ಗುಲ್ಬರ್ಗಾ ವಿದ್ಯುತ್ ಸರಬರಾಜು ನಿಗಮ ನಿಯಮಿತ (ಜೆಸ್ಕಾಂ) ವ್ಯಾಪ್ತಿಯಲ್ಲಿನ ಸರ್ಕಾರದ ಹಲವು ಇಲಾಖೆಗಳು ₹1,715.81 ಕೋಟಿಯಷ್ಟು ವಿದ್ಯುತ್ ಶುಲ್ಕ ಬಾಕಿ ಉಳಿಸಿಕೊಂಡಿವೆ.
ವರಮಾನದ ಕೊರತೆಯಿಂದ ಪಾರಾಗಲು ರಾಜ್ಯದ ವಿದ್ಯುತ್ ಸರಬರಾಜು ಕಂಪನಿಗಳು(ಎಸ್ಕಾಂ) ದರ ಹೆಚ್ಚಳದ ಮೊರೆ ಹೋಗಿವೆ. ತಮ್ಮ ನಷ್ಟದ ಭಾರವನ್ನು ಗ್ರಾಹಕರ ಮೇಲೆ ಹೊರೆಸಿವೆ. ಆದರೆ, ಸರ್ಕಾರದ ಇಲಾಖೆಗಳಿಂದಲೇ ಸಕಾಲದಲ್ಲಿ ವಿದ್ಯುತ್ ಶುಲ್ಕ ಪಾವತಿ ಆಗುತ್ತಿಲ್ಲ. ಸಂಬಂಧ ಪಟ್ಟ ಇಲಾಖೆಗಳಿಗೆ ಪತ್ರ ಬರೆದರೂ ಶುಲ್ಕ ಮಾತ್ರ ಪಾವತಿಯಾಗುತ್ತಿಲ್ಲ.
ಗುಲ್ಬರ್ಗಾ ವಿದ್ಯುತ್ ಸರಬರಾಜು ಕಂಪನಿ ಲಿಮಿಟೆಡ್(ಜೆಸ್ಕಾಂ) ನೀಡಿದ ಮಾಹಿತಿ ಅನ್ವಯ, 2023ರ ಮಾರ್ಚ್‌ ಅಂತ್ಯದ ವೇಳೆಗೆ ಹಲವು ಇಲಾಖೆಗಳು ₹1,715.81 ಕೋಟಿ ವಿದ್ಯುಲ್ ಶುಲ್ಕ ಬಾಕಿ ಉಳಿಸಿಕೊಂಡಿವೆ. ಈ ಪೈಕಿ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಇಲಾಖೆಯದ್ದೇ(ಆರ್ಡಿಪಿಆರ್) ಅತ್ಯಧಿಕ, ಅಂದರೆ ₹1,556.69 ಕೋಟಿಯಷ್ಟು ಬಾಕಿ ಇದೆ.
2022 ಏಪ್ರಿಲ್‌ 1ರ ಅವಧಿಯಲ್ಲಿ ಆರ್‌ಡಿಪಿಆರ್‌ನ ಬಾಕಿ ಮೊತ್ತ ₹1,133.87 ಕೋಟಿ ಇತ್ತು. 2022–23ರ ಅವಧಿಯಲ್ಲಿ ₹506.17 ಕೋಟಿಯ ಸೇರ್ಪಡೆಯೊಂದಿಗೆ ₹1,640.04 ಕೋಟಿಗೆ ತಲುಪಿತು. ಒಂದು ವರ್ಷದ ಅವಧಿಯಲ್ಲಿ ₹83.35 ಕೋಟಿಯಷ್ಟು ಶುಲ್ಕ ಪಾವತಿಸಿ, ₹1,556.69 ಬಾಕಿ ಉಳಿಸಿಕೊಂಡಿದೆ.
ನಗರಾಭಿವೃದ್ಧಿ ಇಲಾಖೆ(ಯುಡಿಡಿ) ₹110.48 ಕೋಟಿ, ಸಣ್ಣ ನೀರಾವರಿ ಇಲಾಖೆ ₹23.12 ಕೋಟಿ, ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ(ಬಹುಗ್ರಾಮ ಯೋಜನೆ; ಆರ್‌ಡಿಡಬ್ಲ್ಯು ಮತ್ತು ಎಸ್‌ಡಿ) ಇಲಾಖೆ ₹17.65, ಬೃಹತ್‌ ನೀರಾವರಿ ಇಲಾಖೆ ₹1.78 ಕೋಟಿ, ರಾಜ್ಯ ಮತ್ತು ಕೇಂದ್ರ ಸರ್ಕಾರದ ಇತರೆ ಇಲಾಖೆಗಳು ಕ್ರಮವಾಗಿ ₹5.57 ಕೋಟಿ ಹಾಗೂ ₹38 ಲಕ್ಷದಷ್ಟು ಶುಲ್ಕ ಪಾವತಿಸಬೇಕಿದೆ. ವಾಣಿಜ್ಯ ಮತ್ತು ಕೈಗಾರಿಕೆ(ಸಿ ಅಂಡ್ ಐ) ಇಲಾಖೆ ₹15 ಲಕ್ಷ ಬಾಕಿ ಉಳಿಸಿಕೊಂಡಿದೆ.
ಜೆಸ್ಕಾಂ ವ್ಯಾಪ್ತಿಯ ಕಲಬುರಗಿ ಜಿಲ್ಲೆಯ ಹಲವು ಇಲಾಖೆಗಳು ₹322.73 ಕೋಟಿ, ಯಾದಗಿರಿ– ₹68.89, ಬೀದರ್– ₹402.16, ಬಳ್ಳಾರಿ– ₹192.24 ಕೋಟಿ, ವಿಜಯನಗರ– ₹347.95 ಕೋಟಿ, ರಾಯಚೂರು– ₹270.22 ಕೋಟಿ ಹಾಗೂ ಕೊಪ್ಪಳ– ₹62.99 ಕೋಟಿಯಷ್ಟು ವಿದ್ಯುತ್ ಶುಲ್ಕ ಕಟ್ಟಬೇಕಿದೆ.
“ಜನಸಾಮಾನ್ಯರು ಶುಲ್ಕ ಕಟ್ಟದಿದ್ದರೆ ಜೆಸ್ಕಾಂ ಸಿಬ್ಬಂದಿ ಬಂದು ವಿದ್ಯುತ್ ಸಂಪರ್ಕ ಕಡಿತಗೊಳಿಸುತ್ತಾರೆ. ಸರ್ಕಾರಿ ಇಲಾಖೆಗಳು ನೂರಾರು ಕೋಟಿ ಶುಲ್ಕ ಪಾವತಿಸಲು ಹಿಂದೇಟು ಹಾಕುತ್ತಿದ್ದರೂ ಯಾವುದೇ ಕ್ರಮ ಏಕೆ ತೆಗೆದುಕೊಳ್ಳುತ್ತಿಲ್ಲ? ನಷ್ಟದಿಂದ ಹೊರಬರಲು ಸಾಮಾನ್ಯ ಗ್ರಾಹಕರ ಮೇಲೆ ದರ ಏರಿಕೆಯ ಬರೆ ಹಾಕುವುದು ಎಷ್ಟು ಸರಿ” ಎಂದು ಗ್ರಾಹಕ ಸಂತೋಷ್ ಕುಮಾರ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಹಾಸನ | ವಿದ್ಯುತ್ ಬಿಲ್‌ ಕೇಳಿದ್ದಕ್ಕೆ ಸಿಬ್ಬಂದಿ ಮೇಲೆ ಹಲ್ಲೆ
“ಕೆಲವು ಇಲಾಖೆಗಳಿಗೆ ಸಕಾಲಕ್ಕೆ ಬಾರದ ಅನುದಾನದಿಂದಾಗಿ ಜೆಸ್ಕಾಂಗೆ ವಿದ್ಯುತ್ ಶುಲ್ಕ ಪಾವತಿ ಆಗುತ್ತಿಲ್ಲ. ಸಂಬಂಧಪಟ್ಟ ಇಲಾಖೆಗಳಿಗೆ ಆಗಾಗ ಪತ್ರ ಬರೆಯಲಾಗುತ್ತಿದೆ” ಎಂದು ಜೆಸ್ಕಾಂ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಹಲವು ಇಲಾಖೆಗಳು ಜೆಸ್ಕಾಂಗೆ ಪಾವತಿಸಬೇಕಾದ ವಿದ್ಯುತ್ ಶುಲ್ಕದ ಅಂಕಿಅಂಶ(₹ ಕೋಟಿ)
| ಇಲಾಖೆಗಳು | 2022 ಏ.1ರ ಬಾಕಿ(ಕೋಟಿ) | 2022-23ರ ಶುಲ್ಕ | 2022-23ರ ಪಾವತಿ |
| ಆರ್ಡಿಪಿಆರ್ | 1133.87 | 506.17; 83.35 | 1556.69 |
| ಯುಡಿಡಿ | 79.83 | 252.04; 221.39 | 110.48 |
| ಸಿ ಅಂಡ್ ಐ | 0.13 | 0.64; 0.62 | 0.15 |
| ಸಣ್ಣ ನೀರಾವರಿ | 18.02 | 10.54; 5.44 | 23.12 |
| ಬೃಹತ್‌ ನೀರಾವರಿ | 2.11 | 16.81; 17.15 | 1.78 |
| ಆರ್‌ಡಿಡಬ್ಲ್ಯೂ ಅಂಡ್ ಎಸ್‌ಡಿ | 8.23 | 18.01; 8.60 | 17.65 |
| ರಾಜ್ಯ ಸರ್ಕಾರದ ಇತರೆ | 4.37 | 15.38; 14.17 | 5.57 |
| ಕೇಂದ್ರ ಸರ್ಕಾರದ ಇತರೆ | 0.93 | 5.11; 5.66 | 0.38 |
| ಒಟ್ಟು | 1247.49 | 824.70; 356.38 | 1715.81 |
