ಸದಾ ಹಸನ್ಮುಖಿಯಾಗಿ ಎಲ್ಲಾ ಸಮುದಾಯಗಳ ಜೊತೆಗೆ ಬೆರೆಯುತ್ತಿದ್ದ ಕುರುಬ ಸಮಾಜದ ಹಿರಿಯ ಚೇತನ, ಮುಗ್ಧ ಮನಸ್ಸಿನ ಕೆ.ವೈ ರಾಮಸ್ವಾಮಿ ಅವರ 80 ವರ್ಷಗಳ ಸಾರ್ಥಕ ಜೀವನದೊಂದಿಗೆ ಇಹಲೋಕದ ಪಯಣ ಮುಗಿಸಿದ್ದು ಅವರಿಗೆ ಭಾವಪೂರ್ಣ ಶ್ರದ್ಧಾಂಜಲಿ ಎಂದು ಕಾಂಗ್ರೆಸ್ ಮುಖಂಡ ಅನ್ವರ್ ಪಾಷ ತಿಳಿಸಿದ್ದಾರೆ.
ಕೋಲಾರ ನಗರಸಭೆಯ ಮಾಜಿ ಅಧ್ಯಕ್ಷೆ ಶ್ರೀಮತಿ ಗಿರಿಜಮ್ಮನವರ ಪತಿಯಾಗಿ ಕುರುಬ ಸಮಾಜದ ಯುವ ಮುಖಂಡ ಕೆ.ಆರ್.ರವೀಂದ್ರ ರವರ ತಂದೆಯಾದ ಕೆ.ವೈ.ರಾಮಸ್ವಾಮಿ ರವರು ಶ್ವಾಸಕೋಶದ ಸಮಸ್ಯೆಯಿಂದ ನಾರಾಯಣ ಹೃದಯಾಲಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುವಾಗ ಅಸುನೀಗಿರುತ್ತಾರೆ.
ಕೋಲಾರ ತಾಲ್ಲೂಕು ವೇಮಗಲ್ ಹೋಬಳಿಯ ಕರೇನಹಳ್ಳಿ ಗ್ರಾಮದಲ್ಲಿ ಜನಿಸಿ, ವಿದ್ಯಾವಂತರಾಗಿ ಬೆಮೆಲ್ ಉದ್ಯೋಗಿಯಾಗಿ, ಬೆಮೆಲ್ ಕಾರ್ಮಿಕ ಸಂಘಟನೆಯಲ್ಲೂ ಸಹ ಸಕ್ರಿಯರಾಗಿದ್ದ ರಾಮಸ್ವಾಮಿಯವರು ವಿದ್ಯಾರ್ಥಿ ದೆಸೆಯಿಂದಲೇ ಜಿಲ್ಲೆಯ ರಾಜಕೀಯ ಮುತ್ಸದ್ಧಿ ದಿವಂಗತ ಸಿ. ಬೈರೇಗೌಡರ ಒಡನಾಡಿಯಾಗಿ, ಸಹಕಾರಿ ಧುರೀಣ ಹಾಗೂ ಮಾಜಿ ಸಚಿವ ಕೆ.ಶ್ರೀನಿವಾಸಗೌಡರ ಸಹಪಾಠಿಯಾಗಿ ಬಹಳಷ್ಟು ರಾಜಕೀಯ ಮುಖಂಡರೊಂದಿಗೆ ಉತ್ತಮವಾದ ಬಾಂಧವ್ಯವನ್ನು ಹೊಂದಿದ್ದರು.
ಇದನ್ನು ಓದಿದ್ದೀರಾ..? ಬಾಗೇಪಲ್ಲಿ | ಎಸ್. ಎಸ್.ಎಲ್.ಸಿ ಪರೀಕ್ಷೆ ಫಲಿತಾಂಶ ಪ್ರಕಟ ರಾಜ್ಯಕ್ಕೆ 4ನೇ ಟಾಪರ್ ಆದ ಬಾಗೇಪಲ್ಲಿ ಯಶಸ್ವಿನಿ
ಸದಾಕಾಲ ಹಸನ್ಮುಖಿಯಾಗಿ, ಎಲ್ಲರೊಂದಿಗೂ ಸರಳವಾಗಿ ಬೆರೆಯುತ್ತಿದ್ದ, ಮುಗ್ಧ ಮನಸ್ಸಿನ ಕೆ.ವೈ.ರಾಮಸ್ವಾಮಿ ರವರ ಸಾವಿನ ಸುದ್ದಿ ಹಲವಾರು ಮನಸ್ಸುಗಳಿಗೆ ನೋವು ತಂದಿದೆ. ಆದರೆ ಸಾವನ್ನು ನಿಯಂತ್ರಿಸುವ ಶಕ್ತಿ ಯಾರಿಗೂ ಇಲ್ಲ. ಅದು ವಿಧಿಯಾಟ. ಈ ಸಂದರ್ಭದಲ್ಲಿ ಹಿರಿಯ ಚೇತನ ಕೆ.ವೈ.ರಾಮಸ್ವಾಮಿ ಯವರ ಆತ್ಮಕ್ಕೆ ಚಿರಶಾಂತಿ ದೊರಕಲಿ ಹಾಗೂ ಅವರ ಬಂಧು-ಬಳಗಕ್ಕೆ, ಅವರ ಹಿತೈಷಿಗಳಿಗೆ ಈ ದುಃಖವನ್ನು ಭರಿಸುವ ಶಕ್ತಿ ನೀಡಲಿ ಎಂದು ಸೃಷ್ಟಿಕರ್ತನಲ್ಲಿ ಪ್ರಾರ್ಥಿಸೋಣ ಎಂದು ಅನ್ವರ್ ಪಾಷ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ
