ಬೆಳಗಾವಿ ತಾಲೂಕಿನ ಯಳ್ಳೂರಿನಲ್ಲಿ ಸುಮಾರು 12 ವರ್ಷಗಳ ಹಿಂದೆ ನಡೆದ ‘ಮಹಾರಾಷ್ಟ್ರ ರಾಜ್ಯ ಯಳ್ಳೂರು’ ಫಲಕ ವಿವಾದಕ್ಕೆ ಸಂಬಂಧಿಸಿದ ಎಲ್ಲಾ ಆರೋಪಿಗಳನ್ನು ನ್ಯಾಯಾಲಯವು ನಿರ್ದೋಷಿ ಎಂದು ಘೋಷಿಸಿದೆ.
2014ರ ಜುಲೈ 27ರಂದು ಯಳ್ಳೂರಿನ ಗ್ರಾಮ ಸರಹದ್ದು ಗುರುತಿಸುವ ಫಲಕದ ಮೇಲೆ ‘ಯಳ್ಳೂರು, ಮಹಾರಾಷ್ಟ್ರ ರಾಜ್ಯ’ ಎಂದು ಬರೆಯಲಾಗಿತ್ತು. ಈ ಘಟನೆಗೆ ಆಕ್ರೋಶಗೊಂಡ ಕನ್ನಡಿಗರ ದೊಡ್ಡ ಗುಂಪು ಗ್ರಾಮಕ್ಕೆ ನುಗ್ಗಿ ಫಲಕವನ್ನು ಕಿತ್ತು ಹಾಕಿತ್ತು. ಈ ವೇಳೆ ಫಲಕ ಹಾಕಿದವರೂ ಪ್ರತಿರೋಧ ತೋರಿದ ಪರಿಣಾಮ, ಎರಡೂ ಗುಂಪುಗಳ ನಡುವೆ ಭಾರೀ ಗಲಭೆ, ಹೊಡೆದಾಟ ಹಾಗೂ ಕಲ್ಲು ತೂರಾಟ ನಡೆದಿದೆ. ಪರಿಸ್ಥಿತಿಯನ್ನು ನಿಯಂತ್ರಿಸಲು ಪೊಲೀಸರು ಲಾಠಿಚಾರ್ಜ್‌ ನಡೆಸಿದ್ದರು.
ಘಟನೆ ಬಳಿಕ ಪೊಲೀಸರು ಗ್ರಾಮದ 50 ಮಂದಿಯನ್ನು ಆರೋಪಿಗಳೆಂದು ಗುರುತಿಸಿ ಒಟ್ಟು ಏಳು ಪ್ರಕರಣಗಳನ್ನು ದಾಖಲಿಸಿದ್ದರು. ಇದರಲ್ಲಿ ಐದು ಪ್ರಕರಣಗಳಲ್ಲಿ ಆರೋಪಿಗಳು ಈಗಾಗಲೇ ಖುಲಾಸೆಯಾಗಿದ್ದರು. ಬುಧವಾರ ಹೊರಬಂದ ತೀರ್ಪಿನಲ್ಲಿ ಉಳಿದ ಎರಡು ಪ್ರಕರಣಗಳಲ್ಲೂ ಆರೋಪಿಗಳು ನಿರ್ದೋಷಿಗಳೆಂದು ನ್ಯಾಯಾಲಯ ಘೋಷಿಸಿದೆ.
ಪ್ರಕರಣದಲ್ಲಿ ಆರೋಪಿಗಳ ಪರವಾಗಿ ವಕೀಲರಾದ ಶ್ಯಾಮಸುಂದ‌ರ್ ಪತ್ತಾ‌ರ್, ಶ್ಯಾಮ್‌ ಪಾಟೀಲ ಹಾಗೂ ಹೇಮರಾಜ್ ಬೆಂಚನ್ನವರ ವಾದ ಮಂಡಿಸಿದರು. ಈ ಪ್ರಕರಣದಲ್ಲಿದ್ದ ಮೂವರು ಆರೋಪಿಗಳು ಈಗಾಗಲೇ ನಿಧನರಾಗಿದ್ದಾರೆ.
