ಸಾಹಿತ್ಯ ಅಭಿವ್ಯಕ್ತಿಯ ಮಾರ್ಗ ಆದ್ದರಿಂದ ಬರೆಯುತ್ತಲೇ ಇರಬೇಕು. ಬರಹ ಕಟ್ಟಿಕೊಡುವ ಕಲ್ಪನೆ ಸತ್ಯವನ್ನು ಹೊರಹಾಕುತ್ತದೆ ಅದು ಕೇವಲ ಕಲ್ಪಾನಕೃತಿ (ಫ್ಯಾಂಟಸಿ) ಅಲ್ಲ, ಅದು ವಾಸ್ತವದ ಒಂದು ಭಾಗ. ಎಂದು ಉರ್ದು ಲೇಖಕಿ ಹೋರಾಟಗಾರ್ತಿ ನಿಶತ್ ಜಮೀಲಾ ಹೇಳಿದರು.
ಹುಬ್ಬಳ್ಳಿ ಪಟ್ಟಣದ ಆರ್.ಎನ್ ಶೆಟ್ಟಿ ಕಲ್ಯಾಣ ಮಂಟಪದಲ್ಲಿ 12ನೇ ಮೇ ಸಾಹಿತ್ಯ ಮೇಳ ಎರಡನೇ ದಿನದ ಕವಿಗೋಷ್ಠಿಯಲ್ಲಿ ಮಾತಾನಾಡಿದ ಅವರು, “ಏಕೆ ಬರೆಯಬೇಕು ಎಂಬ ಪ್ರಶ್ನೆಯೊಂದಿಗೆಯೇ ನಾವು ನಿರಂತರ ಬರೆವ ಪ್ರಕ್ರಿಯೆಯಲ್ಲಿ ತೊಡಗಿಸಿಕೊಳ್ಳಬೇಕು. ನಾನು ಇದುವರೆಗೂ ಲೆಕ್ಕವಿರದಷ್ಟು ಕವನಗಳನ್ನು ಓದಿದ್ದೇನೆ. ಕಾವ್ಯ ಅಭಿವ್ಯಕ್ತಿಯ ಸಾಧನ” ಎಂದು ಹೇಳಿದರು.
“ನಾನು ಹೈದರಬಾದ್‌ನಲ್ಲಿ ಮಹಿಳೆಯರಿಗಾಗಿ ಒಂದು ಸಂಸ್ಥೆಯನ್ನು ಆರಂಭಿಸಿದೆ, ಅಲ್ಲಿ ಸಮುದಾಯದ ನಡುವೆ ನಡೆವ ಸಂಘರ್ಷಗಳಲ್ಲಿ ಮಹಿಳೆಯರು ಸತತ ದಬ್ಬಾಳಿಕೆಗೆ ಒಳಗಾಗುತ್ತಾರೆ. ಒಬ್ಬ ಹೆಣ್ಣಾಗಿ ಇತರೆ ಹೆಣ್ಣುಗಳ ನೋವನ್ನು ನಾನು ಸ್ವತಃ ಅನುಭಾವಿಸುತ್ತೇನೆ. ಈ ನೋವುಗಳೇ ಕವಿತೆಗಳಾಗುತ್ತವೆ, ಹಿಂಸಾಚಾರದ ವಿರುದ್ಧ ಮಹಿಳೆಯರ ಪ್ರತಿಭಟನೆ ಕವ್ವಾಲಿ ಹಾಡಾಗಿ ರೂಪ ಪಡೆದು ಹಾಡಾಗುತ್ತದೆ. ಸಾಂಸ್ಕೃತಿಕ ಅನುವಾದವು ಮಾತಿಲ್ಲದವರ ನೋವನ್ನು ವ್ಯಕ್ತಪಡಿಸುವ ಸಾಧನ, ಸಾಹಿತ್ಯ ಬಿತ್ತುವ ಇಂತಹ ವೈಚಾರಿಕ ಪ್ರಜ್ಞೆಯಿಂದ ಹೆಣ್ಣು ಬುರ್ಖಾ ಬಿಚ್ಚಿಟ್ಟು, ಕಂಪ್ಯೂಟರ್‌ ಕಲಿಯಲು ದಾರಿಯಾಯಿತು” ಎಂದು ಅಭಿಪ್ರಾಯಿಸಿದರು.
ಎರಡನೇ ಗೋಷ್ಠಿಯ ಅಧ್ಯಕ್ಷತೆ ವಹಿಸಿದ್ದ ಕೆ.ವೈ. ನಾರಾಯಣಸ್ವಾಮಿ ಮಾತನಾಡಿ, “ಇಂದಿನ ಕವಿಗಳ ಕಾವ್ಯವಸ್ತು ಮತ್ತು ಅನುಭವ ಆಳ ಮತ್ತು ಸೂಕ್ಷ್ಮವಾಗಿದೆ, ಆದರೆ ಕಾಲಭಾಷೆ ಕಾಣುತ್ತಿಲ್ಲ, ಇದು ಕಾವ್ಯ ಪರಂಪರೆಯ ಮುಂದುವರಿಕೆಗೆ ದೊಡ್ಡ ತೊಡಕಾಗಿದೆ. ಇಂದಿನ ಕಾಲಭಾಷೆ ಪಕ್ವಗೊಳ್ಳಬೇಕಾದರೆ ಬಸವಣ್ಣ, ಸರ್ವಜ್ಞ, ಮುಂತಾದ ನೆಲಮೂಲ ಕವಿಗಳ ವಚನ/ಕವಿತೆಗಳ ಅಧ್ಯಯನ ಅವಶ್ಯ” ಎಂದರು.
ಎರಡನೇ ಕವಿಗೋಷ್ಠಿಯಲ್ಲಿ ಆರನಕಟ್ಟೆ ರಂಗನಾಥ, ದೀಪಾ ಗೋನಾಳ, ಸೂರ್ಯಕೀರ್ತಿ, ಬಿ.ವಿ ಸುನಿತಾ, ಕೆ.ಬಿ ವೀರಲಿಂಗನಗೌಡ್ರ, ಜಬೀವುಲ್ಲಾ ಅಸಾದ್, ನಾಗರಾಜ ಹರಪನಹಳ್ಳಿ , ಶಮೀಮ ಕುತ್ತಾರ್ ಕಾಸರಗೋಡು, ಸಿ.ಬಿ ಐನಳ್ಳಿ ಮರ್ಸಿ ಮಾರ್ಗರೆಟ್ ಹೈದರಾಬಾದ್, ಸದಾಶಿವ ಸೊರಟೂರು, ಎಂ.ಎಂ ಮುಲ್ತಾನಿ, ಅಶೋಕ ಹೊಸಮನಿ, ಶಿಲ್ಪಾ ಮ್ಯಾಗೇರಿ, ಮಧು ಕಾರಗಿ ಕವಿತೆಗಳನ್ನು ವಾಚಿಸಿದರು.
