ಗದಗ ಜಿಲ್ಲೆಯ ಲಕ್ಕುಂಡಿಯಲ್ಲಿ ಭಾನುವಾರ 200ಕ್ಕೂ ಹೆಚ್ಚು ಪ್ರಾಚ್ಯ ಅವಶೇಷಗಳು ಪತ್ತೆಯಾಗಿವೆ. ತಾಲೂಕಿನಲ್ಲಿ ಸುಮಾರು 20 ವರ್ಷಗಳ ಹಿಂದೆ ನಡೆದ ಉತ್ಖನನ ಕಾರ್ಯದಲ್ಲಿ ದೊರೆತ ಪ್ರಾಚೀನ ದೇವಸ್ಥಾನಗಳ ಅಳಿದುಳಿದ ಭಾಗಗಳು, ಶಿವಲಿಂಗಗಳು ಹಾಗೂ ಕಲ್ಯಾಣಿ ಚಾಲುಕ್ಯರ ಕಾಲದ ವಾಸ್ತುಶಿಲ್ಪಗಳು ಲಕ್ಕುಂಡಿಯ ಇತಿಹಾಸಕ್ಕೆ ಮರುಜೀವ ತಂದಿದ್ದವು.
“ಬಸವರಾಜು ಮುಸುಕಿನಬಾವಿ ಅವರ ಹೊಲದ ಸಮೀಪ 200ಕ್ಕೂ ಹೆಚ್ಚು ಪ್ರಾಚ್ಯಾವಶೇಷಗಳು ದೊರೆತಿದ್ದು, ಬಯಲು ವಸ್ತು ಸಂಗ್ರಹಾಲಯಕ್ಕೆ ಸ್ಥಳಾಂತರ ಮಾಡಲಾಗಿದೆ” ಎಂದು ಲಕ್ಕುಂಡಿ ಪಾರಂಪರಿಕ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರದ ರಾಜ್ಯ ಸಮಿತಿ ಅಧ್ಯಕ್ಷ ಸಿದ್ದು ಪಾಟೀಲ ತಿಳಿಸಿದ್ದಾರೆ.
ಇದನ್ನೂ ಓದಿ>ಗದಗ | ಲಕ್ಕುಂಡಿ ಚಿನ್ನದ ನಿಧಿ ಪ್ರಕರಣ ಬಳಿಕ, ಉತ್ಖನನ ಆರಂಭ
ಜನವರಿ 2026ರಿಂದ ಈವರೆಗಿನ ಉತ್ಖನನ ಕಾರ್ಯದಲ್ಲಿ ನವಶಿಲಾಯುಗಕ್ಕೆ ಸೇರಿದ ಬೂದುಬಣ್ಣದ ಮಡಕೆಯ ಚೂರುಗಳು, ಕಲ್ಲಿನ ಕೊಡಲಿ, ಶಿವಲಿಂಗ ಮತ್ತು ಪಾಣಿಪೀಠ, ಜಿನನ(ತೀರ್ಥಂಕರರ) ಚಿತ್ರವಿರುವ ಕಲ್ಲಿನ ಪೀಠಗಳು ಪತ್ತೆಯಾಗಿವೆ. ಜತೆಗೆ ಉತ್ಖನನ ಆರಂಭವಾಗುವ ಮೊದಲು 450 ಗ್ರಾಂ ತೂಕದ ಚಿನ್ನದ ಆಭರಣಗಳು ಮತ್ತು ನಾಣ್ಯಗಳಿದ್ದ ಮಡಕೆ ಮನೆಯೊಂದರ ಅಡಿಪಾಯ ಅಗೆಯುವ ವೇಳೆ ದೊರಕಿತ್ತು.
ಒಟ್ಟಾರೆಯಾಗಿ ಈವರೆಗೂ ನಡೆದ ಉತ್ಖನನದಲ್ಲಿ ದೊರೆತ ಪ್ರಾಚ್ಯಾವಶೇಷಗಳ ಆಧಾರದ ಮೇಲೆ ಲಕ್ಕುಂಡಿ ನವಶಿಲಾಯುಗ ಮಾನವನ ವಾಸಸ್ಥಾನವಾಗಿತ್ತು ಎಂಬ ಅಭಿಪ್ರಾಯವನ್ನು ಇತಿಹಾಸ ತಜ್ಞರು ವ್ಯಕ್ತಪಡಿಸಿದ್ದಾರೆ. ಕರ್ನಾಟಕ ಸರ್ಕಾರವು ಲಕ್ಕುಂಡಿಯನ್ನು ಯುನೆಸ್ಕೊದ ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಯಲ್ಲಿ ಸೇರಿಸುವ ಪ್ರಸ್ತಾಪ ಮಾಡಿದೆ.
