ನಗರದ ಕಲಾಮಂದಿರದ ಆವರಣದಲ್ಲಿರುವ ಕಿರು ರಂಗಮಂದಿರದಲ್ಲಿ ಶನಿವಾರ ಸಂಜೆ ನಡೆದ ಏಕವ್ಯಕ್ತಿ ನಾಟಕೋತ್ಸವದ ಎರಡನೇ ದಿನದ ಕಾರ್ಯಕ್ರಮವು ಕಲಾರಸಿಕರ ಮನಸ್ಸನ್ನು ಆಳವಾಗಿ ಸ್ಪರ್ಶಿಸಿತು. ಕರ್ನಾಟಕ ಏಕೀಕರಣ ಟ್ರಸ್ಟ್ (ರಿ), ಮೈಸೂರು ವತಿಯಿಂದ ಸ್ವಾತಂತ್ರ್ಯ ಹಾಗೂ ಕರ್ನಾಟಕ ಏಕೀಕರಣ ಹೋರಾಟಗಾರ ಡಾ. ಸಿದ್ದನಾಥ ಬಳ್ಳಾರಿ ಅವರ ಸ್ಮರಣಾರ್ಥ ಆಯೋಜಿಸಿದ್ದ ನಾಟಕೋತ್ಸವದಲ್ಲಿ ಪ್ರದರ್ಶನಗೊಂಡ ‘ಅಕ್ಕ ನಾಗಲಾಂಬಿಕೆ’ ಏಕವ್ಯಕ್ತಿ ನಾಟಕವು ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆಗೆ ಪಾತ್ರವಾಯಿತು.
ಕಾರ್ಯಕ್ರಮವನ್ನು ಉಪನ್ಯಾಸಕರಾದ ಶಿವಮಲ್ಲು ಕುನ್ನೂರು, ಕಾಳೀಪ್ರಸಾದ್, ಡಾ. ಸುಜಾತ ಅಕ್ಕಿ, ರಂಗಕರ್ಮಿ ಎನ್.ಎಸ್. ಗೋಪಿನಾಥ್ ಹಾಗೂ ರಂಗ ನಿರ್ದೇಶಕ ಅರಸೀಕೆರೆ ಯೋಗಾನಂದ ಅವರು ಜಂಟಿಯಾಗಿ ಉದ್ಘಾಟಿಸಿದರು.
ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಡಾ. ಸುಜಾತ ಅಕ್ಕಿ, “ಕರ್ನಾಟಕ ಏಕೀಕರಣಕ್ಕಾಗಿ ತಮ್ಮ ಬದುಕನ್ನೇ ಮುಡಿಪಾಗಿಟ್ಟ ಮಹನೀಯರನ್ನು ಸ್ಮರಿಸುವುದು ಹಾಗೂ ಅವರ ತ್ಯಾಗ, ಹೋರಾಟ ಮತ್ತು ಆದರ್ಶಗಳನ್ನು ಇಂದಿನ ಪೀಳಿಗೆಗೆ ತಲುಪಿಸುವ ಹೊಣೆಗಾರಿಕೆ ಸಮಾಜದ ಮೇಲಿದೆ ಎಂದು ಅಭಿಪ್ರಾಯಪಟ್ಟರು. ಇಂತಹ ನಾಟಕೋತ್ಸವಗಳು ಇತಿಹಾಸವನ್ನು ಜನಮಾನಸಕ್ಕೆ ಪರಿಚಯಿಸುವ ಮಹತ್ವದ ಮಾಧ್ಯಮಗಳಾಗಿವೆ” ಎಂದು ಹೇಳಿದರು.
ಬಳಿಕ ಪ್ರದರ್ಶನಗೊಂಡ ‘ಅಕ್ಕ ನಾಗಲಾಂಬಿಕೆ’ ನಾಟಕವು 12ನೇ ಶತಮಾನದಲ್ಲಿ ಬಸವಾದಿ ಶರಣರು ಕಟ್ಟಿದ ಸಮಸಮಾಜದ ಕನಸಿನಲ್ಲಿ ಬಸವಣ್ಣನವರ ಅಕ್ಕ ಅಕ್ಕ ನಾಗಲಾಂಬಿಕೆಯ ಪಾತ್ರವನ್ನು ಅತ್ಯಂತ ಪರಿಣಾಮಕಾರಿಯಾಗಿ ಅನಾವರಣಗೊಳಿಸಿತು. ಸಮಾನತೆ, ಮಾನವೀಯತೆ ಹಾಗೂ ಶರಣ ಸಂಸ್ಕೃತಿಯ ಮೌಲ್ಯಗಳನ್ನು ಭಾವಪೂರ್ಣವಾಗಿ ಕಟ್ಟಿಕೊಟ್ಟ ನಾಟಕವು ಪ್ರೇಕ್ಷಕರನ್ನು ಭಾವಪರವಶರನ್ನಾಗಿಸಿತು.
ನಾಟಕದಲ್ಲಿ ಡಾ. ದಿವ್ಯ ಬಿ.ಎಸ್. ಅವರು ಅಕ್ಕ ನಾಗಲಾಂಬಿಕೆಯ ಪಾತ್ರಕ್ಕೆ ಜೀವ ತುಂಬುವುದರ ಜೊತೆಗೆ ಬಸವಣ್ಣ, ಚನ್ನಬಸವಣ್ಣ, ತಂದೆ-ತಾಯಿ ಸೇರಿದಂತೆ ಹಲವು ಪಾತ್ರಗಳನ್ನು ಏಕಾಂಗಿಯಾಗಿ ಅಭಿನಯಿಸಿ ಗಮನ ಸೆಳೆದರು. ಇದು ಅವರ ಮೊದಲ ರಂಗಪ್ರವೇಶವಾಗಿದ್ದರೂ ಅನುಭವಿ ಕಲಾವಿದೆಯೊಬ್ಬರಂತೆ ಪ್ರತಿಯೊಂದು ಪಾತ್ರದ ಭಾವ, ಸಂವೇದನೆ ಮತ್ತು ವ್ಯಕ್ತಿತ್ವವನ್ನು ಸಹಜವಾಗಿ ಅಭಿವ್ಯಕ್ತಿಸಿದರು. ಅವರ ಅಭಿನಯದ ತೀವ್ರತೆ, ಧ್ವನಿಯ ಏರಿಳಿತ ಹಾಗೂ ಭಾವಾಭಿವ್ಯಕ್ತಿಯು ಪ್ರೇಕ್ಷಕರ ಮನಸ್ಸನ್ನು ಆಳವಾಗಿ ತಟ್ಟಿದ್ದು, ಹಲವರು ಭಾವುಕರಾಗುವಂತೆ ಮಾಡಿತು.
ನಾಟಕಕ್ಕೆ ಸಿದ್ಧೇಶ್ವರ ಬದನವಾಳು ಅವರ ಸಂಗೀತವು ಭಾವಸಾಂದ್ರತೆಯನ್ನು ಮತ್ತಷ್ಟು ಹೆಚ್ಚಿಸಿತು. ಬೆಳಕಿನ ವಿನ್ಯಾಸವು ಪ್ರತಿಯೊಂದು ದೃಶ್ಯದ ಮನೋಭಾವವನ್ನು ಪರಿಣಾಮಕಾರಿಯಾಗಿ ಮೂಡಿಸಿ, ಕಲಾವಿದೆಯ ಅಭಿನಯಕ್ಕೆ ಪೂರಕವಾಗಿ ನಿಂತಿತು. ರಂಗರೂಪ ಮತ್ತು ನಿರ್ದೇಶನದಲ್ಲಿ ಅರಸೀಕೆರೆ ಯೋಗಾನಂದ ಅವರ ಕಲಾತ್ಮಕತೆ ಪ್ರತಿಯೊಂದು ದೃಶ್ಯದಲ್ಲೂ ಎದ್ದು ಕಾಣುತ್ತಿದ್ದು, ನಾಟಕದ ಯಶಸ್ಸಿಗೆ ಪ್ರಮುಖ ಕಾರಣವಾಯಿತು.
ಅಕ್ಕ ನಾಗಲಾಂಬಿಕೆಯ ಆದರ್ಶ ಬದುಕು, ಸಮಾನತೆಯ ಸಂದೇಶ ಹಾಗೂ ಶರಣ ಸಂಸ್ಕೃತಿಯ ಮೌಲ್ಯಗಳನ್ನು ಜೀವಂತವಾಗಿ ಬಿಂಬಿಸಿದ ಈ ಏಕವ್ಯಕ್ತಿ ನಾಟಕವು ಪ್ರೇಕ್ಷಕರಿಗೆ ಅಪರೂಪದ ಕಲಾನುಭವವನ್ನು ನೀಡುವುದರ ಜೊತೆಗೆ ಸಾಮಾಜಿಕ ಜಾಗೃತಿಯ ಸಂದೇಶವನ್ನೂ ಪರಿಣಾಮಕಾರಿಯಾಗಿ ಸಾರಿತು.
ಈ ಸುದ್ದಿ ಓದಿದ್ದೀರಾ?ಟ್ರಂಪ್ ಆದೇಶ: ಇರಾನ್ ಮೇಲೆ ಅಮೆರಿಕ ಭಾರೀ ವೈಮಾನಿಕ ದಾಳಿ
ಕಾರ್ಯಕ್ರಮದಲ್ಲಿ ಪ್ರಗತಿಪರ ಚಿಂತಕರಾದ ನಾ. ದಿವಾಕರ್, ಹಿರಿಯ ರಂಗ ನಿರ್ದೇಶಕ ಶ್ರೀನಿವಾಸ್ ಪಾಲಹಳ್ಳಿ, ರಂಗ ನಿರ್ದೇಶಕಿ ಶೀಲಾ ಕುಮಾರಿ, ಸಾಹಿತಿ ಉಷಾ ನರಸಿಂಹನ್ ಸೇರಿದಂತೆ ಹಲವಾರು ಸಾಹಿತಿಗಳು, ರಂಗಕರ್ಮಿಗಳು ಹಾಗೂ ಕಲಾಭಿಮಾನಿಗಳು ಉಪಸ್ಥಿತರಿದ್ದು ನಾಟಕವನ್ನು ಆಸ್ವಾದಿಸಿದರು.
