ಮದುವೆ ಅಂದರೆ ಕೇವಲ ಎರಡು ಮನಸುಗಳ ಮಿಲನ ಮಾತ್ರವಲ್ಲ, ಬಂಧು-ಬಳಗದ ಸಂಭ್ರಮ. ಆದರೆ ಇತ್ತೀಚಿನ ದಿನಗಳಲ್ಲಿ ಮದುವೆ ಮತ್ತು ಆದಾದ ಬಳಿಕ ಅದ್ದೂರಿಯಾಗಿ ಹಮ್ಮಿಕೊಳ್ಳುವ ‘ಬೀಗರ ಊಟ’ (ಬಾಡೂಟ) ಕೇವಲ ಸಂಪ್ರದಾಯವಾಗಿ ಉಳಿಯದೆ, ಪ್ರತಿಷ್ಠೆಯ ಕಣವಾಗಿ ಮಾರ್ಪಟ್ಟಿದೆ.
ಅವರು ಹತ್ತು ಕುರಿ ಹಾಕಿಸಿದ್ದಾರೆ. ನಾವು ಕಡಿಮೆ ಮಾಡಬಾರದು ‘ ಎಂಬ ಅಹಮಿಕೆಯು ಬಡ ಮಧ್ಯಮ ವರ್ಗದವರನ್ನು ಸಾಲದ ಶೂಲೆಗೆ ತಳ್ಳುತ್ತಿದೆ.ಈ ದುಂದುವೆಚ್ಚಕ್ಕೆ ಬ್ರೇಕ್ ಹಾಕಲು ಶಿವಮೊಗ್ಗ ಜಿಲ್ಲೆ ಶಿಕಾರಿಪುರ ತಾಲೂಕಿನ ಹರಗಿ ಗ್ರಾಮಸ್ಥರು ದಿಟ್ಟ ಹೆಜ್ಜೆ ಇಟ್ಟಿದ್ದಾರೆ.
ಬರಗಾಲದಿಂದ ರೈತರು ಹಾಗೂ ಬಡ ಕುಟುಂಬಗಳು ತತ್ತರಿಸಿರುವ ಹಿನ್ನೆಲೆಯಲ್ಲಿ ಗ್ರಾಮದಲ್ಲಿ ಬೀಗರ ಊಟ ಆಯೋಜಿಸುವುದನ್ನು ಸಂಪೂರ್ಣವಾಗಿ ನಿಷೇಧಿಸಿ ಐತಿಹಾಸಿಕ ತೀರ್ಮಾನ ಕೈಗೊಂಡಿದ್ದಾರೆ.
ಗ್ರಾಮಸ್ಥರ ಒಮ್ಮತದ ನಿರ್ಣಯದಂತೆ, ಮುಂದಿನ ದಿನಗಳಲ್ಲಿ ಆಯೋಜಿಸುವುದು ಕಂಡುಬಂದರೆ ಅಂತಹವರಿಗೆ 1 ಲಕ್ಷ ದಂಡ ಹಾಗೂ ಹೋಗುವವರಿಗೆ 50 ಸಾವಿರ ರೂಪಾಯಿ ಭಾರಿ ದಂಡ ವಿಧಿಸಲು ತೀರ್ಮಾನಿಸಲಾಗಿದೆ. ಆರ್ಥಿಕ ಶಿಸ್ತನ್ನು ಕಾಪಾಡಿಕೊಳ್ಳಲು ಗ್ರಾಮಸ್ಥರು ತೆಗೆದುಕೊಂಡಿರುವ ಈ ಕಠಿಣ ನಿರ್ಧಾರ ಈಗ ಸುತ್ತಮುತ್ತಲಿನ ಗ್ರಾಮಗಳಲ್ಲೂ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
This video cannot be played in your browser. Open the video directly
ಬಡತನದಲ್ಲೂ ಸಾಲ ಮಾಡಿ ಬಾಡೂಟ!
ಸುಮಾರು 350 ಕುಟುಂಬಗಳಿರುವ ಹರಗಿ ಗ್ರಾಮದಲ್ಲಿ ಬಹುಪಾಲು ದೀವರ(ಈಡಿಗ) ಸಮುದಾಯದವರಿ ದ್ದಾರೆ. ಹಿಂದೆಲ್ಲಾ 10ರಿಂದ 15 ಜನರಿಗೆ ಸೀಮಿತವಾಗಿ ನಡೆಯುತ್ತಿದ್ದ ಸಂಬಂಧದ ಊಟ, ಈಗ ಶಾಮಿಯಾನ, ಟೇಬಲ್, ದಿನಸಿ ಹಾಗೂ ಬಾಣಸಿಗರ ಖರ್ಚು ಸೇರಿ 8ರಿಂದ 15 ಲಕ್ಷ ರೂಪಾಯಿಗಳವರೆಗೆ ವ್ಯಯಿಸುವ ದೊಡ್ಡ ಮಟ್ಟದ ‘ಟ್ರೆಂಡ್’ ಆಗಿದೆ.
ಬಡವರು ಕನಿಷ್ಠ 2 ಲಕ್ಷ ರೂಪಾಯಿ ಸಾಲ ಮಾಡಿ ಈ ಊಟ ಹಾಕಿಸಬೇಕಾದ ಅನಿವಾರ್ಯತೆ ಇದೆ. ವಿಶೇಷವಾಗಿ ಹೆಣ್ಣು ಕೊಟ್ಟವರ (ಹೆಣ್ಣು ಹೆತ್ತವರ) ಪಾಲಿಗೆ ಈ ಸಂಪ್ರದಾಯ ದೊಡ್ಡ ಆರ್ಥಿಕ ಹೊರೆಯಾಗಿ ಪರಿಣಮಿಸಿತ್ತು.ಹಾಗೆ ಈ ಬೀಗರೂಟ ಮಲೆನಾಡಿನ ನೋಡಿದರೆ ಸಂಪ್ರದಾಯವಲ್ಲ, ಹಳೆ ಮೈಸೂರು ಭಾಗದ ಮಂಡ್ಯ, ಹಾಸನ, ಚಾಮರಾಜನಗರ, ರಾಮನಗರ, ಬೆಂಗಳೂರು ಗ್ರಾಮಾಂತರ ಭಾಗದ ಪದ್ಧತಿ ಈ ಕಡೆಯೂ ವಿಸ್ತರಣೆಯಾಗಿದೆ.ಒಟ್ಟಾರೆ, ಪ್ರತಿಷ್ಠೆಯ ಪ್ರದರ್ಶನಕ್ಕಿಂತ ಮನುಷ್ಯತ್ವ ಮತ್ತು ಆರ್ಥಿಕ ಭದ್ರತೆ ಮುಖ್ಯ ಎಂಬ ಮಹತ್ವದ ಸಂದೇಶವನ್ನು ಹರಗಿ ಗ್ರಾಮ ಸಾರಿದೆ.
ಈ ಕುರಿತು ಈದಿನ.ಕಾಮ್‌ ಜೊತೆಗೆ ಮಾತನಾಡಿದ ಗ್ರಾಮಭಿವೃದ್ಧಿ ಕಾರ್ಯದರ್ಶಿ ಗುರುಮೂರ್ತಿ ಹರಗಿ, “ಇತ್ತೀಚಿನ ವರ್ಷಗಳಲ್ಲಿ ಬೀಗರ ಊಟದ ಪದ್ಧತಿ ಹೆಚ್ಚಾಗಿದೆ. ಇದರಿಂದ ಹಿಂದುಳಿದ ವರ್ಗದ ಕುಟುಂಬಗಳಿಗೆ ಹೆಚ್ಚಿನ ಆರ್ಥಿಕ ಹೊರೆ ಬೀಳುತ್ತಿದೆ. ಈ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ಒಗ್ಗಟ್ಟಿನಿಂದ ನಿರ್ಧಾರ ಕೈಗೊಂಡಿದ್ದಾರೆ” ಎಂದಿದ್ದಾರೆ.
SDMC ಉಪಾಧ್ಯಕ್ಷರ ಸೋಮಶೇಖರ್ ಮಾತನಾಡಿ, “ಶಿಕಾರಿಪುರ ಗ್ರಾಮಸ್ಥರ ನಿರ್ಧಾರ ಸ್ವಾಗತಾರ್ಹ. ಇಂತಹ ಸಂಪ್ರದಾಯಕ್ಕೆ ಕಡಿವಾಣ ಹಾಕುವುದರಿಂದ ಕುಟುಂಬಗಳ ಆರ್ಥಿಕ ಹೊರೆ ಕಡಿಮೆಯಾಗಲಿದೆ. ಇತರ ಗ್ರಾಮಗಳೂ ಸ್ವಯಂಪ್ರೇರಿತವಾಗಿ ಇಂತಹ ನಿರ್ಧಾರ ಕೈಗೊಳ್ಳಬೇಕು” ಎಂದು ಅಭಿಪ್ರಾಯಿಸಿದರು.
