2023ರ ಡಿಸೆಂಬರ್ 30ರಂದು ಅಯೋಧ್ಯೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರು ‘ಉಜ್ವಲ ಯೋಜನೆ’ಯ 10 ಕೋಟಿಯ ಫಲಾನುಭವಿ ಮೀರಾ ಮಾಂಝಿ ಅವರ ಮನೆಗೆ ಅಚ್ಚರಿಯ ಭೇಟಿ ನೀಡಿ ಚಹಾ ಸವಿದಿದ್ದರು. ರಾಮಮಂದಿರ ಉದ್ಘಾಟನೆಗೂ ಕೆಲವೇ ವಾರಗಳ ಮುನ್ನ ನಡೆದಿದ್ದ ಈ ಭೇಟಿ ರಾಷ್ಟ್ರಮಟ್ಟದಲ್ಲಿ ಭಾರೀ ಗಮನ ಸೆಳೆದಿತ್ತು. ಅಂದು ತಮ್ಮ ಬಡತನ ನಿವಾರಣೆಯಾಗಲಿದೆ ಎಂದು ನಂಬಿದ್ದ ಮೀರಾ ಕುಟುಂಬ, ಪ್ರಧಾನಿ ಭೇಟಿಯ ಮೂರು ವರ್ಷಗಳ ಬಳಿಕ ಇದೀಗ ತೀವ್ರ ಆರ್ಥಿಕ ಸಂಕಷ್ಟ ಹಾಗೂ ಸಾಲದ ಸುಳಿಗೆ ಸಿಲುಕಿ ಪರದಾಡುತ್ತಿದೆ.
ಪ್ರಧಾನಿ ಭೇಟಿಯ ನಂತರ ಜಿಲ್ಲಾಡಳಿತದ ಅಧಿಕಾರಿಗಳು ಬದುಕು ಹಸನಾಗುವ ಭರವಸೆ ನೀಡಿದ್ದರು. ಆದರೆ, ಮೀರಾ ಅವರ ಪತಿ ಸೂರಜ್ ಕುಮಾರ್‌ಗೆ ಕಾಯಂ ಉದ್ಯೋಗ ನೀಡುವ ಬದಲು ದೋಣಿ ಖರೀದಿಸಲು ‘ಪ್ರಧಾನ ಮಂತ್ರಿ ಉದ್ಯೋಗ ಸೃಷ್ಟಿ ಕಾರ್ಯಕ್ರಮ’ದ (PMEGP) ಅಡಿ ಸಾಲ ನೀಡಲಾಯಿತು. “ನಾವು ಸಾಲ ಕೇಳಿರಲಿಲ್ಲ, ಕೆಲಸವನ್ನಷ್ಟೇ ಕೇಳಿದ್ದೆವು. ಆದರೆ ನಮ್ಮನ್ನು ಸಾಲದ ಸುಳಿಗೆ ದೂಡಲಾಯಿತು” ಎಂದು ಮೀರಾ ಅವರು ಅಕ್ಟೋಬರ್ 28ರಂದು ನಡೆದ ಪತ್ರಿಕಾಗೋಷ್ಠಿಯಲ್ಲಿ ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ನದಿತೀರದಲ್ಲಿ ಹೂವು ಮಾರಾಟ ಮಾಡಿ ಜೀವನ ಸಾಗಿಸುತ್ತಿದ್ದ ಮೀರಾ ಅವರಿಗೆ, ವ್ಯಾಪಾರ ಮಾಡಲು ನಿಗದಿತ ಜಾಗ ನೀಡಲು 5,000 ರೂ. ಲಂಚ ಕೇಳಲಾಯಿತು. ಹಣ ನೀಡಲಾಗದೆ ಅವರು ಆ ಕೆಲಸವನ್ನೂ ಕಳೆದುಕೊಂಡರು. ಇತ್ತ ಪತಿ ಸೂರಜ್ ಅವರ ದೋಣಿ ವ್ಯಾಪಾರವೂ ಪ್ರವಾಹ ಹಾಗೂ ವಾರಾಣಸಿ-ಅಯೋಧ್ಯೆ ನಡುವಿನ ಬೃಹತ್ ಐಷಾರಾಮಿ ಕ್ರೂಸ್ ಹಡಗುಗಳ ಪೈಪೋಟಿಯಿಂದಾಗಿ ಸಂಪೂರ್ಣವಾಗಿ ನೆಲಕಚ್ಚಿತು. ಇದರಿಂದಾಗಿ ಕುಟುಂಬದ ಆದಾಯದ ಮೂಲವೇ ಕಮರಿಹೋಯಿತು.
ಬ್ಯಾಂಕಿನಿಂದ ಪಡೆದಿದ್ದ ಒಟ್ಟು ಸಾಲದಲ್ಲಿ ಕಂತುಗಳನ್ನು ಕಟ್ಟಲಾಗದೆ, ಸದ್ಯ 2,04,616 ರೂ. ಬಾಕಿ ಉಳಿದಿದೆ. ಸಾಲ ಮರುಪಾವತಿಸಲು ಸಾಧ್ಯವಾಗದ ಕಾರಣ, 2026ರ ಜುಲೈ 5ರಂದು ಬ್ಯಾಂಕ್ ಈ ಸಾಲವನ್ನು ‘ಸುಸ್ತಿ ಸಾಲ’ (NPA) ಎಂದು ಘೋಷಿಸಿ ನೋಟಿಸ್ ಜಾರಿ ಮಾಡಿದೆ. ಪ್ರಸ್ತುತ, ಸಾಲ ವಸೂಲಾತಿ ಏಜೆಂಟರು ಮನೆಗೆ ಬಂದು ಬೆದರಿಕೆ ಹಾಕುತ್ತಿದ್ದು, ಮೂವರು ಪುಟ್ಟ ಮಕ್ಕಳಿರುವ ಈ ಬಡ ಕುಟುಂಬ ದಿಕ್ಕುತೋಚದ ಪರಿಸ್ಥಿತಿಯಲ್ಲಿದೆ.
ಈ ವಿಷಯ ಇದೀಗ ರಾಜಕೀಯ ಸ್ವರೂಪ ಪಡೆದುಕೊಂಡಿದ್ದು, ಯುವ ಕಾಂಗ್ರೆಸ್ ನಾಯಕ ಶರದ್ ಶುಕ್ಲಾ, “ಇದು ‘ಮೋದಿ ಮಾಡೆಲ್’ನ ನೈಜ ಮುಖ” ಎಂದು ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಈ ಬೆಳವಣಿಗೆಯ ಬೆನ್ನಲ್ಲೇ, ಸಮಾಜವಾದಿ ಪಕ್ಷದ ಮಾಜಿ ಸಚಿವ ಪವನ್ ಪಾಂಡೆ ಅವರು 50,000 ರೂ. ಹಾಗೂ ಅಯೋಧ್ಯೆಯ ಬಿಜೆಪಿ ಮೇಯರ್ ಗಿರೀಶ್ ಪತಿ ತ್ರಿಪಾಠಿ ಅವರು 60,000 ರೂ.ಗಳ ಆರ್ಥಿಕ ನೆರವನ್ನು ಆ ಕುಟುಂಬಕ್ಕೆ ವಿತರಿಸಿದ್ದಾರೆ.
ವಿರೋಧ ಪಕ್ಷಗಳು ವಿನಾಕಾರಣ ವಿವಾದ ಸೃಷ್ಟಿಸುತ್ತಿವೆ ಎಂದು ಆರೋಪಿಸಿರುವ ಅಯೋಧ್ಯೆ ಮೇಯರ್ ಗಿರೀಶ್ ತ್ರಿಪಾಠಿ ಸರ್ಕಾರವನ್ನು ಸಮರ್ಥಿಸಿಕೊಂಡಿದ್ದಾರೆ. “ಈ ಕುಟುಂಬಕ್ಕೆ ಈಗಾಗಲೇ ಪಿಎಂ ಆವಾಸ್, ಆಯುಷ್ಮಾನ್ ಭಾರತ್ ಮತ್ತು ಉಜ್ವಲ ಯೋಜನೆಗಳ ಸೌಲಭ್ಯ ಒದಗಿಸಲಾಗಿದೆ. ಸಬ್ಸಿಡಿ ಸಹಿತ ಸಾಲವನ್ನೂ ನೀಡಲಾಗಿತ್ತು. ಆದರೆ, ಬ್ಯಾಂಕ್ ಸಾಲವನ್ನು ಮರುಪಾವತಿ ಮಾಡುವುದು ಸರ್ಕಾರದ ಅಥವಾ ಆಡಳಿತದ ಜವಾಬ್ದಾರಿಯಲ್ಲ, ಸಮಾಜ ಈ ಬಗ್ಗೆ ನೆರವಾಗಬೇಕು” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
