ಗಡಿ ಜಿಲ್ಲೆ ಕೋಲಾರದಲ್ಲಿ ಕನ್ನಡಕ್ಕೆ ಧಕ್ಕೆಯಾಗುತ್ತಿದೆ. ತೆಲುಗು ಹಾಗೂ ತಮಿಳು ಪ್ರಭಾವ ಇದೆ. ಈ ನಿಟ್ಟಿನಲ್ಲಿ ಈ ಭಾಗದ ಪದಾಧಿಕಾರಿಗಳು ಗಮನ ಹರಿಸಿ ಕನ್ನಡ ಉಳಿಸಲು ಹೋರಾಟ ನಡೆಸಬೇಕು ಎಂದು ಕರ್ನಾಟಕ ರಕ್ಷಣಾ ವೇದಿಕೆ ಸಿಂಹ ಸೈನ್ಯದ ರಾಜ್ಯಾಧ್ಯಕ್ಷ ಜಿ.ಎನ್.ಶ್ರೀನಿವಾಸಗೌಡ ತಿಳಿಸಿದರು.
ನಗರದ ಪತ್ರಕರ್ತರ ಭವನದಲ್ಲಿ ಶನಿವಾರ ಸಂಘಟನೆಯ ನೂತನ ಪದಾಧಿಕಾರಿಗಳು ಹಾಗೂ ಕಾರ್ಯಕರ್ತರ ಸೇರ್ಪಡೆ, ನೇಮಕಾತಿ ಪತ್ರ ವಿತರಣೆ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.
ಕನ್ನಡಕ್ಕೆ ಎಲ್ಲರ ಶ್ರಮ, ಬಲಿದಾನ, ಹೋರಾಟದ ಅಗತ್ಯವಿದೆ. ನಿರಂತರವಾಗಿ, ಪ್ರಾಮಾಣಿಕವಾಗಿ ಹೋರಾಟ ನಡೆಸಬೇಕು. ಗುಲಾಮ ಮನಸ್ಥಿತಿ ಇಲ್ಲದವ ಮಾತ್ರ ನಿಜವಾದ ಹೋರಾಟಗಾರನಾಗಲು ಸಾಧ್ಯ. ಸತ್ಯ ಮಾತನಾಡಲು ಧೈರ್ಯಬೇಕು. ಭ್ರಷ್ಟಾಚಾರ, ಲಂಚ ಮುಕ್ತ ಕರ್ನಾಟಕ, ಸ್ವಚ್ಛ ಕರ್ನಾಟಕ ಕಟ್ಟಬೇಕು. ಇದು ನಮ್ಮ ಧ್ಯೇಯ ಎಂದರು.
ನಮಗೆ ಸಂವಿಧಾನದಲ್ಲಿ ಹಕ್ಕು, ಅಧಿಕಾರ ಇದೆ. ದೇಶದ ಪ್ರತಿಯೊಬ್ಬರು ತೆರಿಗೆ ಪಾವತಿಸುತ್ತಿದ್ದಾರೆ. ಆದರೆ, ನಾವು ಕಟ್ಟಿದ ತೆರಿಗೆ ಹಣ ಏಕೆ ಸರಿಯಾಗಿ ವಾಪಸ್ ಬರುತ್ತಿಲ್ಲ? ನಾವೇ ಆಯ್ಕೆ ಮಾಡಿದ ಪ್ರತಿನಿಧಿಗಳು ಏಕೆ ಮತದಾರರನ್ನು ನಿರ್ಲಕ್ಷ್ಯ ಮಾಡುತ್ತಿದ್ದಾರೆ ಎಂದು ಪ್ರಶ್ನಿಸಿದರು.
ಸಮಾಜದಲ್ಕಿ ನೂರಾರು ಸಮಸ್ಯೆಗಳು ಇವೆ. ಆದರೆ ನ್ಯಾಯ ಕೊಡಿಸುವ ಸಾಮರ್ಥ್ಯ ಇಲ್ಲವಾಗಿದೆ. ಈ ನಿಟ್ಟಿನಲ್ಲಿ ವ್ಯಕ್ತಿಯ ಶಕ್ತಿ, ಸಾಮರ್ಥ್ಯ ಗುರುತಿಸುವ ನಾಯಕ ಸಮಾಜಕ್ಕೆ ಬೇಕು ಎಂದರು.
ರೈತರು ಬೆಳೆಯುವ ಬೆಳೆಗೆ ನ್ಯಾಯಯುತವಾದ ಬೆಲೆ ಸಿಗುತ್ತಿಲ್ಲ. ರೈತರ ಬಡವರಾಗಿಯೇ ಉಳಿಯಬೇಕಿದೆ. ಬಿಡದಿಯಲ್ಲಿ ಟೌನ್ ಶಿಪ್ ನೆಪದಲ್ಲಿ ರೈತರ ಜಾಗ ಕಿತ್ತುಕೊಳ್ಳುತ್ತಾರೆ. ಕಾವೇರಿ, ಮಹದಾಯಿ ವಿಚಾರಗಳ ಬಗ್ಗೆ ಯಾರಿಗೂ ಕಾಳಜಿ ಇಲ್ಲ. ಸಮಸ್ಯೆ ಬಗೆಹರಿಯುತ್ತಿಲ್ಲ. ಇಡೀ ಬೆಂಗಳೂರಿಗೆ ತರಕಾರಿ, ಮಾವು ಪೂರೈಕೆ ಮಾಡುವ ಕೋಲಾರಕ್ಕೆ ಕೊಳಚೆ ನೀರು ಹರಿಸಲಾಗಿದೆ ಎಂದು ವಾಗ್ದಾಳಿ ನಡೆಸಿದರು.
ರೈತ ಘಟಕದ ರಾಜ್ಯ ಅಧ್ಯಕ್ಷ ನರೇಂದ್ರ ರೆಡ್ಡಿ ಮಾತನಾಡಿ, ಅನ್ಯಾಯ ವಿರುದ್ಧ ಸಿಂಹ ಘರ್ಜನೆ ನಡೆಸಬೇಕು. ರಾಜ್ಯದಲ್ಲಿ ಹಲವಾರು ಸಂಘಟನೆಗಳು ಇವೆ. ಕೆಲವರು ಸ್ವಾರ್ಥಕ್ಕೆ ಕಟ್ಟಿಕೊಂಡಿದ್ದಾರೆ. ಆದರೆ ನಮ್ಮ ಹಾದಿ ಭಿನ್ನವಾಗಿದೆ. ಅನ್ಯಾಯ ವಿರುದ್ಧ ಹೋರಾಟ ನಡೆಸುತ್ತಿದ್ದು, ಸಮಸ್ಯೆಗಳಿಗೆ ಸ್ಪಂದಿಸಲಾಗುತ್ತಿದೆ. ಬೆಂಗಳೂರಿನಲ್ಲಿ ಕಸದ ಸಮಸ್ಯೆ ವಿರುದ್ಧ ಹೋರಾಡಲಾಗುತ್ತಿದೆ ಎಂದರು.
ಮಹಿಳಾ ಘಟಕದ ಜಿಲ್ಲಾ ಅಧ್ಯಕ್ಷೆ ಲಕ್ಷ್ಮಿ ಮಾತನಾಡಿ, ಸ್ವಾರ್ಥ ಇಲ್ಲದೆ ಸಂಘಟನೆ ಮಾಡಲಾಗುತ್ತಿದೆ. ನಾಡು, ನುಡಿ, ಜಲ, ಸ್ವಚ್ಛ ಭಾರತಕ್ಕಾಗಿ ಹೋರಾಟ ನಡೆಸಲಾಗುತ್ತಿದೆ ಎಂದು ಹೇಳಿದರು.
ಬಂಗಾರಪೇಟೆ ತಾಲ್ಲೂಕು ಅಧ್ಯಕ್ಷ ಸುರೇಶ್ ಬಾಬು ಸ್ವಾಗತಿಸಿ ಮಾತನಾಡಿ, ನ್ಯಾಯದ ಹಾದಿಯಲ್ಲಿ ನಡೆಯಬೇಕೆಂಬುದು ಈ ಸಂಘಟನೆಯ ಉದ್ದೇಶ. ತಾಲ್ಲೂಕುಗಳಲ್ಲಿ ಸಂಘಟನೆ ಮಾಡುತ್ತೇವೆ. ಸಮಾಜದಲ್ಲಿ ನಡೆಯುವ ಅನ್ಯಾಯದ ವಿರುದ್ಧ ಹೋರಾಡುತ್ತೇವೆ ಎಂದು ತಿಳಿಸಿದರು.
ಕಾರ್ಮಿಕ ಘಟಕದ ರಾಜ್ಯ ಅಧ್ಯಕ್ಷ ನಡುವತ್ತಿ ಶ್ರೀನಿವಾಸ್, ಉದ್ಯಮ ಘಟಕದ ಅಧ್ಯಕ್ಷ ಶಿವಕುಮಾರ್‌ ಮಾತನಾಡಿದರು.
ಇದನ್ನು ಓದಿದ್ದೀರಾ..?ಕೋಲಾರ | ಗ್ರಾಮ ಠಾಣೆಗಳ ವಿಸ್ತರಣೆ ಹಾಗೂ ಗ್ರಾಮ ನಕ್ಷೆಗಳ ನವೀಕರಣಕ್ಕೆ ಕ್ರಮ: ಸಚಿವರ ಭರವಸೆ
ರಾಜ್ಯ ಅಧ್ಯಕ್ಷರು ಪದಾಧಿಕಾರಿಗಳಿಗೆ ನೇಮಕಾತಿ ಪತ್ರ ವಿತರಿಸಿದರು. ವಿವಿಧ ಘಟಕಗಳ ಪದಾಧಿಕಾರಿಗಳಾದ ಅರುಣ್ ಕುಮಾರ್, ದಿಲೀಪ್ ಶೆಟ್ಟಿ, ಅರುಣ್, ಸುನಿಲ್, ಜಯದೀಪ್, ತೇಜಸ್, ಕೃಷ್ಣಮೂರ್ತಿ, ಸಂತೋಷ್, ಮಂಜುನಾಥ್, ಕೋಲಾರ ತಾಲ್ಲೂಕು ಅಧ್ಯಕ್ಷ ನಾಗೇಶ್, ಮುಳಬಾಗಿಲು ತಾಲ್ಲೂಕು ಘಟಕದ ಅಧ್ಯಕ್ಷ ಚಲಪತಿ, ಶ್ರೀನಿವಾಸಪುರ ಘಟಕದ ಅಧ್ಯಕ್ಷ ವೆಂಕಟರಮಣ ಕೆಜಿಎಫ್ ಘಟಕದ ಅಧ್ಯಕ್ಷ ಮಂಜುನಾಥ್ ಇದ್ದರು.
