ರಷ್ಯಾ ವಿರುದ್ಧದ ನಿರ್ಬಂಧಗಳ ಮಸೂದೆಗೆ ತಿದ್ದುಪಡಿ ತಂದು, ಭಾರತ ಸೇರಿದಂತೆ ಹಲವು ದೇಶಗಳ ಮೇಲೆ ಶೇ.100ರಷ್ಟು ಸುಂಕ ವಿಧಿಸಲು ಅಮೆರಿಕ ಅಧ್ಯಕ್ಷರಿಗೆ ಅಧಿಕಾರ ನೀಡುವ ಪ್ರಯತ್ನ ನಡೆದಿದೆ. ರಷ್ಯಾದಿಂದ ಕಚ್ಚಾ ತೈಲ ಖರೀದಿಸುವ ದೇಶಗಳ ಮೇಲೆ ಹೆಚ್ಚುವರಿ ಸುಂಕ ವಿಧಿಸುವ ಉದ್ದೇಶದಿಂದ ಈ ಪ್ರಸ್ತಾಪ ಮಾಡಲಾಗಿದೆ.
ಅಮೆರಿಕದ ಸೆನೆಟರ್‌ ಲಿಂಡ್ಸೆ ಗ್ರಹಾಂ ಅವರ ರಷ್ಯಾ ಮತ್ತು ಇರಾನ್‌ ನಿರ್ಬಂಧಗಳ ಮಸೂದೆಯನ್ನು ಕಳೆದ ತಿಂಗಳು ಅಮೆರಿಕ ಸೆನೆಟ್‌ 86–11 ಮತಗಳ ಭಾರಿ ಬಹುಮತದಿಂದ ಅಂಗೀಕರಿಸಿತ್ತು. ಈ ಮಸೂದೆ ರಷ್ಯಾ ಮಾತ್ರವಲ್ಲದೆ, ಅದರ ವ್ಯಾಪಾರ ಪಾಲುದಾರ ರಾಷ್ಟ್ರಗಳ ಮೇಲೂ ನಿರ್ಬಂಧಗಳು ಮತ್ತು ಸುಂಕ ವಿಧಿಸಲು ಅಧ್ಯಕ್ಷರಿಗೆ ಅಧಿಕಾರ ನೀಡುತ್ತದೆ.
ಉಕ್ರೇನ್‌ ವಿರುದ್ಧದ ಯುದ್ಧಕ್ಕೆ ರಷ್ಯಾದ ಕಚ್ಚಾ ತೈಲ ವ್ಯಾಪಾರವೇ ಪ್ರಮುಖ ಆರ್ಥಿಕ ಆಧಾರವಾಗಿದೆ ಎಂದು ಅಮೆರಿಕ ವಾದಿಸುತ್ತಿದೆ. ರಷ್ಯಾದ ಪ್ರಮುಖ ತೈಲ ಖರೀದಿದಾರ ರಾಷ್ಟ್ರಗಳಾದ ಭಾರತ ಮತ್ತು ಚೀನಾ ಸೇರಿದಂತೆ ಇತರ ದೇಶಗಳ ಮೇಲೂ ಶೇ.100ರಷ್ಟು ಸುಂಕ ವಿಧಿಸುವ ಅಧಿಕಾರವನ್ನು ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರಿಗೆ ನೀಡುವುದು ಮಸೂದೆಯ ಉದ್ದೇಶವಾಗಿದೆ.
ಆಗಸ್ಟ್‌ 7ರಂದು ಸೆನೆಟ್‌ ಅಂಗೀಕರಿಸಿದ ಮಸೂದೆಯಲ್ಲಿ ರಷ್ಯಾದ ವ್ಯಾಪಾರ ಪಾಲುದಾರ ರಾಷ್ಟ್ರಗಳ ಹೆಸರನ್ನು ನೇರವಾಗಿ ಉಲ್ಲೇಖಿಸಿಲ್ಲ. ಬದಲಿಗೆ, ರಷ್ಯಾದಿಂದ ಅತಿ ಹೆಚ್ಚು ಪ್ರಮಾಣದಲ್ಲಿ ತೈಲ ಮತ್ತು ಅನಿಲ ಆಮದು ಮಾಡಿಕೊಳ್ಳುವ ಐದು ದೇಶಗಳ ಮೇಲೆ ಕ್ರಮ ಕೈಗೊಳ್ಳಲು ಅವಕಾಶ ನೀಡಲಾಗಿದೆ. ಮಸೂದೆ ಕಾನೂನಾಗಲು ಸೆನೆಟ್‌ ಬಳಿಕ ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌ನಲ್ಲೂ ಅಂಗೀಕಾರ ಪಡೆಯಬೇಕು. ನಂತರ ಅಧ್ಯಕ್ಷರ ಸಹಿಗೆ ಕಳುಹಿಸಲಾಗುತ್ತದೆ.
ಡೆಮಾಕ್ರಟಿಕ್‌ ಪಕ್ಷದ ಸದಸ್ಯ ಸ್ಟೆನಿ ಹೋಯರ್‌ ಅವರು ಮಂಡಿಸಿರುವ ತಿದ್ದುಪಡಿ ಪ್ರಸ್ತಾವದಲ್ಲಿ, ಶೇ.100ರಷ್ಟು ಸುಂಕ ವಿಧಿಸಬಹುದಾದ ದೇಶಗಳ ಪಟ್ಟಿಗೆ ಭಾರತ ಮತ್ತು ಚೀನಾ ಸೇರಿದಂತೆ ಹಲವು ರಾಷ್ಟ್ರಗಳ ಹೆಸರುಗಳನ್ನು ಸೇರಿಸುವಂತೆ ಕೋರಲಾಗಿದೆ. ಭಾರತ, ಚೀನಾ, ಟರ್ಕಿ, ಅಜೆರ್ಬೈಜಾನ್‌, ಹಂಗೇರಿ, ಸ್ಲೋವಾಕ್‌ ಗಣರಾಜ್ಯ, ಯುಎಇ, ಸಿಂಗಾಪುರ, ಕಝಕಿಸ್ತಾನ್‌ ಮತ್ತು ಕಿರ್ಗಿಸ್ತಾನ್‌ ದೇಶಗಳನ್ನು ಪಟ್ಟಿಯಲ್ಲಿ ಸೇರಿಸುವಂತೆ ತಿದ್ದುಪಡಿಯಲ್ಲಿ ಪ್ರಸ್ತಾಪಿಸಲಾಗಿದೆ.
ನವೆಂಬರ್‌ 3ರಂದು ನಡೆಯಲಿರುವ ಮಧ್ಯಂತರ ಚುನಾವಣೆಗೂ ಮುನ್ನ ಅಮೆರಿಕದ ಕೆಳಮನೆಗೆ ಕೇವಲ ನಾಲ್ಕು ಕೆಲಸದ ದಿನಗಳು ಮಾತ್ರ ಉಳಿದಿವೆ. ಹೀಗಾಗಿ, ಮಸೂದೆಯ ಮುಂದಿನ ಪ್ರಕ್ರಿಯೆ ತ್ವರಿತಗೊಳ್ಳುವ ಸಾಧ್ಯತೆಯಿದೆ.
ಇದೇ ವೇಳೆ, ಟ್ರಂಪ್‌ ಅವರಿಗೆ ಹೆಚ್ಚಿನ ಸುಂಕ ವಿಧಿಸುವ ಅಧಿಕಾರವನ್ನು ಕಡಿತಗೊಳಿಸುವ ಮತ್ತೊಂದು ತಿದ್ದುಪಡಿ ಪ್ರಸ್ತಾಪವೂ ಮಂಡನೆಯಾಗಿದೆ. ಡೆಮಾಕ್ರಟಿಕ್‌ ಪಕ್ಷದ ಸೆನೆಟರ್‌ ಗ್ರೆಗೊರಿ ಮೀಕ್ಸ್‌ ಅವರು ಈ ಪ್ರಸ್ತಾಪ ತಂದಿದ್ದಾರೆ. ನಿರ್ಬಂಧಗಳನ್ನು ಎದುರಿಸುತ್ತಿರುವ ದೇಶದೊಂದಿಗೆ ವ್ಯಾಪಾರ ನಡೆಸುವ ಎರಡನೇ ದೇಶದ ಮೇಲೂ ಸುಂಕ ವಿಧಿಸಲು ಅವಕಾಶ ನೀಡುವ ಮಸೂದೆಯ ಸೆಕ್ಷನ್‌ 113ನ್ನು ರದ್ದುಗೊಳಿಸುವಂತೆ ಮೀಕ್ಸ್‌ ಮನವಿ ಮಾಡಿದ್ದಾರೆ. ಅವರ ತಿದ್ದುಪಡಿ ಪ್ರಸ್ತಾಪಕ್ಕೆ ಮತ್ತಿಬ್ಬರು ಸಂಸದರು ಬೆಂಬಲ ನೀಡಿದ್ದಾರೆ. ರಷ್ಯಾ ನಿರ್ಬಂಧಗಳ ಮಸೂದೆಗೆ ಸಂಬಂಧಿಸಿದ ಈ ತಿದ್ದುಪಡಿಗಳನ್ನು ಹೌಸ್‌ ರೂಲ್ಸ್‌ ಕಮಿಟಿ ಸೋಮವಾರ ಸಾರ್ವಜನಿಕವಾಗಿ ಬಿಡುಗಡೆ ಮಾಡಿದೆ.
ಒಂದು ವೇಳೆ ಶೇ.100ರಷ್ಟು ಹೆಚ್ಚುವರಿ ಸುಂಕ ಜಾರಿಯಾದರೆ, ಅಮೆರಿಕಕ್ಕೆ ರಫ್ತು ಮಾಡುವ ಭಾರತೀಯ ವಸ್ತುಗಳ ಬೆಲೆ ಅಲ್ಲಿ ಹೆಚ್ಚಾಗಬಹುದು. ಇದರಿಂದ ಭಾರತೀಯ ಉತ್ಪನ್ನಗಳ ಸ್ಪರ್ಧಾತ್ಮಕತೆ ಕುಸಿಯುವ ಸಾಧ್ಯತೆಯಿದೆ. ಜವಳಿ, ಔಷಧ, ಎಂಜಿನಿಯರಿಂಗ್‌ ಉತ್ಪನ್ನಗಳು, ರಾಸಾಯನಿಕಗಳು, ಆಭರಣಗಳು ಮತ್ತು ಇತರ ರಫ್ತು ವಲಯಗಳಿಗೆ ಹೊಡೆತ ಬೀಳಬಹುದು.
ಸುಂಕದ ಹೊರೆ ಅಮೆರಿಕದ ಆಮದುದಾರರು ಅಥವಾ ಭಾರತೀಯ ರಫ್ತುದಾರರ ಮೇಲೆ ಹೆಚ್ಚಾಗುವ ಸಾಧ್ಯತೆ ಇದೆ. ಅಮೆರಿಕದ ಖರೀದಿದಾರರು ಹೆಚ್ಚುವರಿ ವೆಚ್ಚ ಭರಿಸಲು ನಿರಾಕರಿಸಿದರೆ, ಭಾರತೀಯ ಕಂಪನಿಗಳು ಬೆಲೆ ಕಡಿಮೆ ಮಾಡಬೇಕಾಗಬಹುದು. ಇದರಿಂದ ಲಾಭಾಂಶ ಕುಸಿಯುವುದು, ಆರ್ಡರ್‌ಗಳು ಕಡಿಮೆಯಾಗುವುದು ಮತ್ತು ಉದ್ಯೋಗದ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ.
ಭಾರತ ರಷ್ಯಾದಿಂದ ಕಡಿಮೆ ದರದಲ್ಲಿ ಕಚ್ಚಾ ತೈಲ ಖರೀದಿಸುತ್ತಿದೆ. ಅದರ ಮೇಲಿನ ಅಮೆರಿಕದ ಒತ್ತಡ ಹೆಚ್ಚಾದರೆ, ಭಾರತ ಪರ್ಯಾಯವಾಗಿ ಮಧ್ಯಪ್ರಾಚ್ಯ ಅಥವಾ ಇತರ ರಾಷ್ಟ್ರಗಳಿಂದ ತೈಲ ಖರೀದಿಸಬೇಕಾಗಬಹುದು. ಇದರಿಂದ ಕಚ್ಚಾ ತೈಲದ ಆಮದು ವೆಚ್ಚ ಹೆಚ್ಚಾಗಬಹುದು.
ಇದನ್ನೂ ಓದಿ: ಸರ್ಕಾರ ಆಧಾರ್‌ನ್ನು ನಂಬುವುದಾದರೆ, ಮತದಾರರ ಪಟ್ಟಿ ಪರಿಷ್ಕರಣೆಗೂ ಬಳಸಲಿ: ಆರ್‌ ಎಸ್‌ ಶರ್ಮಾ
ತೈಲ ಆಮದು ವೆಚ್ಚ ಹೆಚ್ಚಾದರೆ, ಅದರ ಪರಿಣಾಮ ದೇಶೀಯ ಇಂಧನ ಬೆಲೆಗಳ ಮೇಲೂ ಬೀಳಬಹುದು. ಸಾರಿಗೆ ವೆಚ್ಚ ಹೆಚ್ಚಾದರೆ, ಸರಕು ಸಾಗಣೆ, ಆಹಾರ ಪದಾರ್ಥಗಳು ಮತ್ತು ಇತರ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಾಗುವ ಸಾಧ್ಯತೆಯಿದೆ.
ತೈಲ ಆಮದಿಗಾಗಿ ಹೆಚ್ಚಿನ ಪ್ರಮಾಣದಲ್ಲಿ ಡಾಲರ್‌ ಪಾವತಿಸಬೇಕಾದರೆ, ವಿದೇಶಿ ವಿನಿಮಯದ ಮೇಲಿನ ಒತ್ತಡ ಹೆಚ್ಚಾಗಬಹುದು. ಇದರಿಂದ ರೂಪಾಯಿ ಮೌಲ್ಯ ಕುಸಿಯುವ ಸಾಧ್ಯತೆಯಿದ್ದು, ಆಮದು ಅವಲಂಬಿತ ವಲಯಗಳ ವೆಚ್ಚ ಮತ್ತಷ್ಟು ಏರಬಹುದು.
ಈ ಪ್ರಸ್ತಾಪವು ಭಾರತ–ಅಮೆರಿಕ ವ್ಯಾಪಾರ ಒಪ್ಪಂದದ ಮಾತುಕತೆಗಳ ಮೇಲೂ ಒತ್ತಡ ತರುವ ಸಾಧ್ಯತೆಯಿದೆ. ಅಮೆರಿಕವು ರಷ್ಯಾದಿಂದ ತೈಲ ಖರೀದಿಯನ್ನು ಕಡಿಮೆ ಮಾಡುವಂತೆ ಭಾರತವನ್ನು ಒತ್ತಾಯಿಸಬಹುದು. ಇದರಿಂದ ಭಾರತದ ಇಂಧನ ಭದ್ರತೆ ಮತ್ತು ವಿದೇಶಾಂಗ ನೀತಿಯ ನಡುವೆ ಸಮತೋಲನ ಕಾಯ್ದುಕೊಳ್ಳುವುದು ಸವಾಲಾಗಬಹುದು.
ಆದರೆ, ಈ ಶೇ.100ರಷ್ಟು ಸುಂಕದ ಪ್ರಸ್ತಾಪ ಇನ್ನೂ ಮಸೂದೆ ಮತ್ತು ತಿದ್ದುಪಡಿ ಹಂತದಲ್ಲಿದೆ. ಅಮೆರಿಕದ ಕೆಳಮನೆ ಅಂಗೀಕಾರ ಹಾಗೂ ಅಧ್ಯಕ್ಷರ ಸಹಿ ಬಳಿಕವೇ ಇದು ಕಾನೂನಾಗುತ್ತದೆ. ಕಾನೂನಾದರೂ, ಸುಂಕ ವಿಧಿಸುವುದೇ ಅಥವಾ ವಿನಾಯಿತಿ ನೀಡುವುದೇ ಎಂಬ ಅಂತಿಮ ಅಧಿಕಾರ ಅಧ್ಯಕ್ಷರಿಗಿರುತ್ತದೆ.
