ಜಿಲ್ಲೆಯ ರೈತರ ಜೀವನಾಡಿಯಾಗಿರುವ ಬೀದರ್ ಸಹಕಾರಿ ಸಕ್ಕರೆ ಕಾರ್ಖಾನೆ (ಬಿಎಸ್‌ಎಸ್‌ಕೆ) ಆಡಳಿತ ಮಂಡಳಿ ಮತ್ತು ವ್ಯವಸ್ಥಾಪಕ ನಿರ್ದೇಶಕರು ಕಾರ್ಮಿಕರ ಸುಮಾರು 1.19 ಕೋಟಿ ರೂ. ದುರುಪಯೋಗ ಮಾಡಿಕೊಂಡಿದ್ದು, ಆಡಳಿತ ಮಂಡಳಿಯ ಅಧ್ಯಕ್ಷ, ಉಪಾಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕರ ವಿರುದ್ಧ ಅಪರಾಧಿಕ ಪ್ರಕರಣ ದಾಖಲಿಸುವಂತೆ ಭಾರತ ಕಮ್ಯೂನಿಸ್ಟ್ ಪಕ್ಷ ಮತ್ತು ಅಖಿಲ ಭಾರತ ಕಿಸಾನ ಸಭಾ ಒತ್ತಾಯಿಸಿದೆ.
ಸಿಪಿಐ ಮತ್ತು ಎಐಕೆಎಸ್ ಕಾರ್ಯಕರ್ತರು ಜಂಟಿಯಾಗಿ ಬೀದರ್ ನಗರದ ಭಗತ್‌ ಸಿಂಗ್‌ ವೃತ್ತದಿಂದ ಜಿಲ್ಲಾಧಿಕಾರಿಗಳ ಕಚೇರಿಯವರೆಗೆ ಪ್ರತಿಭಟನಾ ಮೆರವಣಿಗೆ ಮೂಲಕ ತೆರಳಿ ಮುಖ್ಯಮಂತ್ರಿಗಳಿಗೆ ಬರೆದ ಹಕ್ಕೊತ್ತಾಯ ಪತ್ರವನ್ನು ಜಿಲ್ಲಾಧಿಕಾರಿ ಗೋವಿಂದ ರೆಡ್ಡಿ ಅವರಿಗೆ ಸಲ್ಲಿಸಿದರು.
ರೈತರ ಕಲ್ಪವೃಕ್ಷವಾಗಿದ್ದ ಹಳ್ಳಿಖೇಡ್ (ಬಿ) ಪಟ್ಟಣದ ಬೀದರ ಸಹಕಾರಿ ಸಕ್ಕರೆ ಕಾರ್ಖಾನೆ ಇದನ್ನು ಸಂಪೂರ್ಣವಾಗಿ ಮುಚ್ಚಲು ಇಂದಿನ ಆಡಳಿತ ಮಂಡಳಿ ಮತ್ತು ವ್ಯವಸ್ಥಾಪಕ ನಿರ್ದೇಶಕರು ಹೊಣೆಗಾರರಾಗಿದ್ದಾರೆ. ಸರ್ಕಾರದ ಅನುಮತಿ ಇಲ್ಲದೆಯೇ ಬಿಎಸ್‌ಎಸ್‌ಕೆ ಆಡಳಿತ ಮಂಡಳಿ ಬೀಗ್‌ ಹಾಕಿದ್ದಾರೆ. ರೈತರ ಬಾಕಿ ಹಣ, ಕಾರ್ಮಿಕರ ಭವಿಷ್ಯ ನಿಧಿ, ವಿಮೆ ಹಣ, ನಿವೃತ್ತಿ ಹಣ ಮತ್ತು ಕಾರ್ಮಿಕರ ಉಪದಾನ ಸಂದಾಯ ಹಣ ಕಾರ್ಖಾನೆಗೆ ಬಂದರೂ ಹಣವನ್ನು ನಿವೃತ್ತಿ ಹೊಂದಿರುವ ಕಾರ್ಮಿಕರಿಗೆ ಕೊಡಲಿಲ್ಲ. ಸರ್ಕಾರದ ಅನುಮತಿ ಇಲ್ಲದೆಯೇ ನೌಕರರನ್ನು ಕೆಲಸಕ್ಕೆ ತೆಗೆದುಕೊಳ್ಳದೇ ಕಾರ್ಖಾನೆಯನ್ನು ಮುಚ್ಚಲ್ಪಟ್ಟಿದೆ, ಕಾರ್ಮಿಕರು ಬೋನಸ್ ಮತ್ತು ಇತರೆ ಸೌಲಭ್ಯಗಳಿಂದ ವಂಚಿತರಾಗಿದ್ದಾರೆ ಎಂದು ಪ್ರತಿಭಟನಾಕಾರರು ಆರೋಪಿಸಿದರು.
ನೌಕರರ ಹಣ ದುರುಪಯೋಗ ಮಾಡಿಕೊಂಡಿರುವ ಆಡಳಿತ ಮಂಡಳಿ ಮತ್ತು ವ್ಯವಸ್ಥಾಪಕ ನಿರ್ದೇಶಕರನ್ನು ವಜಾಗೊಳಿಸಬೇಕು. ನೌಕರರ ಹಣ ದುರುಪಯೋಗ ಮಾಡಿಕೊಂಡಿರುವ ಆಡಳಿತ ಮಂಡಳಿ ಮತ್ತು ವ್ಯವಸ್ಥಾಪಕ ನಿರ್ದೇಶಕರ ವಿರುದ್ಧ ಅಪರಾಧಿಕ ಪ್ರಕರಣವನ್ನು ದಾಖಲಿಸಬೇಕು. ಆಡಳಿತ ಮಂಡಳಿ ಮತ್ತು ನೌಕರರ ಸಭೆ ಕರೆಯಬೇಕು. ಬಿಎಸ್‌ಎಸ್‌ಕೆ ಜವಾಬ್ದಾರಿ ಸರ್ಕಾರವೇ ವಹಿಸಿಕೊಳ್ಳಬೇಕು. ನೌಕರರಿಗೆ ಬರಬೇಕಾದ ಸಂಬಳ ಮತ್ತು ಇತರೆ ಬಾಕಿ ಹಣ ಹಾಗೂ ರೈತರಿಗೆ ಕೊಡಬೇಕಾದ ಬಾಕಿ ಹಣವನ್ನು ಸರ್ಕಾರದಿಂದ ಕೊಡಿಸಬೇಕು ಎಂದು ಒತ್ತಾಯಿಸಿದರು.
ಈ ಸುದ್ದಿ ಓದಿದ್ದೀರಾ? ಬೀದರ್ | ಆಟವಾಡುತ್ತಿದ್ದ ಮಗು ಮೇಲೆ ಹರಿದ ಕಾರು; ಸ್ಥಳದಲ್ಲೇ ಎರಡು ವರ್ಷದ ಮಗು ಸಾವು
ಈ ಸಂದರ್ಭದಲ್ಲಿ ಸಂಘಟನೆಯ ಪ್ರಮುಖರಾದ ಎಂ.ಡಿ. ಶಫಾಯತ್‌ಅಲಿ,ಬಾಬುರಾವ ಹೊನ್ನಾ, ಅಲಿ ಅಹ್ಮದ್ ಖಾನ್, ಚಾಂದೋಬಾ ಭೋಸ್ಲೆ, ನಜೀರ್ ಅಹ್ಮದ್, ಶಿವಾಜಿರಾವ ಭೋಸ್ಲೆ, ಪ್ರಭು ಹೊಚಕನಳ್ಳಿ, ನಿಜಾಮೋದ್ದೀನ್, ಖಮರ್ ಪಟೇಲ್, ಪ್ರಭು ತಗಣಿಕರ್, ಶಿವರಾಜ ಕಮಠಾಣ, ಪಾಂಡುರಂಗ ಪ್ಯಾಗೆ, ಶೇಖ ನವಾಜ್, ಜಿ.ಎ.ಭೋಸ್ಲೆ ವಾಗನಗೇರಾ, ಮೊಗಲಪ್ಪಾ ಸುಂದಾಳ, ಚಂದ್ರಕಲಾ, ಭೀಮಣ್ಣಾ ಭಂಡೆ, ಖಾದರ್ ಶಾಹ ಸೇರಿದಂತೆ ಇತರರಿದ್ದರು.
