ಇತ್ತೀಚೆಗೆ ದೆಹಲಿಯಲ್ಲಿ ಮುಕ್ತಾಯಗೊಂಡ ‘ಬ್ರಿಕ್ಸ್’ ಶೃಂಗಸಭೆಯಿಂದ ಚೀನಾ ಅತ್ಯಂತ ಹೆಚ್ಚಿನ ಲಾಭವನ್ನು ಪಡೆದುಕೊಂಡಿದೆ ಹಾಗೂ ವಿವಿಧ ದೇಶಗಳ ನಡುವಿನ ಭಿನ್ನಾಭಿಪ್ರಾಯಗಳನ್ನು ಸರಿದೂಗಿಸಿ ಸಾಗುವುದು ಅಧ್ಯಕ್ಷತೆ ವಹಿಸಿದ್ದ ಭಾರತಕ್ಕೆ ಸವಾಲಿನ ಕೆಲಸವಾಗಿತ್ತು ಎಂದು ರಾಜ್ಯಸಭಾ ಸಂಸದ ಹಾಗೂ ಹಿರಿಯ ವಕೀಲ ಕಪಿಲ್ ಸಿಬಲ್ ಹೇಳಿದ್ದಾರೆ.
ಸೋಮವಾರ ನವದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಬ್ರಿಕ್ಸ್ ಒಕ್ಕೂಟವನ್ನು ವಿವಿಧ ರೀತಿಯ ರಾಜಕೀಯ ಮತ್ತು ಆರ್ಥಿಕ ಸಿದ್ಧಾಂತ ಹೊಂದಿರುವ ದೇಶಗಳ ‘ಮಿಶ್ರಿತ ಸಮೂಹ’ ಎಂದು ಬಣ್ಣಿಸಿದರು. ಇಂತಹ ವೈವಿಧ್ಯಮಯ ದೇಶಗಳಿರುವ ಒಕ್ಕೂಟದಿಂದ ಯಾವುದೇ ಕ್ರಾಂತಿಕಾರಿ ಅಥವಾ ಏಕರೂಪದ ನಿರ್ಣಯಗಳನ್ನು ಕೈಗೊಳ್ಳುವುದು ಸುಲಭದ ಮಾತಲ್ಲ ಎಂದಿದ್ದಾರೆ.
ಇದನ್ನೂ ಓದಿ: ಬ್ರಿಕ್ಸ್ ಶೃಂಗಸಭೆಯಲ್ಲಿ ಸಸ್ಯಾಹಾರ; ಭಾರತದ ಶೇ. 80ರಷ್ಟು ಜನರು ಮಾಂಸಾಹಾರಿಗಳು: ರಾಹುಲ್ ಗಾಂಧಿ
ಸಭೆಯ ಅಧ್ಯಕ್ಷತೆ ವಹಿಸಿದ್ದ ಭಾರತವು ಜಂಟಿ ಪ್ರಕಟಣೆಯನ್ನುಹೊರತರಲು ಪಟ್ಟ ಶ್ರಮವನ್ನು ಕಪಿಲ್ ಸಿಬಲ್ ಶ್ಲಾಘಿಸಿದರು. “ದೇಶಕ್ಕೆ ಈ ಶೃಂಗಸಭೆಯಲ್ಲಿ ಜಂಟಿ ಘೋಷಣೆ ಅಂಗೀಕರಿಸುವುದು ‘ಹಾರ್ಮುಜ್ ಜಲಸಂಧಿ’ಯಲ್ಲಿ ಹಡಗು ಚಲಾಯಿಸಿದಷ್ಟೇ ಸವಾಲಾಗಿತ್ತು. ಯಾವುದೇ ವಿವಾದಕ್ಕೆ ಆಸ್ಪದ ನೀಡದೆ ಜಂಟಿ ಪ್ರಕಟಣೆ ಹೊರಡಿಸಿರುವುದು ನಮ್ಮ ಸರ್ಕಾರದ ಗಮನಾರ್ಹ ಸಾಧನೆ” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇದೇ ವೇಳೆ, ಬ್ರಿಕ್ಸ್ ಒಕ್ಕೂಟದಲ್ಲಿ ಪರ್ಯಾಯ ನಾಣ್ಯ ಅಥವಾ ‘ಡಿ-ಡಾಲರೈಸೇಶನ್’ (ಅಮೆರಿಕನ್ ಡಾಲರ್ ನಿರ್ಬಂಧಿಸುವುದು) ಕುರಿತು ಯಾವುದೇ ನಿರ್ಧಾರ ಕೈಗೊಳ್ಳದಿರುವುದು ಕೂಡ ಭಾರತಕ್ಕೆ ಸಿಕ್ಕ ಪ್ರಮುಖ ಯಶಸ್ಸು ಎಂದು ಸಿಬಲ್ ಉಲ್ಲೇಖಿಸಿದರು.
ಬ್ರಿಕ್ಸ್ ಅನ್ನು ಪಾಶ್ಚಿಮಾತ್ಯ ವಿರೋಧಿ ಬ್ಲಾಕ್ ಮಾಡಲು ಚೀನಾ ಮತ್ತು ರಷ್ಯಾ ಪ್ರಯತ್ನಿಸುತ್ತಿವೆ ಎಂದು ಆರೋಪಿಸಿದ ಅವರು, ಭಾರತವು ಇದನ್ನು ಪಾಶ್ಚಿಮಾತ್ಯ ವಿರೋಧಿ ಮೈತ್ರಿಕೂಟವನ್ನಾಗಿ ಮಾಡಲು ಬಯಸುವುದಿಲ್ಲ ಎಂದರು. ಈ ಇಡೀ ಶೃಂಗಸಭೆಯ ರಾಜಕೀಯ ಮತ್ತು ಭೌಗೋಳಿಕ ಸನ್ನಿವೇಶದಿಂದ ಚೀನಾ ಅತ್ಯಂತ ಹೆಚ್ಚಿನ ಲಾಭ ಪಡೆದುಕೊಂಡಿದೆ ಎಂದು ಪ್ರತಿಪಾದಿಸಿದರು.
ಅಲ್ಲದೆ, ಶೃಂಗಸಭೆಯಲ್ಲಿ ಕೈಗೊಂಡ ನಿರ್ಣಯಗಳು ಮತ್ತು ನೀಡಲಾದ ಭರವಸೆಗಳು ಕೇವಲ ಕಾಗದದ ಮೇಲಷ್ಟೇ ಉಳಿಯುತ್ತವೆಯೇ ಅಥವಾ ವಾಸ್ತವದಲ್ಲಿ ಅನುಷ್ಠಾನಗೊಳ್ಳುತ್ತವೆಯೇ ಎಂಬುದನ್ನು ಕಾಲವೇ ಉತ್ತರಿಸಬೇಕಾಗಿದೆ ಎಂದು ತಿಳಿಸಿದರು.
