ಇತ್ತೀಚೆಗೆ ಮುಕ್ತಾಯಗೊಂಡ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ, ದೇಶದಲ್ಲಿ ನಡೆದ ಯುವ ಪ್ರತಿಭಟನೆಗಳು ಹಾಗೂ ನೀಟ್-ಯುಜಿ (NEET-UG) ಪರೀಕ್ಷೆಗೆ ಸಂಬಂಧಿಸಿದ ಮೂರು ಪ್ರಮುಖ ಪ್ರಶ್ನೆಗಳ ಸೆಟ್ಗಳನ್ನು ಲೋಕಸಭೆಯಲ್ಲಿ ತಿರಸ್ಕರಿಸಲಾಗಿದೆ (Disallowed) ಎಂದು ಕಾಕ್ರೋಚ್ ಜನತಾ ಪಾರ್ಟಿ (ಸಿಜೆಪಿ) ಮುಖ್ಯ ವಕ್ತಾರ ಸೌರವ್ ದಾಸ್ ಆರೋಪಿಸಿದ್ದಾರೆ.
ಡಿಎಂಕೆ ಪಕ್ಷದ ಲೋಕಸಭಾ ಸಂಸದ ಮಾಥೇಶ್ವರನ್ ವಿ.ಎಸ್. ಅವರು ಕೇಂದ್ರ ಗೃಹ ಸಚಿವಾಲಯ ಹಾಗೂ ಶಿಕ್ಷಣ ಸಚಿವಾಲಯವನ್ನು ಗುರಿಯಾಗಿಸಿಕೊಂಡು ಈ ಪ್ರಶ್ನೆಗಳನ್ನು ಸಲ್ಲಿಸಿದ್ದರು. ಆದರೆ, ಲೋಕಸಭೆಯ ಕಾರ್ಯವಿಧಾನ ಮತ್ತು ನಡಾವಳಿ ನಿಯಮ 41(2) ರ ವಿವಿಧ ತಾಂತ್ರಿಕ ಕಾರಣಗಳನ್ನು ನೀಡಿ ಈ ಪ್ರಶ್ನೆಗಳನ್ನು ಅನುಮತಿಸದೇ ರದ್ದುಗೊಳಿಸಲಾಗಿದೆ ಎಂದು ವರದಿಯಾಗಿದೆ.
ಇದನ್ನೂ ಓದಿ: ಸಂಸತ್ ಚಲೋ | ಸಿಜೆಪಿ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಬಂಧನ; ಸೌರವ್ ದಾಸ್ ಮಾಹಿತಿ
ಸಿಜೆಪಿ ಸಲ್ಲಿಸಿದ್ದ ಪ್ರಮುಖ ಮೂರು ಪ್ರಶ್ನೆಗಳಾವುವು?
ಸಂಸದರು ಸಲ್ಲಿಸಿದ್ದ ಪ್ರಶ್ನೆಗಳಲ್ಲಿ ಮುಖ್ಯವಾಗಿ ಈ ಕೆಳಗಿನ ವಿಚಾರಗಳ ಕುರಿತು ಉತ್ತರ ಕೇಳಲಾಗಿತ್ತು:
- ನೀಟ್-ಯುಜಿ (NEET-UG) ಅರ್ಜಿ ಶುಲ್ಕದ ಮರುಪಾವತಿ.
- ಸರ್ಕಾರದ ಮೇಲಿನ ಸಾರ್ವಜನಿಕ ಅಪನಂಬಿಕೆ ಹಾಗೂ ಯುವ ಸಮುದಾಯದ ಜೊತೆ ಸರ್ಕಾರದ ಸಂವಾದ.
- ದೆಹಲಿಯಲ್ಲಿ ಪ್ರತಿಭಟನೆ ನಡೆಸುತ್ತಿದ್ದ CJP ಕಾರ್ಯಕರ್ತರಿಗೆ ಕುಡಿಯುವ ನೀರು ಮತ್ತು ನೈರ್ಮಲ್ಯ ಸೌಲಭ್ಯಗಳನ್ನು ನಿರಾಕರಿಸಿದ ಆರೋಪ.
- ಪರೀಕ್ಷಾ ಅಕ್ರಮ/ಪ್ರಶ್ನೆಪತ್ರಿಕೆ ಸೋರಿಕೆ ತಡೆ ಹಾಗೂ ಶಿಕ್ಷಣ ರಂಗದ ಸುಧಾರಣೆಗಳು.
- ಶಾಂತಿಯುತ ಪ್ರತಿಭಟನೆ ನಡೆಸುವ ನಾಗರಿಕರ ಮೂಲಭೂತ ಹಕ್ಕುಗಳ ಮೇಲಿನ ಗೃಹ ಸಚಿವಾಲಯದ ನಡವಳಿಕೆ.
ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಸಿಜೆಪಿ ವಕ್ತಾರ ಸೌರವ್ ದಾಸ್, “ಜನಸಾಮಾನ್ಯರ ಮತ್ತು ವಿದ್ಯಾರ್ಥಿಗಳ ನ್ಯಾಯಸಮ್ಮತ ಪ್ರಶ್ನೆಗಳನ್ನು ಲೋಕಸಭೆಯಲ್ಲಿ ತಡೆ ಹಿಡಿಯಲು ವಿಚಿತ್ರ ನೆಪಗಳನ್ನು ನೀಡಲಾಗಿದೆ. ಪ್ರಜಾಪ್ರಭುತ್ವದಲ್ಲಿ ಸಂಸತ್ತು ಸರ್ಕಾರದ ಹೊಣೆಗಾರಿಕೆಯನ್ನು ಪ್ರಶ್ನಿಸುವ ಮುಖ್ಯ ಸ್ಥಳ. ಅಲ್ಲಿಯೇ ಪ್ರಶ್ನೆ ಕೇಳಲು ಬಿಡದಿದ್ದರೆ, ಸರ್ಕಾರ ತನ್ನ ಉತ್ತರದಾಯಿತ್ವವನ್ನು ಎಲ್ಲಿ ಸಾಬೀತುಪಡಿಸಬೇಕು?” ಎಂದು ಪ್ರಶ್ನಿಸಿದ್ದಾರೆ.
ಸಂಸದರು ಸಚಿವರನ್ನು ಪ್ರಶ್ನಿಸುವುದು ಪ್ರಜಾಪ್ರಭುತ್ವದ ಜೀವನಾಡಿ. ಇದನ್ನು ತಡೆಯುವ ಮೂಲಕ ಸಂಸತ್ತನ್ನು ರಬ್ಬರ್ ಸ್ಟಾಂಪ್ ಮಾಡಲು ಯತ್ನಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. ಸಂಸದ ಮಾಥೇಶ್ವರನ್ ಅವರೂ ಸಹ ಈ ಪ್ರಶ್ನೆಗಳು ತಿರಸ್ಕೃತಗೊಂಡಿರುವುದನ್ನು ಸಂಸತ್ತಿನ ಪೋರ್ಟಲ್ ಮೂಲಕ ದೃಢಪಡಿಸಿದ್ದಾರೆ.
