ಈ ವರ್ಷದ ಮೊದಲ ವಿದೇಶಿ ಕ್ರೂಸ್ ಶುಕ್ರವಾರದಂದು ನವ ಮಂಗಳೂರು ಬಂದರಿಗೆ ಆಗಮಿಸಿದ್ದು, ಅದರಲ್ಲಿದ್ದ ಅನೇಕ ವಿದೇಶಿ ಪ್ರವಾಸಿಗರು ಪಾಂಡೇಶ್ವರದಲ್ಲಿರುವ ಮಂಗಳೂರು ಪ್ರಧಾನ ಅಂಚೆ ಕಚೇರಿಗೆ ಭೇಟಿ ನೀಡಿದ್ದಾರೆ. ಅಂಚೆ ಸೇವೆ ಹಾಗೂ ಭಾರತದ ವಿವಿಧ ಅಂಚೆ ಚೀಟಿಗಳ ಬಗ್ಗೆ ಮಾಹಿತಿ ಪಡೆದು ಸಂತಸ ವ್ಯಕ್ತಪಡಿಸಿದರು.
ಮಂಗಳೂರು ಪ್ರಧಾನ ಅಂಚೆ ಕಚೇರಿಯಲ್ಲಿ ಇರುವ ಫಿಲಾಟೆಲಿಕ್ ಬ್ಯುರೋವು ಇದೀಗ ಅಧಿಕೃತ ಪ್ರವಾಸಿ ತಾಣವಾಗುವ ಪ್ರಕ್ರಿಯೆಯಲ್ಲಿದೆ. ಇಲ್ಲಿಗೆ ಭೇಟಿ ನೀಡಿದ ವಿದೇಶಿ ಪ್ರವಾಸಿಗರಿಗೆ ದೀಪಾ ಅವರು ಅಂಚೆ ಚೀಟಿಗಳ ಬಗ್ಗೆ ಸಮಗ್ರ ಮಾಹಿತಿ ನೀಡಿದರು. ಪ್ರವಾಸಿಗರು ಅಂಚೆ ಕಚೇರಿಯ ಕಾರ್ಯ ನಿರ್ವಹಣೆಯನ್ನು ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದರು. ಇಲ್ಲಿಂದಲೇ ಅವರು ಅವರವರ ದೇಶಕ್ಕೆ ಚಿತ್ರ ಸಹಿತ ಅಂಚೆ ಕಾರ್ಡ್‌ಗಳನ್ನು ಪೋಸ್ಟ್ ಮಾಡಿದರು.
ವರಿಷ್ಠ ಅಂಚೆ ಪಾಲಕ ಶ್ರೀನಾಥ್ ಬಸ್ರೂರು ಅವರು ವಿದೇಶಿ ಪ್ರವಾಸಿಗರನ್ನು ಸ್ವಾಗತಿಸಿ ಅವರಿಗೆ ಅಂಚೆ ಕಚೇರಿಯ ಸೇವೆಗಳ ಬಗ್ಗೆ ತಿಳಿಸಿದರು. ವಿದೇಶಿ ಪ್ರವಾಸಿಗರಿಗೆ ಭಾರತೀಯ ಅಂಚೆಯ ಬಗ್ಗೆ ಹೆಚ್ಚು ಮಾಹಿತಿ ನೀಡುವ ವಿಶೇಷ ಕಿಟ್‌ ಕೂಡ ಇಲ್ಲಿನ ಫಿಲಾಟೆಲಿಕ್ ಬ್ಯುರೋದಲ್ಲಿ ಲಭ್ಯವಾಗುವಂತೆ ವ್ಯವಸ್ಥೆ ಮಾಡಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಹಾಸನ | ಆಲೂರಿನಲ್ಲಿ ರೈಲುಗಳ ನಿಲುಗಡೆಗೆ ಆಗ್ರಹ
ಆಸ್ಟ್ರೇಲಿಯಾದ ಇಬ್ಬರು, ಸ್ಪೈನ್ ದೇಶದ ಇಬ್ಬರು, ಅಮೆರಿಕಾದ ಮೂವರು ಹಾಗೂ ನ್ಯೂಯಾರ್ಕ್‌ನ ಇಬ್ಬರು ಪ್ರವಾಸಿಗರು ಈ ತಂಡದಲ್ಲಿ ಇದ್ದರು.
