ಭಾರತ ಸೇರಿ 98 ದೇಶಗಳ ಐಫೋನ್ ಬಳಕೆದಾರರಿಗೆ ಪೆಗಾಸಸ್ ಮಾದರಿಯ ಸ್ಪೈವೇರ್ ದಾಳಿಯ ಎಚ್ಚರಿಕೆಯನ್ನು ಟೆಕ್ ದೈತ್ಯ ಆ್ಯಪಲ್ ಸಂಸ್ಥೆ ನೀಡಿದೆ. 2021ರಿಂದ, ಆ್ಯಪಲ್ ಈ ಅಧಿಸೂಚನೆಗಳನ್ನು 150ಕ್ಕೂ ಹೆಚ್ಚು ದೇಶಗಳ ಬಳಕೆದಾರರಿಗೆ ಕಳುಹಿಸಿದೆ.
“ನಿಮ್ಮ ಆ್ಯಪಲ್ ಐಡಿಯೊಂದಿಗೆ ಸಂಬಂಧಿಸಿರುವ ಐಫೋನ್ ಮೇಲೆ ದೂರದಿಂದಲೇ ಸ್ಪೈವೇರ್ ದಾಳಿ ಮಾಡುವ ಪ್ರಯತ್ನ ನಡೆಯಬಹುದು ಎಂಬ ಮಾಹಿತಿಯನ್ನು ನಾವು ಪತ್ತೆಹಚ್ಚಿದ್ದೇವೆ” ಎಂದು ಆ್ಯಪಲ್ ತನ್ನ ಬಳಕೆದಾರರಿಗೆ ಎಚ್ಚರಿಕೆ ನೀಡಿದೆ.
“ಈ ದಾಳಿಯು ನೀವು ಯಾರು ಅಥವಾ ನೀವು ಏನು ಮಾಡುತ್ತಿದ್ದೀರಿ ಎಂಬ ಕಾರಣವನ್ನು ಮುಂದಿಟ್ಟುಕೊಂಡು ನಿರ್ದಿಷ್ಟವಾಗಿ ನಿಮ್ಮನ್ನು ಗುರಿಯಾಗಿಸಿಕೊಂಡಿರಬಹುದು” ಎಂದು ಆ್ಯಪಲ್ ಸಂಸ್ಥೆ ತಿಳಿಸಿದೆ.
“ಇಂತಹ ದಾಳಿಗಳು ಖಚಿತವಾಗಿ ನಡೆಯುತ್ತದೆ ಎಂದು ಹೇಳಲು ಸಾಧ್ಯವಿಲ್ಲವಾದರೂ, ದಾಳಿ ನಡೆಯುವ ಸಾಧ್ಯತೆ ಬಗ್ಗೆ ನಾವು ಹೆಚ್ಚಿನ ವಿಶ್ವಾಸವನ್ನು ಹೊಂದಿದ್ದೇವೆ. ದಯವಿಟ್ಟು ಅದನ್ನು ಗಂಭೀರವಾಗಿ ತೆಗೆದುಕೊಳ್ಳಿ” ಎಂದು ಕಂಪನಿಯು ಹೇಳಿದೆ.
ಇದನ್ನು ಓದಿದ್ದೀರಾ? ಮಾರುಕಟ್ಟೆಗೆ ಲಗ್ಗೆ ಇಟ್ಟ ಐಫೋನ್ 15; ಕೊಳ್ಳಲು ಸರತಿ ಸಾಲಿನಲ್ಲಿ ನಿಂತ ಜನ
“ಈ ದಾಳಿಯು ಮಿಲಿಯನ್‌ಗಟ್ಟಲೆ ಡಾಲರ್ ಹೊರೆಯಾಗಬಹುದು. ಅತೀ ಕಡಿಮೆ ಸಂಖ್ಯೆಯ ಜನರ ವಿರುದ್ಧವಾಗಿ ಈ ದಾಳಿ ನಡೆಸುತ್ತಿರಬಹುದು. ಆದರೆ ಸ್ಪೈವೇರ್ ದಾಳಿ ನಡೆಯುತ್ತಿದೆ ಮತ್ತು ಇದು ಜಾಗತಿವಾಗಿ ನಡೆಯುತ್ತಿದೆ” ಎಂದು ಆ್ಯಪಲ್ ಸಂಸ್ಥೆ ಸ್ಪಷ್ಟಪಡಿಸಿದೆ.
ಕಳೆದ ವರ್ಷ ಅಕ್ಟೋಬರ್‌ನಲ್ಲಿ, ಯುಎಸ್ ಮೂಲದ ತಂತ್ರಜ್ಞಾನ ಕಂಪನಿಯು ಭಾರತದ ಬಳಕೆದಾರರಿಗೆ ಇದೇ ರೀತಿಯ ಎಚ್ಚರಿಕೆಯನ್ನು ನೀಡಿದೆ. ಇತ್ತೀಚೆಗೆ, ಭಾರತ ಸರ್ಕಾರವು ಭಾರತದಲ್ಲಿನ ಆ್ಯಪಲ್ ಬಳಕೆದಾರರಿಗೆ ಐಫೋನ್‌ನಲ್ಲಿ ಹಲವಾರು ದೋಷಗಳಿರುವ ಬಗ್ಗೆ ಎಚ್ಚರಿಸಿದೆ.
