ಭಾರತದಲ್ಲಿನ ಗಿಗ್ ಕಾರ್ಮಿಕರ ಪೈಕಿ ಸುಮಾರು 40% ಕಾರ್ಮಿಕರು ತಿಂಗಳಿಗೆ 15,000 ರೂ.ಕ್ಕಿಂತಲೂ ಕಡಿಮೆ ಗಳಿಸುತ್ತಾರೆ ಎಂದು ಆರ್ಥಿಕ ಸಮೀಕ್ಷೆ ಹೇಳಿದೆ. ಅವರಿಗೆ ನ್ಯಾಯಯುತ ವೇತನವನ್ನು ಖಚಿತಪಡಿಸಲು ಪ್ರಮುಖ ನೀತಿಗಳನ್ನು ರೂಪಿಸುವ ಅಗತ್ಯವಿದೆ ಎಂದು ಹೇಳಿದೆ. ಅವರು ‘ಆರ್ಡರ್‌’ಗಳಿಗಾಗಿ ಕಾಯುವ ಸಮಯಕ್ಕೂ ಪರಿಹಾರ ಒದಗಿಸಲು ಪ್ರತಿ ಗಂಟೆಗೆ ಇಂತಿಷ್ಟು ಮೊತ್ತವನ್ನು ನಿಗದಿ ಮಾಡಬೇಕೆಂದು ಸೂಚಿಸಿದೆ.
ಗುರುವಾರ, ಸಂಸತ್ತಿನಲ್ಲಿ ವಿತ್ತ ಸಚಿವ ನಿರ್ಮಲಾ ಸೀತಾರಾಮನ್ ಅವರು ಆರ್ಥಿಕ ಸಮೀಕ್ಷೆಯನ್ನು ಮಂಡಿಸಿದ್ದಾರೆ. ದುರ್ಬಲ ಗಿಗ್-ಆರ್ಥಿಕ ನೀತಿಗಳು, ಕೌಶಲ್ಯ ಹೊಂದಾಣಿಕೆಯ ಕೊರತೆ ಅಥವಾ ಸುರಕ್ಷತಾ ಜಾಲದ ಕೊರತೆಯಿಂದಾಗಿ ಗಿಗ್ ಕಾರ್ಮಿಕರು ಒತ್ತಾಯದಿಂದ ಕೆಲಸ ಮಾಡುವ ವಾತಾವರಣವಿದೆ. ಗಿಗ್ ವಲಯವು ವೇಗವಾಗಿ ವಿಸ್ತರಿಸುತ್ತಿರುವಾಗಲೂ ಆದಾಯದ ಏರಿಳಿತ ಕಾಡುತ್ತಿದೆ. ಅನೇಕ ಕಾರ್ಮಿಕರು ‘ಥಿನ್-ಫೈಲ್’ ಸಾಲಗಳನ್ನು ಅವಲಂಬಿಸಿದ್ದಾರೆ ಎಂದು ಸಮೀಕ್ಷೆ ವಿವರಿಸಿದೆ.
ಕೆಲಸದ ಹಂಚಿಕೆ, ವೇತನ ಮತ್ತು ಕಾರ್ಯಕ್ಷಮತೆ ಮೇಲ್ವಿಚಾರಣೆಯನ್ನು ನಿಯಂತ್ರಿಸುವ ಪ್ಲಾಟ್‌ಫಾರ್ಮ್ ಅಲ್ಗಾರಿದಮ್‌ಗಳ ಕುರಿತು ಸಮೀಕ್ಷೆಯು ಕಳವಳ ವ್ಯಕ್ತಪಡಿಸಿದೆ. ಪಕ್ಷಪಾತ ಮತ್ತು ಕಾರ್ಮಿಕರ ರಕ್ಷಣೆಯಲ್ಲಿ ಸಮಸ್ಯೆಗಳನ್ನು ಗುರುತಿಸಿದೆ.
ಭಾರತದ ಗಿಗ್ ಕಾರ್ಮಿಕರ ಸಂಖ್ಯೆಯು 2025ರ ಆರ್ಥಿಕ ವರ್ಷದಲ್ಲಿ 55% ರಷ್ಟು ಏರಿಕೆಯಾಗಿದ್ದು, 1.2 ಕೋಟಿಗೆ ತಲುಪಿದೆ. ಇದು ಒಟ್ಟು ಉದ್ಯೋಗದ 2% ಕ್ಕಿಂತ ಹೆಚ್ಚಿದೆ. ಕೃಷಿಯೇತರ ಗಿಗ್ ಉದ್ಯೋಗಗಳು 2029-30ರ ವೇಳೆಗೆ ಕಾರ್ಯಪಡೆಯ 6.7% ತಲುಪುವ ನಿರೀಕ್ಷೆಯಿದೆ. ಇದು GDPಗೆ 2.35 ಲಕ್ಷ ಕೋಟಿ ರೂ. ಕೊಡುಗೆ ನೀಡುತ್ತದೆ ಎಂದು ಸಮೀಕ್ಷೆ ವಿವರಿಸಿದೆ.
