ದಾವಣಗೆರೆಯ ದೃಶ್ಯ ಕಲಾ ಮಹಾವಿದ್ಯಾಲಯದ ಬಯಲು ರಂಗ ಮಂದಿರದಲ್ಲಿ 2026ರ ರಾಷ್ಟ್ರೀಯ ಬಹುಭಾಷಾ ನಾಟಕೋತ್ಸವವನ್ನು ದಾವಣಗೆರೆ- ವಿಜಯನಗರ ಮೂಲದ ಅನ್ವೇಷಕರು ಆರ್ಟ್ ಫೌಂಡೇಶನ್ ಆಯೋಜಿಸಿದ್ದು ಏಪ್ರಿಲ್ 17 ರಿಂದ ಮೇ 17 ರ ವರೆಗೆ ಪ್ರತಿ ಶನಿವಾರ ಮತ್ತು ಭಾನುವಾರ ವಿವಿಧ ನಾಟಕಗಳು ಪ್ರದರ್ಶನಗೊಳ್ಳಲಿದೆ.
ದಾವಣಗೆರೆಯ ಅನ್ವೇಷಕರು ಆರ್ಟ್ ಫೌಂಡೇಶನ್ ನ ರಂಗ ಕಲಾವಿದ ಸಿದ್ದರಾಜು ಮಾಹಿತಿ ನೀಡಿ “ದಾವಣಗೆರೆಯಲ್ಲಿ ದೃಶ್ಯಕಲಾ ವಿಶ್ವವಿದ್ಯಾನಿಲಯದ ಬಯಲು ರಂಗಮಂದಿರದಲ್ಲಿ ಪ್ರತಿ ಶನಿವಾರ ಮತ್ತು ಭಾನುವಾರ ಸಂಜೆ 6:45ಕ್ಕೆ ವಿವಿಧ ನಾಟಕಗಳು ಪ್ರದರ್ಶನಗೊಳ್ಳಲಿವೆ. ನಾಡಿನ ಹೆಸರಾಂತ ವಿವಿಧ ಕಲಾವಿದರುಗಳು, ರಂಗಭೂಮಿ ಕಲಾವಿದರು ನಾಟಕಗಳನ್ನು ಅಭಿನಯಿಸಲಿದ್ದು ದಾವಣಗೆರೆಯ ಸಹೃದಯ ನಾಟಕ ಕಲಾವಿದರು ಆಗಮಿಸಿ ನಾಟಕಗಳನ್ನು ವೀಕ್ಷಿಸಬೇಕು” ಎಂದು ಮನವಿ ಮಾಡಿದರು.
ಈ ಸುದ್ದಿ ಓದಿದ್ದೀರಾ? http://ದಾವಣಗೆರೆ | ಹೆಣ್ಣು ಮಕ್ಕಳಿಗೆ ಶಿಕ್ಷಣ ನೀಡಿದರೆ ಉತ್ತಮ ಸಮಾಜ: ನ್ಯಾ.ಶ್ರೀಮತಿ ವೇಲಾ
“ಈಗಾಗಲೇ ಏಪ್ರಿಲ್ 17ರಂದು ಬೂಕರ್ ಪ್ರಶಸ್ತಿ ವಿಜೇತೆ ಬಾನು ಮುಷ್ತಾಕ್ ಕಾದಂಬರಿ ಆಧಾರಿತ ‘ಒಮ್ಮೆ ಹೆಣ್ಣಾಗು’ ರಾಷ್ಟ್ರಕವಿ ಕುವೆಂಪು ಅವರ ‘ನನ್ನ ಗೋಪಾಲ’, ಜಿ ಎಚ್ ಶಿವರುದ್ರಪ್ಪ ಅವರ ‘ಹಾಡು ಹಕ್ಕಿ’ ಪ್ರದರ್ಶನಗೊಂಡಿದ್ದು, ಏಪ್ರಿಲ್ 25ಕ್ಕೆ ಟಿಪಿ ಕೈಲಾಸಂ ಅವರ ‘ನಮ್ ಕಂಪನಿ’, ಮೇ 2ಕ್ಕೆ ಪೂರ್ಣಚಂದ್ರ ತೇಜಸ್ವಿ ಅವರ ‘ಅಣ್ಣನ ನೆನಪು’, ಮೇ 3 ರಂದು ಕೆ ವೈ ನಾರಾಯಣ ಸ್ವಾಮಿ ಅವರ ‘ವರ್ಣ ಪಲ್ಲಟ’ ಮೇ 9 ಕ್ಕೆ ನಾವು ನೀವು ಸಾಂಸ್ಕೃತಿಕ ವೇದಿಕೆ-ದಾವಣಗೆರೆ ಅಭಿನಯಿಸುವ ಮಂಜುನಾಥ್ ಎಸ್ ಟಿ ನಿರ್ದೇಶನದ ‘ಅಂಗೈರೇಖೆ’, ಮೇ ಹತ್ತರಂದು ‘ಹ್ಯಾಂಗ್ ಆನ್’ ಕೊಂಕಣಿ ನಾಟಕ, ರಾಜೀವ್ ಕೃಷ್ಣನ್ ಅವರ ನಿರ್ದೇಶನದ ತಮಿಳು ನಾಟಕ ‘ಕಿಂದನ್ ಚರಿತಿರಂ’, ಅರುಣ್ ಲಾಲ್ ವಿನ್ಯಾಸದ ಮಲಯಾಳಂ ನಾಟಕ ‘ಚಿಲ್ಲರ ಸಮರಂ’ ಹಾಗೂ ಹುಲುಗಪ್ಪ ಕಟ್ಟಿಮನಿ ನಿರ್ದೇಶನದ ಜಯಂತ್ ಕಾಯ್ಕಿಣಿ ರೂಪಾಂತರದ ‘ಜೊತೆಗಿರುವ ಚಂದಿರ’ ಮುಂದಿನ ದಿನಗಳಲ್ಲಿ ಪ್ರತಿ ಶನಿವಾರ, ಭಾನುವಾರ ಹಾಗೂ ಮೇ 15ರ ಶುಕ್ರವಾರ ಸಂಜೆ ಪ್ರದರ್ಶನಗೊಳ್ಳಲಿವೆ. ಆಸಕ್ತರು ಆಗಮಿಸಿ ಪ್ರದರ್ಶನವನ್ನು ಯಶಸ್ವಿಗೊಳಿಸಬೇಕು” ಎಂದು ಕೋರಿದರು.
