ಗ್ರಾಮೀಣ ಭಾಗಗಳಲ್ಲಿ ಸರ್ಕಾರಿ ಬಸ್‌ಗಳು ನಿಗದಿತ ಸಮಯಕ್ಕೆ ಸಂಚರಿಸದೆ ಇರುವುದರಿಂದ ವಿದ್ಯಾರ್ಥಿಗಳು, ಉದ್ಯೋಗಿಗಳು ಸೇರಿದಂತೆ ಸಾರ್ವಜನಿಕರು ತೀವ್ರ ತೊಂದರೆ ಅನುಭವಿಸುತ್ತಿದ್ದು, ನಿಗದಿತ ಮಾರ್ಗಗಳಲ್ಲಿ ಸಮರ್ಪಕ ಬಸ್ ಸೌಲಭ್ಯ ಕಲ್ಪಿಸುವಂತೆ ಒತ್ತಾಯಿಸಿ ಗ್ರಾಮಸ್ಥರು ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದ್ದಾರೆ.
ಮಂಡ್ಯ ಬಸ್ ನಿಲ್ದಾಣದಿಂದ ಸಂಜೆ 7.15ಕ್ಕೆ ಹೊರಟು ತಗ್ಗಹಳ್ಳಿ, ಸಬ್ಬನಹಳ್ಳಿ ಮಾರ್ಗವಾಗಿ ನರಸೀಪುರ ತಲುಪಬೇಕಿರುವ ಮಳವಳ್ಳಿ ಘಟಕದ ಮಾರ್ಗ ಸಂಖ್ಯೆ 69/70ರ ಬಸ್ ನಿಗದಿತ ಸಮಯಕ್ಕೆ ಸಂಚರಿಸುತ್ತಿಲ್ಲ. ಕೆಲವೊಮ್ಮೆ ಸಂಜೆ 6 ಗಂಟೆಗೆ ಅಥವಾ ರಾತ್ರಿ 8.30ಕ್ಕೆ ಹೊರಡುತ್ತಿರುವುದರಿಂದ ಪ್ರಯಾಣಿಕರಿಗೆ ತೀವ್ರ ಅನಾನುಕೂಲವಾಗುತ್ತಿದೆ. ಈ ಕುರಿತು ಕಳೆದ ಒಂದು ವರ್ಷದಿಂದ ಸಂಬಂಧಪಟ್ಟ ಅಧಿಕಾರಿಗಳಿಗೆ ಹಲವು ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಅಲ್ಲದೆ, ಉಳಿದ ಸಮಯಗಳಲ್ಲಿಯೂ ಮನವಿಯಲ್ಲಿ ತಿಳಿಸಿರುವ ಮಾರ್ಗದಲ್ಲಿ ಸಮರ್ಪಕವಾಗಿ ಬಸ್ ಸಂಚಾರ ನಡೆಸುತ್ತಿಲ್ಲ ಎಂದು ದೂರಿದ್ದಾರೆ.
ಮದ್ದೂರು ಘಟಕದಿಂದ ಬೆಳಿಗ್ಗೆ 7.55ಕ್ಕೆ ಮದ್ದೂರಿನಿಂದ ಹೊರಟು ಕೆ.ಎಂ.ದೊಡ್ಡಿ, ಗುಡಿಗೆರೆ, ಬಿದರಹಳ್ಳಿ, ಬಿದರಹೊಸಹಳ್ಳಿ, ಯಲದಹಳ್ಳಿ, ಕಾಡುಕೊತ್ತನಹಳ್ಳಿ, ಯಡಗನಹಳ್ಳಿ, ಸಬ್ಬನಹಳ್ಳಿ, ಪುರ, ತಗ್ಗಹಳ್ಳಿ, ಹಳುವಾಡಿ, ಚೀರನಹಳ್ಳಿ ಮಾರ್ಗವಾಗಿ ಮಂಡ್ಯ ತಲುಪುವಂತೆ ಬಸ್ ವ್ಯವಸ್ಥೆ ಕಲ್ಪಿಸಬೇಕು. ಅದೇ ಬಸ್ ಸಂಜೆ 4.45ಕ್ಕೆ ಮಂಡ್ಯದಿಂದ ಹೊರಟು ಇದೇ ಮಾರ್ಗವಾಗಿ ಮದ್ದೂರು ತಲುಪುವಂತೆ ಕ್ರಮ ಕೈಗೊಳ್ಳಬೇಕು ಎಂದು ಮನವಿಯಲ್ಲಿ ಒತ್ತಾಯಿಸಿದ್ದಾರೆ.
ಇದಲ್ಲದೆ, ಪ್ರಸ್ತುತ ಸಂಚರಿಸುತ್ತಿರುವ ಮಾರ್ಗ ಸಂಖ್ಯೆ 67ರ ಮದ್ದೂರು-ಸಬ್ಬನಹಳ್ಳಿ ಬಸ್ ಕೂಡ ನಿಗದಿತ ಸಮಯ ಪಾಲಿಸುತ್ತಿಲ್ಲ. ಚಾಲಕರ ಅನುಕೂಲಕ್ಕೆ ತಕ್ಕಂತೆ ಬಸ್ ಸಂಚರಿಸುತ್ತಿದ್ದು, ಪ್ರಯಾಣಿಕರು ಇರುವವರೆಗೂ ಮಾತ್ರ ಓಡಿಸಿ, ನಂತರ ವಾಪಸ್ಸಾಗುತ್ತಿರುವುದರಿಂದ ಕೊನೆಯ ನಿಲ್ದಾಣವಾದ ಸಬ್ಬನಹಳ್ಳಿವರೆಗೆ ಬಸ್ ತಲುಪುತ್ತಿಲ್ಲ. ಇದರಿಂದ ಸಬ್ಬನಹಳ್ಳಿ ಗ್ರಾಮಕ್ಕೆ ತೆರಳುವ ಪ್ರಯಾಣಿಕರು ತೀವ್ರ ತೊಂದರೆ ಅನುಭವಿಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.
ಕೆ.ಎಂ.ದೊಡ್ಡಿ ಭಾಗಕ್ಕೆ ಬೆಳಿಗ್ಗೆ ಸಮರ್ಪಕ ಬಸ್ ಸೌಲಭ್ಯ ಇಲ್ಲದಿರುವುದರಿಂದ ಮಂಡ್ಯದಿಂದ ಬೆಳಿಗ್ಗೆ 7.45ಕ್ಕೆ ಹೊರಟು ಕೆ.ಎಂ.ದೊಡ್ಡಿಗೆ ತೆರಳಿ, ಅಲ್ಲಿಂದ ಮಾರ್ಗ ಸಂಖ್ಯೆ 67ರ ಬದಲಿಗೆ ನೂತನ ಮಾರ್ಗದಲ್ಲಿ ಬಸ್ ಸಂಚಾರ ಆರಂಭಿಸುವಂತೆ ಮನವಿ ಮಾಡಿದ್ದಾರೆ. ಅಲ್ಲದೆ, ಸಂಜೆ 5 ಗಂಟೆಗೆ ಮದ್ದೂರಿನಿಂದ ಹೊರಟು ಮಾರ್ಗ ಸಂಖ್ಯೆ 67ರಂತೆ ಮಂಡ್ಯ ತಲುಪುವ ವ್ಯವಸ್ಥೆ ಕಲ್ಪಿಸಬೇಕು ಎಂದು ಒತ್ತಾಯಿಸಿದ್ದಾರೆ.
ಗ್ರಾಮೀಣ ಭಾಗದ ಜನರ ಸಾರಿಗೆ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಿ, ಬಸ್‌ಗಳ ಸಂಚಾರಕ್ಕೆ ನಿಗದಿತ ವೇಳಾಪಟ್ಟಿ ರೂಪಿಸುವುದರ ಜತೆಗೆ ಕೊನೆಯ ನಿಲ್ದಾಣದವರೆಗೂ ಕಡ್ಡಾಯವಾಗಿ ಬಸ್ ಓಡಿಸುವಂತೆ ಸಂಬಂಧಪಟ್ಟ ಸಾರಿಗೆ ಅಧಿಕಾರಿಗಳಿಗೆ ಸೂಕ್ತ ನಿರ್ದೇಶನ ನೀಡಬೇಕು ಎಂದು ಜಿಲ್ಲಾಧಿಕಾರಿಯವರನ್ನು ಕೋರಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಕೊಡಗು ಅಭಿವೃದ್ಧಿ ವಿಚಾರಗಳ ಕುರಿತು ಯುವ ಸಂಸತ್‌ನಲ್ಲಿ ಚರ್ಚೆ
ಮನವಿ ಸಲ್ಲಿಸಿದವರಲ್ಲಿ ಮೋಹನ್ ವೈ.ಎಂ., ಪ್ರೀತಿ, ಅಶ್ವಥ್ ಕುಮಾರ್, ಅರುಣ್ ಕುಮಾರ್, ಮಾಧವಿ ವೈ.ಎಂ., ಸುಮಿತ್, ಚರಣ್ ಕೆ., ಅರುಣ್ ನಾಯಕ್, ಪಿ. ಪ್ರದೀಪ್, ಗೌರಮ್ಮ, ನಂದಿನಿ, ಬಿ. ಮರಿಸ್ವಾಮಿ, ಇಕ್ಕರಾಜು, ಸುನಂದ ಸೇರಿದಂತೆ ಹಲವರಿದ್ದಾರೆ.
