ಮೈಸೂರು ಜಿಲ್ಲೆಯ ಎಚ್ ಡಿ ಕೋಟೆಯಲ್ಲಿ 15 ತಿಂಗಳ ಹಿಂದೆ ಪ್ರಾರಂಭವಾದ ಲಿಂಗತ್ವ ಅಲ್ಪಸಂಖ್ಯಾತ ಸಮುದಾಯದ ಮೊದಲ ಸ್ವಸಹಾಯ ಗುಂಪು ಈಗ ಮಾದರಿಯಾಗಿ ಮುನ್ನಡೆಯುತ್ತಿದ್ದು, ಈಗ ತನ್ನ ನಾಲ್ವರು ಸದಸ್ಯರು ಸ್ವಯಂ ಉದ್ಯೋಗ ಕೈಗೊಳ್ಳುವಂತೆ ಸಹಾಯ ಮಾಡುವಷ್ಟು ಸಮರ್ಥವಾಗಿದೆ. ಇದು ಅವರ ಜೀವನದಲ್ಲಿ ಒಂದು ಅಭಿವೃದ್ಧಿಯ ಹೆಜ್ಜೆಯಾಗಿದೆ.
ಲಿಂಗತ್ವ ಅಲ್ಪಸಂಖ್ಯಾತ ಸಮುದಾಯದ ಮೊದಲ ಸ್ವಸಹಾಯ ಸಂಘವಾದ ಆದರ್ಶ ಸ್ವಸಹಾಯ ಗುಂಪು ಈಗ ತನ್ನ ಸದಸ್ಯರಲ್ಲಿ ಉದ್ಯಮಶೀಲತೆಯನ್ನು ಉತ್ತೇಜಿಸಲು ಮತ್ತು ಸ್ವಯಂ ಉದ್ಯೋಗಿಗಳಾಗಲು ಅನುವು ಮಾಡಿಕೊಡಲು ಸಮರ್ಥವಾಗಿದ್ದು, ಕಳೆದ 15 ತಿಂಗಳಲ್ಲಿ ₹2.5 ಲಕ್ಷದವರೆಗೆ ವಹಿವಾಟು ನಡೆಸಿದೆ.
ಜುಲೈ 2023ರಲ್ಲಿ ಪ್ರಾರಂಭವಾದ ಸ್ವಸಹಾಯ ಗುಂಪಿನಲ್ಲಿ 15 ಮಂದಿ ಸದಸ್ಯರಿದ್ದು, ಮಾಸಿಕ ತಲಾ ₹1,000 ಉಳಿತಾಯ ಮಾಡಿಕೊಂಡು ಹಾಲು ಪೂರೈಸುವಂತೆ ಹಸುವನ್ನು ಖರೀದಿಸಲು ತಮ್ಮ ಗುಂಪಿನ ಸದಸ್ಯರೊಬ್ಬರಿಗೆ ಧನಸಹಾಯ ನೀಡಿದರು. ಜತೆಗೆ ಇತರ ಮೂವರು ಕುರಿಗಳನ್ನು ಖರೀದಿಸಿದ್ದಾರೆ.
“ಎಲ್ಲರನ್ನೂ ಒಟ್ಟುಗೂಡಿಸುವ ಮೂಲಕ ಸಮುದಾಯವನ್ನು ಸಬಲೀಕರಣಗೊಳಿಸುವುದು ಇದರ ಉದ್ದೇಶವಾಗಿದೆ. ನಾವು ವಿವಿಧ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದಾಗ, ಸಮುದಾಯವು ಆರ್ಥಿಕವಾಗಿ ಸಬಲರಾಗಲು ಸಹಾಯ ಮಾಡಲು ನಾವು ನಮ್ಮದೇ ಆದ ಸ್ವಸಹಾಯ ಸಂಘವನ್ನು ಪ್ರಾರಂಭಿಸುವ ಅಗತ್ಯವಿದೆಎಂದು ನಾವು ಭಾವಿಸಿದ್ದೇವೆ ” ಎಂದು ಸ್ವಸಹಾಯ ಗುಂಪಿನ ಕಾರ್ಯದರ್ಶಿ ಶಿವರಾಮ್ ತಿಮ್ಮೇಗೌಡ(40) ಹೇಳಿಕೊಂಡಿದ್ದಾರೆ.
“ಸದಸ್ಯರು ಪ್ರತಿ ತಿಂಗಳು ₹1,000ವನ್ನು ಕೊಡುಗೆಯಾಗಿ ನೀಡುತ್ತಾರೆ. ಇದನ್ನು ಸದಸ್ಯರಿಗೆ ವಿವಿಧ ಚಟುವಟಿಕೆಗಳಿಗಾಗಿ ಸಾಲವಾಗಿ ನೀಡಲಾಗುತ್ತದೆ. ಸದಸ್ಯರೊಬ್ಬರು ಆರು ತಿಂಗಳ ಹಿಂದೆ ಹಸುವನ್ನು ಖರೀದಿಸಿದರೆ, ಇತರ ಮೂವರು ಕುರಿ ಕರುಗಳನ್ನು ಖರೀದಿಸಿದರು. ಇದರಿಂದ ಅವರಿಗೆ ಆರ್ಥಿಕವಾಗಿ ಸಹಾಯ ಮಾಡುವ ನಿರೀಕ್ಷೆಯಿದೆ” ಎಂದು ಹೇಳಿದರು.
ಈ ಸುದ್ದಿ ಓದಿದ್ದೀರಾ? ಶಿವಮೊಗ್ಗ | ಅಲ್ಲಮಪ್ರಭು ಫ್ರೀಡಂ ಪಾರ್ಕ್ ಕಾಮಗಾರಿಗೆ ಸಚಿವ ಮಧು ಬಂಗಾರಪ್ಪ ಶಂಕುಸ್ಥಾಪನೆ
“ನಮಗೆ ಸರ್ಕಾರದಿಂದ ಯಾವುದೇ ಹಣಕಾಸಿನ ನೆರವು ಸಿಗಲಿಲ್ಲ. ಲಿಂಗತ್ವ ಅಲ್ಪಸಂಖ್ಯಾತರನ್ನು ವಿವಿಧ ಬೆಂಬಲ ಕಾರ್ಯಕ್ರಮಗಳಲ್ಲಿ ತೊಡಗಿಸುವ ನಿಟ್ಟಿನಲ್ಲಿ ಈ ಸ್ವಸಹಾಯ ಗುಂಪುಗಳನ್ನು ತಾಲೂಕು ಮಟ್ಟಕ್ಕೆ ವಿಸ್ತರಿಸುವುದು ನಮ್ಮ ಮುಂದಿನ ಯೋಜನೆಯಾಗಿದೆ” ಎಂದು ವಿವರಿಸಿದರು.
“ಕಳೆದ ಆರು ತಿಂಗಳಿನಿಂದ ಸ್ಥಳೀಯ ಡೈರಿಗೆ ದಿನಕ್ಕೆ ಮೂರು ಲೀಟರ್ ಹಾಲು ಮಾರಾಟ ಮಾಡುತ್ತಿದ್ದು, ಇದು ತನ್ನ ಜೀವನೋಪಾಯಕ್ಕೆ ಸಹಾಯ ಮಾಡುತ್ತಿದೆ” ಎಂದು ಎಚ್ ಡಿ ಕೋಟೆಯ ನಿವಾಸಿ, ಕಲಾವಿದೆಯೂ ಆಗಿರುವ ರಮ್ಯಾ ಹೇಳಿದರು.
