ಆದಿಮ ಕಲಾ ಟ್ರಸ್ಟ್ ಉಡುಪಿ, ಪಡುನಾಡು ಕೂಟ ಬೆಂಗಳೂರು, ಗಜನಿ ಫೌಂಡೇಶನ್ ಮುಲ್ಕಿ ಹಾಗೂ ರಾಣಿ ಚಿಕ್ಕಾಯಿ ತಾಯಿ ಚಾರಿಟೇಬಲ್ ಟ್ರಸ್ಟ್ ಗುಳ್ಳಾಡಿ ಇವರ ಸಂಯುಕ್ತ ಆಶ್ರಯದಲ್ಲಿ ಕಲ್ಯಾಣಪುರ ಕೆಂಚಮ್ಮದೇವಿ ದೇವಸ್ಥಾನದ ಆವರಣದಲ್ಲಿ ಸಂರಕ್ಷಿತ ವೀರ ಮಾಸ್ತಿ ಕಲ್ಲಿನ ಲೋಕಾರ್ಪಣೆ ಸಮಾರಂಭ ಇಂದು ನಡೆಯಿತು.
ಉಡುಪಿ ಶಾಸಕ ಯಶ್ಪಾಲ್ ಸುವರ್ಣ, ಸಂರಕ್ಷಿತ ವೀರ ಮಾಸ್ತಿ ಕಲ್ಲಿನ ಲೋಕಾರ್ಪಣೆ ಮಾಡಿದರು. ಬಳಿಕ ದೇವಸ್ಥಾನದ ವಠಾರದಲ್ಲಿ ಸಭಾ ಕಾರ್ಯಕ್ರಮ ಹಮ್ಮಿಕೊಳ್ಳಲಾಯಿತು. ಸಮಾರಂಭದಲ್ಲಿ ಮಾತನಾಡಿದ ಆದಿಮ ಕಲಾ ಟ್ರಸ್ಟ್ ಸ್ಥಾಪಕ ಸಂಚಾಲಕ ಪ್ರೊ.ಟಿ.ಮುರುಗೇಶಿ, ಕಲ್ಯಾಣ ಪುರದ ಕೆಂಚಮ್ಮ ದೇವಿ ದೇವಸ್ಥಾನ ಕೆಳದಿ ಕಾಲದಲ್ಲಿ ನಿರ್ಮಾಣವಾದ ದೇವಸ್ಥಾನ ಎಂಬುದು ತಿಳಿದುಬರುತ್ತದೆ. ಹಾಗಾಗಿ ಈ ಮಾಸ್ತಿ ಕಲ್ಲು ಕೆಳದಿ ಕಾಲದ್ದೇ ಆಗಿರಬೇಕು. ಅದನ್ನು ಹೊರತೆಗೆದು ಅಧ್ಯಯನ ಮಾಡಲಾಗಿದೆ ಎಂದರು.
ಸಾಮಾನ್ಯವಾಗಿ ವೀರಗಲ್ಲಿನಲ್ಲಿ ಯುದ್ದದ ಚಿತ್ರಣ ಇರುತ್ತದೆ. ಇದರಲ್ಲಿ ಯುದ್ದದ ಚಿತ್ರಣ ಇಲ್ಲ. ವಾದ್ಯದವರು ಇದ್ದಾರೆ. ಇದು ವಿಶೇಷ ಭಂಗಿ. ವೇಳೆ ವಾಳಿ ಪದ್ಧತಿಯಲ್ಲಿ ಇದು ಕಂಡುಬರುತ್ತದೆ. ದಕ್ಷಿಣ ಭಾರತದಲ್ಲಿ 9 ರಿಂದ 13 ನೇ ಶತಮಾನದವರೆಗೆ ಈ ಪದ್ದತಿ ಅಸ್ತಿತ್ವದಲ್ಲಿತ್ತು. ವೇಳೆ ವಾಳಿ ಪದ್ದತಿಯ ಕಾಲದಲ್ಲಿ ರಾಜ ಸತ್ತಾಗ ಅವನ ಪತ್ನಿಯರು ಪ್ರಾಣ ತ್ಯಾಗ ಮಾಡಿದಾಗಿನ ಸನ್ನಿವೇಶ ಇದರಲ್ಲಿ ಕಾಣಸಿಗುತ್ತದೆ. ಆ ಘಟನೆಯ ಪ್ರತೀಕವಾಗಿ ಈ ಮಾಸ್ತಿಕಲ್ಲು ರಚಿಸಿ ಇಲ್ಲಿ ಇಡಲಾಗಿದೆ. ಈ ಅಪರೂಪದ ಮಾಸ್ತಿ ಕಲ್ಲನ್ನು ಮುಂದಿನ ಜನಾಂಗಕ್ಕೆ ಸಂರಕ್ಷಣೆ ಮಾಡಿ ಇಡಬೇಕಾಗಿದೆ ಎಂದು ಅವರು ಹೇಳಿದರು.
ಗಜನಿ ಫೌಂಡೇಶನ್ ಮುಲ್ಕಿ ಹಾಗೂ ಪಡುನಾಡು ಕೂಟದ ಅಧ್ಯಕ್ಷ ಡಾ. ಸುರೇಶ್ ಕೋಟ್ಯಾನ್ ಚಿತ್ರಾಪು ಅಧ್ಯಕ್ಷತೆ ವಹಿಸಿದ್ದರು. ಬೆಂಗಳೂರು ಜಿಯೋಸಿಸ್ ಟೆಕ್ ಪ್ರೈವೇಟ್ ಲಿಮಿಟೆಡ್‌ನ ನಿರ್ದೇಶಕ ರಾಜಶೇಖರ ಕೋಟ್ಯಾನ್, ಹಂಪಿ ಪುರಾತತ್ವ ಸಂಗ್ರಹಾಲಯಗಳು ಮತ್ತು ಪರಂಪರೆ ಇಲಾಖೆಯ ನಿರ್ದೇಶಕ ಡಾ.ಆರ್.ಶೇಜೇಶ್ವರ ಮುಖ್ಯ ಅತಿಥಿಗಳಾಗಿದ್ದರು. ಉಪನ್ಯಾಸಕಿ ಸ್ಮಿತಾ ಕಾರ್ಯಕ್ರಮ ನಿರೂಪಿಸಿದರು.
