ಚಾಲಕನ ನಿಯಂತ್ರಣ ತಪ್ಪಿ ಗೂಡ್ಸ್‌ ವಾಹನವೊಂದು ಬೈಕಿನ ಮೇಲೆ ಬಿದ್ದ ಪರಿಣಾಮ ತಂದೆ, ಮಗಳು ಸಾವನ್ನಪ್ಪಿದ್ದು, ತಾಯಿ ಗಂಭೀರವಾಗಿ ಗಾಯಗೊಂಡಿರುವ ಘಟನೆ ಶನಿವಾರ ರಾತ್ರಿ ಚಿಕ್ಕಬಳ್ಳಾಪುರ ತಾಲೂಕಿನ ಆವಲಗುರ್ಕಿಯ ಇಶಾ ಫೌಂಡೇಶನ್‌ ಗೇಟ್‌ ಬಳಿ ನಡೆದಿದೆ.
ಶನಿವಾರ ಇಶಾ ಫೌಂಡೇಶನ್‌ ನೋಡಲು ಬಂದಿದ್ದ ಬಂಡಹಳ್ಳಿ ಗ್ರಾಮದ ವೆಂಕಟೇಶ್‌, ಮಗಳು ದೀಕ್ಷಿತಾ ಮೃತ ದುರ್ದೈವಿಗಳು. ತಾಯಿ ರೂಪ ಗಂಭೀರವಾಗಿ ಗಾಯಗೊಂಡಿರವ ಮಹಿಳೆ.
ವೆಂಕಟೇಶ್‌ ದಂಪತಿ ತನ್ನ ಮಗಳೊಂದಿಗೆ ಶನಿವಾರ ರಾತ್ರಿ ಇಶಾ ದರ್ಶನಕ್ಕಾಗಿ ತೆರಳುತ್ತಿದ್ದರು ಎನ್ನಲಾಗಿದ್ದು, ಈ ವೇಳೆ ಗೂಡ್ಸ್‌ ವಾಹನ ಬೈಕ್‌ ಮೇಲೆ ಉರುಳಿ ಬಿದ್ದಿದೆ. ಬೈಕ್‌ ಮೇಲೆ ಗೂಡ್ಸ್‌ ವಾಹನ ಬಿದ್ದ ಪರಿಣಾಮ ತಂದೆ ವೆಂಕಟೇಶ್‌, ಮಗಳು ದೀಕ್ಷಿತಾ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ತಾಯಿ ರೂಪ ಅವರ ಎರಡು ಕಾಲುಗಳು ಮುರಿದು ಗಂಭೀರವಾಗಿ ಗಾಯಗೊಂಡಿದ್ದು, ಹೆಚ್ಚಿನ ಚಿಕಿತ್ಸೆಗಾಗಿ ಬೆಂಗಳೂರಿನ ಆಸ್ಪತ್ರೆಗೆ ರವಾನಿಸಲಾಗಿದೆ.
ಸ್ಥಳಕ್ಕೆ ಚಿಕ್ಕಬಳ್ಳಾಪುರ ಗ್ರಾಮಾಂತರ ಠಾಣೆ ಪೊಲೀಸರು ಆಗಮಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
