“ಪ್ರಧಾನಮಂತ್ರಿ ಫಸಲ್ ಬೀಮಾ ಯೋಜನೆ ಹಾಗೂ ಹವಾಮಾನ ಆಧಾರಿತ ವಿಮಾ ಯೋಜನೆಗೆ ಸಂಬಂಧಿಸಿದಂತೆ ಕೃಷಿ ಇಲಾಖೆಯು ಇತ್ತೀಚೆಗೆ ಹೊರಡಿಸಿರುವ ಆದೇಶವು ಗೊಂದಲಪೂರ್ಣವಾಗಿದ್ದು, ಇದಕ್ಕೆ ಸಂಬಂಂಧಿಸಿದಂತೆ ಜಿಲ್ಲಾಧಿಕಾರಿಗಳು ಕೂಡಲೆ ರೈತ ಸಂಘಟನೆಗಳ ಸಭೆ ಕರೆದು ರೈತರೊಂದಿಗೆ ಚರ್ಚೆ ನಡೆಸಿ ಗೊಂದಲ ನಿವಾರಣೆಗೆ ಮುಂದಾಗಬೇಕು” ಎಂದು ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ( ಕೋಡಿಹಳ್ಳಿ ಚಂದ್ರಶೇಖರ್ )ಯ ಜಿಲ್ಲಾ ಅಧ್ಯಕ್ಷ ಅನಿಲ್ ಡೊಳ್ಳಿನ ಆಗ್ರಹಿಸಿದ್ದಾರೆ.
ಹಾವೇರಿ ಪಟ್ಟಣದಲ್ಲಿ ಪತ್ರಿಕಾ ಹೇಳಿಕೆ ನೀಡಿರುವ ಅವರು, “ಜಿಲ್ಲೆಯಲ್ಲಿ ಐದಾರು ವರ್ಷಗಳಿಂದ ಬೆಳೆ ವಿಮೆ ಪರಿಹಾರ ರೈತರಿಗೆ ದೊರಕಿಲ್ಲ. ಎಲ್ಲೊ ಕೆಲವು ಭಾಗದಲ್ಲಿ ಕೆಲವರಿಗೆ ಮಾತ್ರ ಅಲ್ಪಾಂಶ ಪರಿಹಾರ ದೊರಕಿದೆ. ಬೆಳೆನಷ್ಟ ಅನುಭವಿಸಿದ ರೈತರಿಗೆ ವಿಮೆ ಪರಿಹಾರ ನೀಡದ ಕಾರಣ, ಪರಿಹಾರದ ನಿರೀಕ್ಷೆಯಲ್ಲಿ ಪಶು ಸಂಗೋಪನೆ, ಕೃಷಿ ಯಾಂತ್ರೀಕರಣ ಮತ್ತಿತರೆ ಖರ್ಚುವೆಚ್ಚಗಳಿಗೆ ಕೈ ಹಾಕಿದ ರೈತರು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಿದ್ದಾರೆ” ಎಂದು ತಿಳಿಸಿದ್ದಾರೆ.
ಪ್ರತಿವರ್ಷ ಬಹುತೇಕ ರೈತರು ಬೆಳೆ ವಿಮೆ ತುಂಬುತಿದ್ದು ಪರಿಹಾರ ಮಾತ್ರ ಕನಸಿನ ಗಂಟಾಗಿದೆ. ಈ ಇತ್ತೀಚೆಗೆ ಜಿಲ್ಲಾಧಿಕಾರಿಗಳೇ ಪತ್ರಿಕಾ ಹೇಳಿಕೆ ನೀಡಿದ್ದು, ಬೆಳೆ ವಿಮೆ ತುಂಬುವಂತೆ ರೈತರಲ್ಲಿ ಮನವಿ ಮಾಡಿದ್ದಾರೆ. ಬಾರದ ವಿಮೆ ಪರಿಹಾರಕ್ಕಾಗಿ ರೈತ ಸಂಘಟನೆಗಳು ಹೋರಾಡುತ್ತಲೇ ಇವೆ. ಜಿಲ್ಲಾಡಳಿತವಾಗಲಿ, ವಿಮೆ ಕಂಪನಿಗಳಾಗಲೀ ಈ ವರೆಗೂ ಸಮರ್ಪಕ ಉತ್ತರ ನೀಡಿಲ್ಲ. ವಿಮೆ ಪರಿಹಾರ ನೀಡದಿರುವುದಕ್ಕೆ ಸಕಾರಣಗಳಿಲ್ಲ. ಜವಾಬ್ದಾರಿ ಹೋರುತ್ತಿಲ್ಲ. ಹಾಗಾದರೆ, ಈ ವರೆಗೆ ರೈತರು ಕಟ್ಟಿದ ಕೋಟಿ ಕೋಟಿ ಪ್ರೀಮಿಯಂ ಹಣ ಎಲ್ಲಿಗೆ ಹೋಯಿತು ಎಂದು ಅನಿಲ್ ಡೊಳ್ಳಿನ ಪ್ರಶ್ನಿಸಿದ್ದಾರೆ.
“ಇದೆಲ್ಲವನ್ನೂ ನೋಡಿದರೆ, ಈ ಬೆಳೆವಿಮೆ ಯೋಜನೆಗಳು ರೈತರ ಲೂಊಟಿಗಾಗಿ ಜಾರಿಗೊಂಡಿರುವವೇ? ಎಂಬ ಅನುಮಾನ ರೈತರಲ್ಲಿ ಮೂಡಿದೆ. ಈ ಮಧ್ಯೆ ಕೃಷಿ ಇಲಾಖೆ ಹೊಸ ಷರತ್ತು ವಿಧಿಸಿ ಆದೇಶ ಹೊರಡಿಸಿದೆ ಎನ್ನಲಾಗುತ್ತಿದೆ. ಅದರ ಪ್ರಕಾರ ಸಾಲಗಾರರಲ್ಲದ ರೈತರು ಸ್ವಘೋಷಣಾ ಪತ್ರ ಕೊಡಬೇಕಂತೆ. ಸಾಲಗಾರ ರೈತರು ಬೆಳೆ ವಿಮೆ ತುಂಬಲು ಅರ್ಹರೇ? ಅಲ್ಲವೇ ಸ್ಪಷ್ಟನೆ ಇಲ್ಲವಾಗಿದೆ ಎಂದಿರುವ ಅವರು, ಈ ಎಲ್ಲ ಗೊಂದಲ ನಿವಾರಣೆಗಾಗಿ ಜಿಲ್ಲಾಧಿಕಾರಿಗಳು ಕೂಡಲೇ ರೈತಸಂಘಟನಗಳ ಸಭೆ ಕರೆದು, ಬೆಳೆ ವಿಮೆ ಸೇರಿದಂತೆ ರೈತರ ಪ್ರಸ್ತುತ ಸಮಸ್ಯೆಗಳ ಕುರಿತು ರೈತರೊಂದಿಗೆ ಚರ್ಚಿಸಬೇಕು” ಎಂದು ಆಗ್ರಹಿಸಿದ್ದಾರೆ.
