48ನೇ ಸಭೆಯಲ್ಲಿ (14.10.2025) ಅನಲಾಗ್ ಪನೀರ್‌ಗೆ ನಿರ್ದಿಷ್ಟ ಗುಣಮಟ್ಟದ ಮಾನದಂಡಗಳನ್ನು ನಿಗದಿಪಡಿಸದಿರುವುದು ಚರ್ಚೆಯಾಗಿತ್ತು. ಈ ಮಾನದಂಡಗಳ ಅನುಪಸ್ಥಿತಿಯಲ್ಲಿ ಕ್ಷೇತ್ರ ಮಟ್ಟದಲ್ಲಿ ಪರಿಣಾಮಕಾರಿ ಕ್ರಮ ಕೈಗೊಳ್ಳುವುದು ಕಷ್ಟಕರವಾಗಿದೆ.
- ಗ್ರಾಹಕರ ದಾರಿ ತಪ್ಪಿಸುವಿಕೆ: ಅನಲಾಗ್ ಪನೀರ್ ಅನ್ನು ನೈಜ ಪನೀರ್ ಎಂದು ಮಾರಾಟ ಮಾಡುವುದು ಗ್ರಾಹಕರನ್ನು ದಾರಿ ತಪ್ಪಿಸುತ್ತದೆ. ವಿಶೇಷವಾಗಿ ಪನೀರ್ ಅನ್ನು ಪ್ರೋಟೀನ್ ಮೂಲವಾಗಿ ಅವಲಂಬಿಸಿರುವವರ ಹಿತಾಸಕ್ತಿಗೆ ಇದು ಧಕ್ಕೆ ತರಬಹುದು.
- ನಿಯಮಗಳ ಉಲ್ಲಂಘನೆ: ಡೈರಿಯೇತರ ಪದಾರ್ಥಗಳ ಬಳಕೆಯ ಕಡ್ಡಾಯ ಘೋಷಣೆಯನ್ನು ಮಾಡದಿರುವುದು ನಿಯಮಾವಳಿ 2.1.1(5)(b) ಅಡಿಯಲ್ಲಿ ಲೇಬಲಿಂಗ್ ನಿಯಮಗಳ ಉಲ್ಲಂಘನೆಯಾಗಿದೆ.
ಸುಪ್ರೀಂ ಕೋರ್ಟ್ ನಿರ್ದೇಶನ
ಸ್ವಾಮಿ ಅಚ್ಯುತಾನಂದ ತೀರ್ಥ್ ಮತ್ತು ಇತರರು vs ಭಾರತ ಒಕ್ಕೂಟ ಮತ್ತು ಇತರರು (2016) ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ಹಾಲು ಮತ್ತು ಹಾಲು ಉತ್ಪನ್ನಗಳಲ್ಲಿ ವ್ಯಾಪಕವಾದ ಮಿಶ್ರಣದ ಬಗ್ಗೆ ಗಂಭೀರವಾಗಿ ಗಮನಿಸಿ, ಪರಿಣಾಮಕಾರಿ ತಡೆಗಟ್ಟುವ ಕ್ರಮಗಳನ್ನು ಕೈಗೊಳ್ಳುವಂತೆ ನಿರ್ದೇಶನ ನೀಡಿತ್ತು.
ಯಾವುದಕ್ಕೆ ನಿಷೇಧವಿಲ್ಲ?
ಈ ಆದೇಶವು ಕೇವಲ ಡೈರಿ ಅನಲಾಗ್ ಉತ್ಪನ್ನಗಳಿಗೆ ಮಾತ್ರ ಅನ್ವಯಿಸುತ್ತದೆ. ಪ್ರತ್ಯೇಕ ಮಾನದಂಡಗಳನ್ನು ಹೊಂದಿರುವ ಫ್ರೋಜನ್ ಡೆಸರ್ಟ್ (ಘನೀಕೃತ ಸಿಹಿತಿಂಡಿ), ಪ್ರೊಸೆಸ್ಡ್ ಚೀಸ್ ಮತ್ತು ಮಿಕ್ಸ್ಡ್ ಫ್ಯಾಟ್ ಸ್ಪ್ರೆಡರ್‌ಗಳಿಗೆ ಈ ನಿಷೇಧ ಅನ್ವಯಿಸುವುದಿಲ್ಲ.
ಇದನ್ನೂ ಓದಿ: ಉತ್ತರ ಪ್ರದೇಶ | ಪನೀರ್ ಖಾದ್ಯದಲ್ಲಿ ಸತ್ತ ಇಲಿ ಪತ್ತೆ: ವಿಡಿಯೋ ವೈರಲ್
ಆಹಾರ ವ್ಯಾಪಾರಿಗಳಿಗೆ ಎಚ್ಚರಿಕೆ
ಆಹಾರ ಸುರಕ್ಷತಾ ಇಲಾಖೆಯು ಎಲ್ಲ ಆಹಾರ ವ್ಯಾಪಾರಿಗಳಿಗೆ (Food Business Operators) ಅನಲಾಗ್ ಪನೀರ್ ಅನ್ನು ಯಾವುದೇ ಆಹಾರ ಉತ್ಪನ್ನ ಅಥವಾ ಖಾದ್ಯ ತಯಾರಿಕೆಯಲ್ಲಿ ಬಳಸುವುದು, ಸಂಗ್ರಹಿಸುವುದು, ಸರಬರಾಜು ಮಾಡುವುದು ಅಥವಾ ಮಾರಾಟ ಮಾಡುವುದನ್ನು ನಿಷೇಧಿಸಿದೆ.
ಹೋಟೆಲ್‌ಗಳು ಮತ್ತು ರೆಸ್ಟೋರೆಂಟ್‌ಗಳಲ್ಲಿ ಅಸಲಿ ಡೈರಿ ಪನ್ನೀರ್ ಬದಲಿಗೆ ಅತ್ಯಂತ ಕಡಿಮೆ ವೆಚ್ಚದ ಕೃತಕ ಅನಲಾಗ್ ಪನೀರ್ ನೀಡುತ್ತಿರುವ ಆರೋಪಗಳ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಕರ್ನಾಟಕಕ್ಕೂ ಮುನ್ನ ಛತ್ತೀಸ್‌ಗಢ, ಮಹಾರಾಷ್ಟ್ರ, ಗುಜರಾತ್ ಮತ್ತು ಹಿಮಾಚಲ ಪ್ರದೇಶಗಳು ಅನಲಾಗ್ ಪನೀರ್ ವಿರುದ್ಧ ನಿಷೇಧ ಹೇರಿದ್ದವು. ಈಗ ಕರ್ನಾಟಕವೂ ಈ ಪಟ್ಟಿಗೆ ಸೇರ್ಪಡೆಯಾಗಿದೆ.
ಈ ಆದೇಶವು ಸರ್ಕಾರಿ ಗೆಜೆಟ್ನಲ್ಲಿ ಪ್ರಕಟವಾದ ದಿನಾಂಕದಿಂದ (ಆಗಸ್ಟ್ 17, 2026) ಒಂದು ವರ್ಷದ ಅವಧಿಗೆ ಜಾರಿಯಲ್ಲಿರುತ್ತದೆ.
