ಮೊಸಾಬ್ ಅಬು ತೋಹಾ ಪ್ಯಾಲೆಸ್ತೀನ್ ನ ಗಾಜ಼ಾದ ಕವಿ, ಕತೆಗಾರ. ಇಸ್ರೇಲ್ ನ ಬಾಂಬ್ ದಾಳಿಯಲ್ಲಿ ಮನೆ ಹಾಗೂ ಸಮುದಾಯಕ್ಕಾಗಿ ಶ್ರಮವಹಿಸಿ ನಿರ್ಮಿಸಿದ್ದ ಲೈಬ್ರರಿಯನ್ನು ಕಳೆದುಕೊಂಡು ರಕ್ಷಣೆಗಾಗಿ ಕುಟುಂಬ ಸಹಿತ ಅಲ್ಲಿಂದ ಪಾರಾದರು. ತಾಯ್ನೆಲದ ತಲ್ಲಣಗಳು ಇವರ ಕತೆ, ಕವನಗಳಾಗಿವೆ…
ಕಳೆದುಕೊಳ್ಳುವ ಕಲೆಯನ್ನು ಕರಗತಮಾಡಿಕೊಳ್ಳುವುದು ದುಸ್ತರವಲ್ಲ.
– ಎಲಿಜ಼ಬೆತ್ ಬಿಷಪ್
ಎಲ್ಲವೂ ಕೊನೆಗಾಣುವುದೆಂದು ನಿಮಗೆ ಗೊತ್ತಿದೆ;
ಸಕ್ಕರೆ, ಚಹಾ, ಒಣಗಿದ ಸೈಜ್ ನ ಎಲೆ, ನೀರು
ಸುಮ್ಮನೆ ಮಾರುಕಟ್ಟೆಗೆ ಹೋಗಿ ತಂದು ತುಂಬಿಕೊಳ್ಳಿ
ನಿಮ್ಮ ನೆರಳೂ ನಿಮ್ಮನ್ನು ನಿರಾಕರಿಸುವುದು
ಬೆಳಕು ಇಲ್ಲದಾಗ
ಹಾಗಾಗಿ, ನಿಮ್ಮನ್ನು ಬಯಸುವ ವಸ್ತುಗಳನ್ನಷ್ಟೆ ಇಟ್ಟುಕೊಳ್ಳಿ;
ನೀವು ಮಾತ್ರ ಅರ್ಥೈಸಬಲ್ಲ ಕವನಗಳ ಪುಸ್ತಕ,
ದೇಶದ ಖಾಲಿ ಭೂಪಟ
ನೀವು ಮಾತ್ರ ಗುರುತಿಸಬಲ್ಲ ಅದರ ನಗರಗಳು ಹಳ್ಳಿಗಳು
ನನಗೆ ಆತ್ಮೀಯರಾಗಿದ್ದ ಮೂವರು ಸ್ನೇಹಿತರನ್ನು ಯುದ್ಧದಲ್ಲಿ ಕಳೆದುಕೊಂಡೆ,
ಕತ್ತಲೆಯೊಳಗೆ ನಗರ, ಭಯದೊಳಗೆ ಭಾಷೆ
ಇದರಿಂದ ಉಳಿಯುವುದು ಸುಲಭವಾಗಿರಲಿಲ್ಲ,
ಆದರೂ, ಉಳಿಯುವುದನ್ನು ಕರಗತ ಮಾಡಿಕೊಳ್ಳುವುದು ಅಗತ್ಯ
ಆದರೆ, ಎಲ್ಲಕ್ಕಿಂತ ಮಿಗಿಲಾದ ವಿನಾಶ
ನನ್ನ ಮನೆ ಧ್ವಂಸವಾದಾಗ
ಇದ್ದ ನನ್ನ ಅಜ್ಜನ ಒಂದೇ ಪಟವನ್ನು ಕಳೆದುಕೊಂಡದ್ದು
ಕವಿ: ಮೊಸಾಬ್ ಅಬು ತೋಹಾ
ಕನ್ನಡಾನುವಾದ : ಭಾಗ್ಯ ಸಿ ಎಚ್
