ನಗರದಲ್ಲಿ ತ್ಯಾಜ್ಯ ಸಮಸ್ಯೆ ಹೆಚ್ಚುತ್ತಿದ್ದು, ನಗರಸಭೆ ಅಧಿಕಾರಿಗಳು ಸರಿಯಾಗಿ ಕೆಲಸ ಮಾಡುತ್ತಿಲ್ಲ. ಹೀಗಾಗಿ, ಎಷ್ಟೇ ಖರ್ಚಾದರೂ ಪರವಾಗಿಲ್ಲ; ನಾನೇ ಕೊಡುತ್ತೇನೆ ಮಾಜಿ ನಗರಸಭೆ ಸದಸ್ಯರು, ಮುಖಂಡರ ಜೊತೆಗೂಡಿ ನಗರ ಸ್ವಚ್ಛಗೊಳಿಸುತ್ತೇನೆ ಎಂದು ಶಾಸಕ ಕೊತ್ತೂರು ಮಂಜುನಾಥ್ ತಿಳಿಸಿದರು.
ನಗರದ ವಿವಿಧ ವಾರ್ಡ್ಗಳಲ್ಲಿ ಪರಿಶೀಲನೆ ನಡೆಸಿ, ತ್ಯಾಜ್ಯ ವಿಲೇವಾರಿಗೆ ಚಾಲನೆ ನೀಡಿ ಮಾತನಾಡಿದ ಅವರು ಸ್ವಂತ ಹಣದಿಂದ ನಾನು ಕೊಳವೆಬಾವಿ ಹಾಕಿಸಿದರೂ ನಿರ್ವಹಣೆ ಮಾಡಲು ನಗರಸಭೆಗೆ ಯೋಗ್ಯತೆ ಇಲ್ಲ ಎಂದರೆ ಏನು? ಅಧಿಕಾರಿಗಳಿಂದ ನಾವು ಏನೂ ನಿರೀಕ್ಷೆ ಮಾಡುವುದಿಲ್ಲ, ಕಾಫಿ ಕೂಡ ತರಿಸಿಕೊಂಡು ಕುಡಿದಿಲ್ಲ. ಆದರೂ ಸರಿಯಾಗಿ ಕೆಲಸ ಮಾಡುವುದಿಲ್ಲ, ಮಾತು ಕೇಳುವುದಿಲ್ಲ. ಅಧಿಕಾರಿಗಳನ್ನು ದಂಡಿಸಲು, ಅಮಾನತುಗೊಳಿಸಲು ಅಧಿಕಾರ ಇಲ್ಲ, ಬೈಯ್ದರೆ, ಜೋರಾಗಿ ಮಾತನಾಡಿದರೆ ಬೇರೆ ಅರ್ಥ ಕಲ್ಪಿಸುತ್ತಾರೆ ಎಂದು ಹರಿಹಾಯ್ದರು.
ಕಸ ವಿಲೇವಾರಿಗೆ ನಗರಸಭೆ ಬಳಿ ವಾಹನಗಳೇ ಇಲ್ಲ ಎಂಬುದಾಗಿ ಪೌರಕಾರ್ಮಿಕರು ಹೇಳುತ್ತಿದ್ದಾರೆ. ವಿಮೆ ಇಲ್ಲ, ಫಿಟ್ನೆಸ್ ಸರ್ಟಿಫಿಕೇಟ್ (ಎಫ್ಸಿ) ಇಲ್ಲವೆಂದು ನಗರಸಭೆಯ ಕೆಲ ವಾಹನಗಳನ್ನು ಆರ್ಟಿಒ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ. ಯಾವ ಮಟ್ಟಕ್ಕೆ ನಗರಸಭೆ ಆಯುಕ್ತರು ಬೇಜವಾಬ್ದಾರಿಯಿಂದ ಇದ್ದಾರೆ ಎಂಬುದನ್ನು ನೋಡಿ. ಈ ವಿಚಾರವನ್ನು ನಮಗೂ ತಿಳಿಸಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಕೋಲಾರ ನಗರಸಭೆ ಆಯುಕ್ತ ಸರಿಯಾಗಿ ಸ್ಪಂದಿಸುತ್ತಿಲ್ಲ. ತಿಂಗಳ ಹಿಂದೆ 32ನೇ ವಾರ್ಡ್ನ ಏಜಾಜ್ ಮನೆಗೆ ಹೋಗಿದ್ದೆ. ಬ್ಲಾಕ್ ಸ್ಟಾಟ್ ನೋಡಿ ಕಸ ತೆಗೆಯಲು ಸೂಚಿಸಿದ್ದೆ, ಎಂಎಲ್ಸಿ ಅನಿಲ್ ಕುಮಾರ್ ಕೂಡ ಗಮನಕ್ಕೆ ತಂದಿದ್ದರು. ಆದರೂ ನಗರಸಭೆಯಿಂದ ಕಸ ವಿಲೇವಾರಿ ಮಾಡುವ ಕೆಲಸ ನಡೆದಿಲ್ಲ. ಕೌನ್ಸಿಲ್ ಆಗಿದ್ದ ಫೈರೋಜ್ ತಾವೇ ಜೆಸಿಬಿ, ಟ್ರಾಕ್ಟರ್ ಮೂಲಕ ತೆರವುಗೊಳಿಸಿದ್ದರು. ಜನ ಮತ್ತೆ ಕಸ ಎಸೆದಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು
ಮುಖ್ಯ ರಸ್ತೆಯಲ್ಲೂ ತ್ಯಾಜ್ಯ ಎಸೆಯಲಾಗಿದ್ದು, ತೆರವುಗೊಳಿಸಲು ಹೇಳಿದ್ದೆ. ಆದರೂ ಕೆಲಸ ಮಾಡಿಲ್ಲ. ಕಾಲುವೆಗಳಲ್ಲೂ ಹೂಳು ತುಂಬಿಕೊಂಡಿದ್ದು, ಸ್ವಚ್ಛಗೊಳಿಸಿ 30 ವರ್ಷ ಆಗಿದೆ. ಆ ನಿಟ್ಟಿನಲ್ಲಿ ನಾವು ಸಿದ್ಧತೆ ನಡೆಸುತ್ತಿದ್ದೇವೆ ಎಂದರು
ಕಸ ಎಸೆಯುವವರಿಗೆ ಎಚ್ಚರಿಕೆ: ನಗರದಲ್ಲಿ ಬ್ಲಾಕ್ ಸ್ಟಾಟ್ ಇರುವಲ್ಲಿ ಸಿ.ಸಿ.ಟಿ.ವಿ ಕ್ಯಾಮೆರಾ ಅಳವಡಿಸಲಾಗುವುದು. ಕಸ ಹಾಕಿದರೆ ₹ 5ರಿಂದ ₹ 20 ಸಾವಿರದವರೆಗೆ ಕಠಿಣ ದಂಡ ವಿಧಿಸಲಾಗುವುದು. ಅಲ್ಲದೇ, ವಾರ್ಡ್ವಾರು ನಾನೇ ವೇತನ ನೀಡಿ 10 ಮಂದಿ ಯುವಕರ ಪಡೆ ಕಟ್ಟುತ್ತಿದ್ದು, ಅವರು ನಿಗಾ ಇಡಲಿದ್ದಾರೆ. ಹೀಗಾಗಿ, ಜನರು ರಸ್ತೆಯಲ್ಲಿ ಕಸ ಎಸೆಯದೆ ನಗರಸಭೆ ವಾಹನಗಳಿಗೆ ಹಾಕಬೇಕು. ಕಸದ ಗಾಡಿಗಳು ತಮ್ಮ ವಾರ್ಡ್ಗೆ ಬಾರದಿದ್ದರೆ ನಮ್ಮ ಗಮನಕ್ಕೆ ತನ್ನಿ ಎಂದು ಹೇಳಿದರು.
ನಗರಸಭೆ ಅಧಿಕಾರಿಗಳ ಬೇಜವಾಬ್ದಾರಿ ವಿಚಾರವನ್ನು ದೂರವಾಣಿ ಕರೆ ಮೂಲಕ ಜಿಲ್ಲಾಧಿಕಾರಿ ಎಂ.ಆರ್.ರವಿಕುಮಾರ್ ಅವರ ಗಮನಕ್ಕೆ ತಂದರು.
ರಹಮತ್ ನಗರ ಸೇರಿದಂತೆ ವಿವಿಧ ವಾರ್ಡ್ಗಳಲ್ಲಿ ಕಸ ವಿಲೇವಾರಿ ಅಭಿಯಾನ ನಡೆಯಿತು. ಜೆಸಿಬಿಗಳು, ಟಿಪ್ಪರ್ಗಳು, ಟ್ರಾಕ್ಟರ್ಗಳು ಸೇರಿದಂತೆ ಹತ್ತಾರು ವಾಹನಗಳಲ್ಲಿ ಈ ಕಾರ್ಯಾಚರಣೆ ನಡೆಸಲಾಯಿತು.
ಇದನ್ನು ಓದಿದ್ದೀರಾ..?ಕೋಲಾರ | ಕಾಂಗ್ರೆಸ್ಸಿಗರನ್ನು ತುಂಡು ಮಾಡಿ ಅರಬ್ಬಿ ಸಮುದ್ರಕ್ಕೆ ಎಸೆಯುವ ಹೇಳಿಕೆ: ನಗರ ಪೊಲೀಸ್ ಠಾಣೆಯಲ್ಲಿ 3 ದೂರು ಸಲ್ಲಿಕೆ
ವಿಧಾನ ಪರಿಷತ್ ಸದಸ್ಯ ಎಂ.ಎಲ್.ಅನಿಲ್ ಕುಮಾರ್, ಜಿಲ್ಲಾ ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಅಧ್ಯಕ್ಷ ವೈ.ಶಿವಕುಮಾರ್, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಮೈಲಾಂಡಹಳ್ಳಿ ಮುರಳಿ, ಮಾಜಿ ನಗರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ಫೈರೋಜ್ ಖಾನ್, ನಗರಸಭೆ ಮಾಜಿ ಸದಸ್ಯರು ಕಾಂಗ್ರೆಸ್ ಮುಖಂಡರು ಇದ್ದರು.



