ಹರಿಯುತ್ತಿರುವ ಕಮಲಾವತಿ ನದಿ ನೀರಿನಲ್ಲಿಯೇ ಟ್ರ್ಯಾಕ್ಟರ್ ಮೂಲಕ ಶವ ಸಾಗಿಸಿ ಅಂತ್ಯಕ್ರಿಯೆ ನೆರವೇರಿಸಿದ ಘಟನೆ ಸೇಡಂ ಚೋಟಿಗಿರಣಿ ಸಮೀಪದ ರೈಲ್ವೆ ಹಳಿ ಬಳಿಯ ಮಾದಿಗ ಸಮಾಜದ ರುದ್ರಭೂಮಿಯಲ್ಲಿ ಬುಧವಾರ ನಡೆದಿದೆ.
ನಗರದ ಬಸವನಗರ ನಿವಾಸಿ ಹಾಗೂ ಪುರಸಭೆಯ ಮಾಜಿ ಸದಸ್ಯ ರಾಜು ಕಾಳಗಿಕರ್ (42) ಮೃತಪಟ್ಟಿದ್ದು, ಅವರ ಶವವನ್ನು ನದಿಯ ಆಚೆ ಇರುವ ರುದ್ರಭೂಮಿಗೆ ಕೊಂಡೊಯ್ಯಲು ಕುಟುಂಬಸ್ಥರು ಹಾಗೂ ಸಮಾಜದ ಮುಖಂಡರು ಪರದಾಡಬೇಕಾಯಿತು.
ನದಿಯಲ್ಲಿ ನೀರು ಹರಿಯುತ್ತಿದ್ದರೂ ಶವ ಸಾಗಿಸಲು ಬೇರೆ ಮಾರ್ಗದ ವ್ಯವಸ್ಥೆ ಇಲ್ಲದ ಹಿನ್ನೆಲೆಯಲ್ಲಿ ಟ್ರ್ಯಾಕ್ಟರ್ ಮೂಲಕವೇ ನದಿ ದಾಟಬೇಕಾಯಿತು. ಟ್ರ್ಯಾಕ್ಟರ್ನಲ್ಲಿ ಶವ ಸಾಗಿಸುವ ಸಂದರ್ಭದಲ್ಲಿ ಹರಿಯುತ್ತಿದ್ದ ನೀರು ಆತಂಕ ಮೂಡಿಸಿತು.
ಈ ವೇಳೆ ಧೈರ್ಯದಿಂದ ನದಿಗೆ ಇಳಿದ ಯುವಕರು ಪರಸ್ಪರ ಕೈ ಹಿಡಿದು ಸರಪಳಿ ನಿರ್ಮಿಸಿಕೊಂಡು ಟ್ರ್ಯಾಕ್ಟರ್ ಸುರಕ್ಷಿತವಾಗಿ ನದಿ ದಾಟಲು ನೆರವಾದರು. ಬಳಿಕ ನದಿಯ ಆಚೆಯಿರುವ ಮಾದಿಗ ಸಮಾಜದ ರುದ್ರಭೂಮಿಯಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು.
ಇದನ್ನು ಓದಿದ್ದೀರಾ? ಯಾದಗಿರಿ| ದಲಿತರ ಮೇಲೆ ಸರಣಿ ಹಲ್ಲೆ, ಸಾಮಾಜಿಕ ಬಹಿಷ್ಕಾರ ಆರೋಪ: ಕಠಿಣ ಕ್ರಮಕ್ಕೆ ದಸಂಸ ಆಗ್ರಹ
ಶವ ಸಾಗಿಸಲು ನದಿಯನ್ನೇ ದಾಟಬೇಕಾದ ಅನಿವಾರ್ಯತೆ ಎದುರಾಗಿರುವುದು ಸ್ಥಳೀಯರ ಆಕ್ರೋಶಕ್ಕೆ ಕಾರಣವಾಗಿದ್ದು, ರುದ್ರಭೂಮಿಗೆ ಸೂಕ್ತ ರಸ್ತೆ ಹಾಗೂ ಸಂಪರ್ಕ ವ್ಯವಸ್ಥೆ ಕಲ್ಪಿಸಬೇಕು ಎಂಬ ಆಗ್ರಹ ಕೇಳಿಬಂದಿದೆ.
