ನ. 12ರಿಂದ 14ರವರೆಗೆ ಸಹ್ಯಾದ್ರಿ ಇಂಜಿನಿಯರಿಂಗ್ ಆಂಡ್ ಮ್ಯಾನೇಜ್ ಮೆಂಟ್ ವತಿಯಿಂದ ಶೈನ್ ಫೌಂಡೇಶನ್ ಸಹಯೋಗದಲ್ಲಿ ರಾಷ್ಟ್ರೀಯ ತಾಂತ್ರಿಕ ಮತ್ತು ನಾವೀನ್ಯತಾ ಉತ್ಸವ ‘ಸೈನೆರ್ಜಿಯಾ- 2026’ ಕಾರ್ಯಕ್ರಮ ಆಯೋಜಿಸಲಾಗಿದೆ.
ಮಂಗಳೂರು ಪ್ರೆಸ್ ಕ್ಲಬ್ ನಲ್ಲಿ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಕಾಲೇಜಿನ ಪ್ರಾಂಶುಪಾಲ ಎಸ್.ಎಸ್. ಇಂಜಗನೇರಿ, ನ. 12ರಂದು ಉದ್ಘಾಟನಾ ಸಮಾರಂಭ ನಡೆಯಲಿದ್ದು, ಜಿಟಿಟಿಸಿ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಸಿದ್ಧಲಿಂಗಪ್ಪ ಬಿ. ಪೂಜಾರಿ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ ಎಂದರು.
ನವೆಂಬರ್ 14ರಂದು ಸಮಾರೋಪ ಸಮಾರಂಭ ಹಾಗೂ ಬಹುಮಾನ ವಿತರಣೆ ಕಾರ್ಯಕ್ರಮ ನಡೆಯಲಿದ್ದು, 425ಕ್ಕೂ ಅಧಿಕ ಶಿಕ್ಷಣ ಸಂಸ್ಥೆಗಳಿಂದ 5000ಕ್ಕೂ ಅಧಿಕ ವಿದ್ಯಾರ್ಥಿಗಳು ಭಾಗವಹಿಸುವ ನಿರೀಕ್ಷೆ ಇದೆ. ಸೈನೆರ್ಜಿಯಾದಲ್ಲಿ ಸಹ್ಯಾದ್ರಿ ಸೈನ್ಸ್ ಟ್ಯಾಲೆಂಟ್ ಹಂಟ್ (ಎಸ್ಎಸ್ಟಿಎಚ್) ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದ್ದು, 13ನೆ ಆವೃತ್ತಿಯ ಈ ಎಸ್ಎಸ್ ಟಿಎಚ್ ವಿದ್ಯಾರ್ಥಿಗಳ ನಾವೀನ್ಯ ಆಲೋಚನೆಗಳು ಮತ್ತು ಸ್ಥಳೀಯ ಸಮಸ್ಯೆಗಳಿಗೆ ಪರಿಹಾರ ಒದಗಿಸುವ ಪ್ರಾಜೆಕ್ಟ್ ಗಳ ಪ್ರದರ್ಶನಕ್ಕೆ ವೇದಿಕೆಯಾಗಲಿದೆ. ಆಯ್ಕೆಯಾದ ವಿದ್ಯಾರ್ಥಿಗಳಿಗೆ ಒಟ್ಟು ಎರಡು ಲಕ್ಷ ರೂ. ಮೌಲ್ಯದ ಆರಂಭಿಕ ಅನುದಾನ ದೊರಯಲಿದೆ. ಸಹ್ಯಾದ್ರಿ ಕ್ಯಾಂಪಸ್ ನಲ್ಲಿ ತಜ್ಞರ ಮಾರ್ಗದರ್ಶನ ಹಾಗೂ ನಾವೀನ್ಯತಾ ಮೂಲಭೂತ ಸೌಲಭ್ಯಗಳನು ಬಳಸಲು ಅವಕಾಶ ನೀಡಲಾಗುತ್ತದೆ.
ಸೈನೆರ್ಜಿಯಾದಲ್ಲಿ ಡೈವೋಸ್ಟ್ ಕೂಡಾ ನಡೆಯಲಿದ್ದು, ಇದರಲ್ಲಿ 36 ಗಂಟೆಗ ಹ್ಯಾಕಥಾನ್, ಸಾಫ್ಟ್ ವೇರ್ ಡೆಲಪರ್ಸ್ ಗಳ ವಿಶೇಷ ಉಪನ್ಯಾಸಗಳು, ಕೈಗಾರಿಕಾ ತಜ್ಞರಿಂದ ಕಾರ್ಯಾಗಾರ ಹಾಗೂ ವಿವಿಧ ತಾಂತ್ರಿಕ ಸ್ಪರ್ಧೆಗಳು ನಡೆಯಲಿವೆ. ಆರೋಫೀಲಿಯಾ ಟೀಮ್ ಚಾಲೆಂಜರ್ಸ್ ಆಯೋಜಿಸುವ ಮತ್ತು ನೈನೆಟ್ರಾನ್ ಟೆಕ್ ಪ್ರಾಯೋಜಕತ್ವದ ರಾಷ್ಟ್ರೀಯ ಏರೋಟೆಕ್ ಉತ್ಸವದ ಅಂಗವಾಗಿ ನ. 13ರಂದು ಬೆಳಗ್ಗೆ 9 ಗಂಟೆಗೆ ಏರ್ ಶೋ ನಡೆಯಲಿದೆ. ಇದರಲ್ಲಿ ಏರೋ ಮಾಡಲಿಂಗ್ ಪ್ರದರ್ಶನ, ಡ್ರೋನ್ ರೇಸಿಂಗ್, ರಿಮೋಟ್ ಕಂಟ್ರೋಲ್ ವಿಮಾನಗಳ ಹಾರಾಟ, ಗೇಮಿಂಗ್ ಸ್ಪರ್ಧೆಗಳು ಹಾಗೂ ಕಾರ್ಯಾಗಾರ ನಡೆಯಲಿದೆ.
ಸಹ್ಯಾದ್ರಿ ರೊಬೋಟಿಕ್ಸ್ ಕ್ಲಬ್ ವತಿಯಿಂದ ರೋಬೋ ಸಾಕರ್, ರೋಬೋಟಿಕ್ಸ್ ಹಾಗೂ ಸ್ವಯಂಚಾಲಿತ ಸಂರಚನೆ ಸೇರಿದಂತೆ ವಿವಿಧ ರೋಬೋಟಿಕ್ಸ್ ಸ್ಪರ್ಧೆಗಳು ನಡೆಯಲಿವೆ. ಯುವ ಉದ್ಯಮಶೀಲತೆಗೆ ಸೈನೆರ್ಜಿಯು ಪ್ರೇರಣೆ ನೀಡುತ್ತಿದ್ದು, ಅನೇಕ ಪ್ರಾದೇಶಿಕ ಸ್ಟಾರ್ಟ್ ಅಪ್ಗಳ ಬೆಳವಣಿಗೆಗೆ ಪ್ರೋತ್ಸಾಹ ನೀಡಿವೆ ಎಂದು ಅವರು ವಿವರ ನೀಡಿದರು.
ಸುದ್ದಿಗೋಷ್ಠಿಯಲ್ಲಿ ಆಡಳಿತಾಧಿಕಾರಿ ಕೃಷ್ಣ ಹೆಗ್ಡೆ, ಡೀನ್ ಡಾ. ಶಮಂತ್ ರೈ, ಪ್ರಾಧ್ಯಾಪಕ ಸಂಯೋಜಕ ಡಾ. ಪ್ರಶಾಂತ್ ರಾವ್, ಕಾರ್ಯಕ್ರಮ ಸಂಯೋಜಕರಾದ ಭವಿಷ್ ಶೆಟ್ಟಿ, ಖುಷಿ ಶೆಟ್ಟಿ ಉಪಸ್ಥಿತರಿದ್ದರು.
