ಪರೀಕ್ಷಾ ಅಕ್ರಮಗಳ‌ವಿರುದ್ಧದ ಕಾಕ್ರೋಚ್‌ಗಳ ಪ್ರತಿಭಟನೆ ಗೆಲುವು ಕಂಡಿದೆ. ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡಿದ್ದಾರೆ. ಸಿಜೆಪಿಯ ಎಲ್ಲ ಬೇಡಿಕೆಗಳ ಈಡೇರಿಕೆಗೆ ಕೇಂದ್ರ ಸರ್ಕಾರ ಒಪ್ಪಿಕೊಂಡಿದೆ. ಇದೆಲ್ಲರದ ಬೆನ್ನಲ್ಲೇ, ಭಾನುವಾರ ಮುಂಜಾನೆ ಕಾಕ್ರೋಚ್ ಜನತಾ ಪಾರ್ಟಿ (CJP) ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಸಂದೇಶ ಹಂಚಿಕೊಂಡಿದ್ದಾರೆ. ‘ಇದು ಆರಂಭವಷ್ಟೇ, ಸಾಗಬೇಕಾದ ಹಾದಿ ಬಹುದೂರವಿದೆ’ ಎಂದು ಹೇಳಿದ್ದಾರೆ.
“ಕಳೆದ 37 ದಿನಗಳ ಪ್ರತಿಭಟನೆಯು ಅತ್ಯಂತ ಕಠಿಣವಾಗಿತ್ತು. ಈಗ ನಿರಾಳತೆ ಇದೆ. ಮುಂದೇನು ಮಾಡಬೇಕು ಅಥವಾ ಸಂಜೆಯೊಳಗೆ ಏನಾಗಬಹುದು ಎಂಬ ಆತಂಕವಿಲ್ಲದೆ ನೆಮ್ಮದಿಯಿಂದ ನಿದ್ರೆ ಮಾಡುವಂತಾಗಿದೆ. ಯಾವುದೇ ಗೊಂದಲವಿಲ್ಲ” ಎಂದು ನಿರಾಳತೆ ವ್ಯಕ್ತಪಡಿಸಿದ್ದಾರೆ.
CJP ಚಳವಳಿಯ ಈ ಜಯವನ್ನು ಪ್ರಸ್ತಾಪಿಸಿದ ಅವರು, “ಇದು ಕೇವಲ ಆರಂಭವಷ್ಟೇ, ಕಾಕ್ರೋಚ್ ಜನತಾ ಪಾರ್ಟಿ ಸಾಗಬೇಕಾದ ಹಾದಿ ಇನ್ನೂ ಬಹುದೂರವಿದೆ” ಎಂದು ಹೇಳಿದ್ದಾರೆ.
“ಟೈಫಾಯಿಡ್ ಜ್ವರದಿಂದ ಬಳಲುತ್ತಿದ್ದ ಕಾರಣ ನಿನ್ನೆ ಜಂತರ್ ಮಂತರ್‌ನಲ್ಲಿ ಎಲ್ಲರಿಗೂ ವೈಯಕ್ತಿಕವಾಗಿ ಧನ್ಯವಾದ ಹೇಳಲು ಸಾಧ್ಯವಾಗಲಿಲ್ಲ. ಅದಕ್ಕಾಗಿ ಕ್ಷಮೆ ಯಾಚಿಸುತ್ತೇನೆ.ಕಳೆದ 37 ದಿನಗಳಿಂದ ದೇಶಕ್ಕಾಗಿ ಹೋರಾಡಿದ ಪ್ರತಿಯೊಬ್ಬರಿಗೂ ಕೃತಜ್ಞತೆಗಳು” ಎಂದಿದ್ದಾರೆ.
ಕಾಕ್ರೋಚ್ ಪ್ರತಿಭಟನೆಯನ್ನು ವಿಮರ್ಶಿಸಿದವರಿಗೂ ಧನ್ಯವಾದ ತಿಳಿಸಿದ ಅವರು, “ಅವರ ಪ್ರಶ್ನೆಗಳು ಮತ್ತು ವಿಮರ್ಶೆಗಳು ನಮ್ಮ ತಪ್ಪನ್ನು ತಿದ್ದುಕೊಂಡು ಸರಿ ಹಾದಿಯಲ್ಲಿ ಸಾಗಲು ಹಾಗೂ ಸೂಕ್ತ ಫಲಿತಾಂಶ ನೀಡಲು ಸಹಾಯ ಮಾಡಿದವು,” ಎಂದಿದ್ದಾರೆ.
