ದಾಂಡೇಲಿ: ಜೋಯಿಡಾ ತಾಲೂಕಿನ ವೆಂಕಟೇಶ @ ಸ್ವಾಮಿ ಸುಬ್ಬಯ್ಯ ಭೂಪಾನಿ ಅವರಿಗೆ ಸರ್ಕಾರದ ವತಿಯಿಂದ ಮಂಜೂರಾಗಿದ್ದ ಆಶ್ರಯ ನಿವೇಶನವನ್ನು, ಪ್ರಭಾವ ಬಳಸಿ ಸುಳ್ಳು ದಾಖಲೆಗಳ ಮೂಲಕ ಬೇರೆಯವರ ಹೆಸರಿಗೆ ವರ್ಗಾಯಿಸಿಕೊಂಡಿರುವ ಗಂಭೀರ ಆರೋಪ ಕೇಳಿಬಂದಿದೆ. ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಹಾಗೂ ಪತ್ರಕರ್ತ ಬೊಮ್ಮಯ್ಯ ನಾರಾಯಣ ನಾಯಕ @ ಬಿ.ಎನ್. ವಾರಸೆ ಮತ್ತು ಇತರರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಕೋರಿ ಅವರು ಪೊಲೀಸರಿಗೆ ದೂರು ನೀಡಿದ್ದಾರೆ.
ಪ್ರಕರಣದ ವಿವರ: ದೂರುದಾರರು ಜೋಯಿಡಾ ತಾಲೂಕಿನವರಾಗಿದ್ದು, ಅವರ ಎಲ್ಲಾ ದಾಖಲೆಗಳು ಜೋಯಿಡಾ ವ್ಯಾಪ್ತಿಗೆ ಸೇರಿರುತ್ತವೆ. ಅವರಿಗೆ ದಾಂಡೇಲಿಯಲ್ಲಿ ಯಾವುದೇ ವಾಸಸ್ಥಳವಿಲ್ಲದಿದ್ದರೂ, ಅಲ್ಲಿ ಎರಡು ಕಟ್ಟಡಗಳು ಹಾಗೂ ಬಾಡಿಗೆಗೆ ನೀಡಿರುವ ಒಂದು ಹಾಲಿನ ಅಂಗಡಿ ಇರುತ್ತದೆ.
ಈ ಸುದ್ದಿ ಓದಿದ್ದೀರಾ? ಮುಂಡಗೋಡ | ಜುವೆಲರ್ಸ್ ಅಂಗಡಿಯಲ್ಲಿ 1.30 ಲಕ್ಷ ರೂ. ಮೌಲ್ಯದ ಬೆಳ್ಳಿ ಕಾಲು ಚೈನ್ ಕಳವು
ದಾಂಡೇಲಿ ನಗರಸಭೆ ವ್ಯಾಪ್ತಿಯ ಟೌನ್‌ಶಿಪ್ ಹದ್ದಿನಲ್ಲಿರುವ ಸಿ.ಟಿ.ಎಸ್. ನಂಬರ್: 3122 ರ ಆಶ್ರಯ ನಿವೇಶನವು ಪಿರ್ಯಾದಿಯವರ ಹೆಸರಿನಲ್ಲಿದೆ ಎಂದು ತಿಳಿಸಿದ್ದಾರೆ. ಬೊಮ್ಮಯ್ಯ ನಾರಾಯಣ ನಾಯಕ ಅವರು ತಮ್ಮ ಪ್ರಭಾವವನ್ನು ಬಳಸಿ, ನಗರಸಭೆಯ ಅಧಿಕಾರಿಗಳು, ಸಿಬ್ಬಂದಿ ಹಾಗೂ ಸಬ್‌ ರಜಿಸ್ಟ್ರಾರ್ ಮೇಲೆ ಒತ್ತಡ ತಂದು ಪಿರ್ಯಾದಿಯವರ ಹೆಸರಿನಲ್ಲಿ ಅರ್ಜಿ ಹಾಕಿ 10,000 ರೂಪಾಯಿಗಳನ್ನು ಭರಣ ಮಾಡಿರುತ್ತಾರೆ.
ನಂತರ ವೆಂಕಟೇಶ ಅವರೊಂದಿಗೆ ಸೌಹಾರ್ದಯುತವಾಗಿ ಮಾತನಾಡಿ, ನೋಂದಣಿಯಾದ ಕೇವಲ 4 ದಿನಗಳಲ್ಲಿ 1,95,000 ರೂಪಾಯಿಗೆ ಮಾರಾಟ ಮಾಡಿರುವುದಾಗಿ ಕ್ರಯಪತ್ರದಲ್ಲಿ ನಮೂದಿಸಲಾಗಿದೆ. ಜಲಜಾಕ್ಷಿ ಹಾಗೂ ಬೊಮ್ಮಯ್ಯ ನಾರಾಯಣ ನಾಯಕ ಅವರು ಪಿರ್ಯಾದಿಯವರ ಬಳಿ ಬಂದು, ತಾವೂ ಒಂದು ಸೈಟ್ ಖರೀದಿ ಮಾಡುತ್ತಿರುವುದಾಗಿ ನಂಬಿಸಿ,
ಸಾಕ್ಷಿಯಾಗಿ ಸಹಿ ಮಾಡಿ ಎಂದು ಹಳಿಯಾಳದ ಸಬ್‌ ರಜಿಸ್ಟ್ರಾರ್ ಕಚೇರಿಗೆ ಕರೆದುಕೊಂಡು ಹೋಗಿದ್ದಾರೆ. ಅಲ್ಲಿ ಪಿರ್ಯಾದಿಯವರ ಹೆಸರಿನಲ್ಲಿದ್ದ ನಿವೇಶನವನ್ನು ತಮ್ಮ ಹೆಸರಿಗೆ ನೋಂದಾಯಿಸಿಕೊಂಡಿದ್ದಾರೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಹೀಗೆ ವ್ಯವಸ್ಥಿತವಾಗಿ ಸುಳ್ಳು ದಾಖಲೆಗಳನ್ನು ಸೃಷ್ಟಿಸಿ, ಸರ್ಕಾರದ ನಿವೇಶನವನ್ನು ತಮ್ಮ ಸ್ವಂತಕ್ಕೆ ಬಳಸಿಕೊಳ್ಳುವ ಮೂಲಕ ಸರ್ಕಾರಿ ಭೂಮಿಯನ್ನು ಖಾಸಗಿ ಭೂಮಿಯಾಗಿ ಪರಿವರ್ತನೆ ಮಾಡಿಕೊಂಡಿದ್ದಾರೆ. ಈ ಕೃತ್ಯ ಎಸಗಿರುವ ಆರೋಪಿಗಳ ವಿರುದ್ಧ ಸೂಕ್ತ ಕಾನೂನುರೀತ್ಯ ಕ್ರಮ ಕೈಗೊಳ್ಳಬೇಕೆಂದು ದೂರಿನಲ್ಲಿ ತಿಳಿಸಲಾಗಿದೆ.
