ಬೆಳಗಾವಿ ಜಿಲ್ಲೆಯ ರಾಮದುರ್ಗ ತಾಲೂಕಿನ ಸಾಲಾಪೂರ ಗ್ರಾಮದ ನಾಟ್ಯ ಯೋಗ ರಂಗ ಸಂಸ್ಥೆಯ ವತಿಯಿಂದ ನಿರ್ದೇಶಕ ಶಕೀಲ್ ಅಹ್ಮದ್ ಅವರ ನಿರ್ದೇಶನದಲ್ಲಿ ‘ಕೊಡಲ್ಲ ಅಂದ್ರ್ ಕೊಡಲ್ಲ’ ನಾಟಕವನ್ನು ನಾಳೆ ಸಂಜೆ 6 ಗಂಟೆಗೆ ಸಾಲಾಪೂರ ಗ್ರಾಮದ ರಂಗಮಂದಿರದಲ್ಲಿ ಪ್ರದರ್ಶಿಸಲಾಗುತ್ತಿದೆ. ಮೈಸೂರಿನ ನಿರ್ದಿಗಂತ ತಂಡ ಪ್ರಸ್ತುತಪಡಿಸುತ್ತಿರುವ ಈ ನಾಟಕ, ಪ್ರಸಿದ್ಧ ನಾಟಕಕಾರ ದಾರಿಯೋ ಫೋ ಅವರ ‘ಕ್ಯಾಂಟ್ ಪೇ, ವೋಂಟ್ ಪೇ’ ನಾಟಕದ ಕನ್ನಡ ರೂಪಾಂತರವಾಗಿದ್ದು, ಬೆಲೆ ಏರಿಕೆ ಮತ್ತು ಆರ್ಥಿಕ ಒತ್ತಡದ ನಡುವಿನ ಸಾಮಾನ್ಯ ಜನರ ಹೋರಾಟವನ್ನು ಪ್ರಹಸನ ಶೈಲಿಯಲ್ಲಿ ಚಿತ್ರಿಸುತ್ತದೆ.
ಬೆಲೆ ಏರಿಕೆಯ ವಿರುದ್ಧ ಹಾಸ್ಯಭರಿತ ರಾಜಕೀಯ ಪ್ರಹಸನ
ಆಹಾರದ ಬೆಲೆ ಏರಿಕೆಯಿಂದ ಕೋಪಗೊಂಡ ಮಹಿಳೆಯರ ಗುಂಪೊಂದು ಸೂಪರ್ ಮಾರ್ಕೆಟ್‌ಗೆ ದಾಳಿ ಮಾಡಿ ಹಣ ನೀಡದೆ ದಿನಸಿಗಳನ್ನು ತೆಗೆದುಕೊಂಡು ಹೋಗುವುದರಿಂದ ಕಥೆ ಆರಂಭವಾಗುತ್ತದೆ. ಗಂಡಂದಿರ ಭೀತಿಯಿಂದ ಸಾಮಾನುಗಳನ್ನು ಹೊಟ್ಟೆಯಲ್ಲಿ ಬಚ್ಚಿಟ್ಟುಕೊಂಡು ಗರ್ಭಿಣಿಯರಂತೆ ನಟಿಸುವ ಮಹಿಳೆಯರ ಹಾಸ್ಯಾಸ್ಪದ ಘಟನೆಗಳು ರಂಗದಲ್ಲಿ ನಗುವಿನ ಜಲಪಾತ ಹರಿಸುತ್ತವೆ.
ಮೊದಲಿಗೆ ವಿರೋಧಿಸಿದ್ದ ಗಂಡಂದಿರು ಬಳಿಕ ಶ್ರೀಮಂತರ ಪರ ನಿಂತಿರುವ ವ್ಯವಸ್ಥೆಯ ಅನ್ಯಾಯವನ್ನು ಅರಿತು ತಮ್ಮ ಹೆಂಡತಿಯರ ಪಕ್ಕ ನಿಲ್ಲುವ ಮೂಲಕ ಕಥೆಯ ರಾಜಕೀಯ ತಿರುಳು ಮೂಡುತ್ತದೆ. ಅಧಿಕಾರದ ಮದದಲ್ಲಿರುವ ಪೊಲೀಸ್ ವ್ಯವಸ್ಥೆಯು ಜನರ ಒಗ್ಗಟ್ಟಿನ ಮುಂದೆ ನಿಷ್ಪ್ರಭವಾಗುವ ಚಿತ್ರಣವೂ ನಾಟಕದ ಕೇಂದ್ರಬಿಂದುವಾಗಿದೆ.
ವೇದಿಕೆಯ ಮೇಲಿರುವ ಕಲಾವಿದರು
ಸಲ್ಮಾ ದಂಡಿನ್, ದಿನೇಶ್ ನಾಯ್, ಚರಿತ್ ಸುವರ್ಣ, ಚರಿತಾ ಶಾರದಾ ಹಾಗೂ ಮಂಜುನಾಥ ಮಂಡಲಗೇರಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ತಾಂತ್ರಿಕ ತಂಡ
ರಂಗಸಜ್ಜಿಕೆ & ವೇಷಭೂಷಣ: ಶ್ವೇತಾರಾಣಿ ಎಚ್.ಕೆ
ಸಂಗೀತ: ಅನುಷ್ ಶೆಟ್ಟಿ
ಬೆಳಕಿನ ವಿನ್ಯಾಸ: ಮಂಜುನಾಥ ಹಿರೇಮಠ
ಪರಿಕರ: ವಿನೀತ್ ಕುಮಾರ್, ಚಿಕ್ಕಮಗಳೂರು
ತಂಡ ನಿರ್ವಹಣೆ: ಕಲ್ಲಪ್ಪ ಪೂಜೇರ್
ಬೆಳಕಿನ ನಿರ್ವಹಣೆ: ಆಸಿಫ್ ಹೂವಿನಹಡಗಲಿ
ನಿರ್ದಿಗಂತ – ಸಮಕಾಲೀನ ರಂಗಪ್ರಯೋಗಗಳ ಕೇಂದ್ರ
ಕಲಾವಿದ ಪ್ರಕಾಶ್ ರಾಜ್ ಅವರ ಸೃಜನಾತ್ಮಕ ಹಂಬಲದಿಂದ ಉದ್ಭವಿಸಿದ ನಿರ್ದಿಗಂತ, ಸಮಾನ ಮನಸ್ಕ ಕಲಾವಿದರ ಸಮೂಹವಾಗಿ ನವೀನ ರಂಗಭಾಷೆಯನ್ನು ಹುಡುಕುವ ಪ್ರಯತ್ನದಲ್ಲಿ ತೊಡಗಿದೆ. ಸಾರ್ವಜನಿಕ ಪ್ರದರ್ಶನಗಳು, ಕಾಲೇಜು ರಂಗ, ಶಾಲಾ ರಂಗವಿಕಾಸ, ಯುವ ನಿರ್ದೇಶಕರಿಗೆ ಬೆಂಬಲ ನೀಡುವ ಮೂಲಕ ರಂಗಭೂಮಿಯ ಮಟ್ಟದಲ್ಲಿ ದೊಡ್ಡ ಮಧ್ಯಪ್ರವೇಶಿಕೆ ಮಾಡುತ್ತಿದೆ. ದೇಶ–ವಿದೇಶಗಳ ರಂಗಕಲಾವಿದರು ಇಲ್ಲಿ ತರಬೇತಿ ನೀಡಿ ಹೊಸ ಪ್ರಯೋಗಗಳನ್ನು ನಡೆಸಿದ್ದಾರೆ.
